SWIFT តាមទូរស័ព្ទ

ដើម្បីសម្រួលឲ្យលោកអ្នកប្រើប្រាស់សេវាធនាគារ បានកាន់តែងាយស្រួល និងចំណេញពេលវេលា យើងខ្ញុំសូមណែនាំ សេវា SWIFT ផ្ទេរប្រាក់ក្រៅប្រទេស តាម ABA Mobile ជាដុល្លារ និងរូបិយប័ណ្ណផ្សេងទៀត (GBP, EUR, THB, CNY, SGD, AUD, CAD, VND, JPY) ។

មុខងារនេះ នឹងជួយឲ្យអ្នកចំណេញពេលវេលាបានយ៉ាងច្រើន ព្រោះលោកអ្នកអាចផ្ទេរប្រាក់ទៅក្រៅប្រទេសពីទូរស័ព្ទដៃរបស់អ្នកផ្ទាល់ ដោយមិនចាំបាច់ចំណាយប្រាក់ និងពេលវេលាធ្វើដំណើរទៅកាន់សាខា ABA ឡើយ! លោកអ្នកអាចធ្វើការផ្ទេរប្រាក់ពីផ្ទះ ឬកន្លែងធ្វើការ 24ម៉ោងក្នុងមួយថ្ងៃ និង 7ថ្ងៃក្នុងមួយសប្ដាហ៍។

អត្ថប្រយោជន៍នៃការប្រើប្រាស់ សេវាផ្ទេរប្រាក់ SWIFT តាម ABA Mobile

ងាយស្រួល — មិនចាំបាច់អញ្ជើញទៅសាខា ABA។
ដើម្បីចំណេញពេលវេលា អ្នកអាចបង្កើតបែបបទគំរូឲ្យហើយ សម្រាប់ប្រតិបត្តិការ SWIFT ដែលត្រូវការធ្វើឡើងញឹកញាប់។
តាមរយ: កម្មវិធី ABA Mobile លោកអ្នកអាចផ្ទេរប្រាក់ទៅក្រៅប្រទេស ដោយប្រើរូបិយប័ណ្ណណាមួយ ក្នុងចំណោម 10 រូបិយប័ណ្ណ៖ GBP, EUR, THB, CNY, SGD, AUD, CAD, VND, JPY និង USD។
លោកអ្នកអាចដោនឡូតរបាយការណ៍ប្រតិបត្តិការជាហ្វាល់ PDF ដើម្បីទុកជាឯកសារយោង។

តម្លៃសេវាកម្ម

កម្រៃជើងសារ 0.15% នៃចំនួនទឹកប្រាក់ផ្ទេរ ឬអប្បបរមា 15 ដុល្លារ (ឬអត្រាពិសេសដែលធនាគារផ្តល់ជូនអ្នក)
ថ្លៃបណ្តាញ 15 ដុល្លារ
ថ្លៃសេវាបន្ថែម 30 ដុល្លារ នឹងត្រូវអនុវត្ត ប្រសិនបើអ្នកជ្រើសរើសយក "OUR" (នោះទឹកប្រាក់ផ្ទេរនឹងត្រូវបានផ្ទេរទៅកាន់ធនាគារអ្នកទទួលបានគ្រប់ចំនួនពេញលេញ)។

ប្រតិបត្តិការ
លក្ខខណ្ឌ

អប្បបរមាក្នុងមួយប្រតិបត្តិការ៖ 100 ដុល្លារ
អតិបរមាក្នុងមួយប្រតិបត្តិការ៖ 100,000 ដុល្លារ
អតិបរមាក្នុងមួយថ្ងៃ៖ 100,000 ដុល្លារ

លក្ខខណ្ឌនៃការផ្ទេរប្រាក់របស់ធនាគារវឌ្ឍនៈអាស៊ីចំកាត់ “ABA”

សូមអានលក្ខខណ្ឌខាងក្រោមនេះដោយប្រុងប្រយ័ត្ន។ លក្ខខណ្ឌនេះគឺជា កិច្ចព្រមព្រៀង រវាងរូបអ្នក (អ្នកផ្ទេរ) និងធនាគារវឌ្ឍនៈអាស៊ីចំកាត់ (ធនាគារ) ពាក់ព័ន្ធនឹងការប្រើប្រាស់សេវាផ្ទេរប្រាក់។

អ្នកផ្ទេរបញ្ជាក់ថា រាល់ព័ត៌មាននៅក្នុងពាក្យស្នើសុំផ្ទេរប្រាក់គឺត្រឹមត្រូវ និង ពិតប្រាកដមែន ។ ហើយធនាគារ នឹងមិនទទួលខុសត្រូវរាល់ការយឺតយ៉ាវ អាក់ដំណើរការ និងការដកចេញ ដែលបង្កឡើងដោយសារអ្នកផ្ទេរបានផ្ដល់ព័ត៌មានមិនមានភាពច្បាស់លាស់ ឬមិនត្រឹមត្រូវនោះទេ។
អ្នកផ្ទេរយល់ព្រមថា នឹងមិនបង្ហាញ លេខកូដ (PIN) ឬ ពាក្យសម្ងាត់ ដែលតម្រូវសម្រាប់ការប្រើប្រាស់ កម្មវិធី ABA Mobile និង I Banking ទៅកាន់ភាគីទីបីនោះទេ។
អ្នកផ្ទេរបញ្ជាក់ថា ពិតជាបានបង្កើតប្រតិបត្តិការផ្ទេរប្រាក់ក្នុងគោលបំណងផ្ទាល់ខ្លួន ដោយមិនបង្កើតប្រតិបត្តិការផ្ទេរប្រាក់ណាមួយជំនួសឱ្យភាគីទីបីឡើយ។
អ្នកផ្ទេរបានផ្ដល់សិទ្ធិឱ្យធនាគារធ្វើការដកប្រាក់ចេញពីគណនីរបស់អ្នកផ្ទេរ នូវចំនួនប្រាក់ផ្ទេររួមទាំងកម្រៃសេវាផ្សេងៗ។
អ្នកផ្ទេរបានយល់ និង ឯកភាពថា ធនាគារនឹងអនុវត្តអត្រាប្ដូរប្រាក់របស់ធនាគារ ដើម្បីធ្វើការផ្ទេរប្រាក់ជារូបិយប័ណ្ណបរទេស។
ធនាគារនឹងបញ្ជូនប្រតិបត្តិការនៅថ្ងៃធ្វើការបន្ទាប់ ហើយអត្រាប្តូរប្រាក់ថ្មីអាចនឹងត្រូវបានអនុវត្តសម្រាប់ការផ្ទេរប្រាក់ជារូបិយប័ណ្ណបរទេស ប្រសិនបើប្រតិបត្តិការនេះស្ថិតក្នុងការរង់ចាំការត្រួតពិនិត្យផ្សេងៗ ឬ ប្រតិបត្តិការនេះត្រូវបានធ្វើឡើងក្រោយម៉ោង ៤ រសៀល (ម៉ោងនៅកម្ពុជា) នៃថ្ងៃធ្វើការនៅតាមបញ្ជរបេឡារបស់ធនាគារ។
អ្នកផ្ទេរអនុញ្ញាតឱ្យធនាគារធ្វើការពន្យារ បង្កក ឬលុបចោលការផ្ទេរប្រាក់ប្រសិនបើធនាគារ ឬធនាគារអន្តរការី រកឃើញថាការផ្ទេរប្រាក់នោះមានពាក់ព័ន្ធនឹងសកម្មភាពមិនស្របច្បាប់ និង/ឬ អំពើល្មើសច្បាប់ ឬបទប្បញ្ញត្តិជាតិ ឬអន្តរជាតិ។
អ្នកផ្ទេរធានាថា ការផ្ទេរប្រាក់នេះមិនមានពាក់ព័ន្ធនឹងសកម្មភាពមិនស្របច្បាប់នានា និង/ឬការសម្អាតប្រាក់ និង/ឬសកម្មភាពហិរញ្ញប្បទានភេរវកម្មណាមួយឡើយ ។ ធនាគារមានសិទ្ធិក្នុងការបដិសេធ ឬបង្កកការផ្ទេរប្រាក់ ប្រសិនបើចាំបាច់ ដើម្បីស៊ើបអង្កេត/សិក្សាបន្ថែមអំពីអតិថិជន។
អ្នកផ្ទេរនឹងមិនទាមទារសំណងណាមួយពីធនាគារសម្រាប់ការខាតបង់ ឬការបដិសេធណាមួយ ប្រសិនបើប្រតិបត្តិការរបស់ខ្លួនត្រូវបានបង្កក ឬបដិសេធដោយធនាគារអន្តរការី ឬធនាគាររបស់អ្នកទទួល ពាក់ព័ន្ធនឹងទណ្ឌកម្ម ឬលក្ខខណ្ឌកម្រិតអន្តរជាតិណាមួយ។
អ្នកផ្ទេរយល់ព្រម ផ្ដល់ជូននូវព័ត៌មាន និង/ឬ ឯកសារបន្ថែមពាក់ព័ន្ធនឹងការផ្ទេរប្រាក់ប្រសិនបើតម្រូវដោយធនាគារ។
ធនាគារមានសិទ្ធិធ្វើការកែប្រែថ្លៃសេវាកម្ម និង កម្រៃ ក៏ដូចជាលក្ខខណ្ឌទាំងអស់គ្រប់ពេលវេលាដោយមិនចាំបាច់ធ្វើការជូនដំណឹងជាមុន។
ធនាគារមានសិទ្ធិផ្ដល់ព័ត៌មាននៃការផ្ទេរប្រាក់ទៅឲ្យភាគីទីបី ដែលកំណត់ដោយច្បាប់ព្រះរាជាណាចក្រកម្ពុជា រួមបញ្ចូលការសម្រេចពីតុលាការ ការស៊ើបអង្កេត និងបទបញ្ជានានា។
អ្នកផ្ទេរយល់ស្របថា ធនាគារអន្តរការី ឬ ធនាគាររបស់អ្នកទទួល អាចស្នើសុំ កែប្រែ ឬ បញ្ឈប់ប្រតិបត្តិការបាន ដោយផ្អែកទៅតាមនីតិវិធីរបស់ធនាគារអន្តការី ឬ ធនាគាររបស់អ្នកទទួល។
អ្នកផ្ទេរយល់ព្រមថា អត្រាប្តូរប្រាក់ថ្មី ថ្លៃសេវាកែប្រែ/ថ្លៃសេវាបញ្ឈប់ប្រតិបត្តិការ និង ថ្លៃសេវាផ្សេងៗទៀតនឹងត្រូវបានអនុវត្ត សម្រាប់ការស្នើសុំកែប្រែ ឬ បញ្ឈប់ប្រតិបត្តិការ ។ ការកែប្រែ ឬ ការបញ្ឈប់ប្រតិបត្តិការអាចប្រព្រឹត្តទៅបានជោគជ័យ អាស្រ័យទៅលើនីតិវិធីរបស់ធនាគារអន្តរការី ឬ ធនាគាររបស់អ្នកទទួលផល ឬ ការអនុញ្ញាតពីអ្នកទទួលផល។
ក្នុងករណីបញ្ឈប់ប្រតិបត្តិការ ធនាគារនឹងផ្ទេរប្រាក់ត្រលប់ទៅកាន់អ្នកផ្ទេរវិញ នៅពេលដែលធនាគារទទួលបានប្រាក់ត្រឡប់ពីធនាគារអន្តរការី ។ គួរបញ្ជាក់ផងដែរថា ធនាគារអន្តរការី ឬ ធនាគារអ្នកទទួលផល អាចនឹងដកថ្លៃសេវាកម្មមុនពេលដែលផ្ទេរប្រាក់ត្រឡប់មកវិញ។
ដើម្បីស្នើសុំកែប្រែ ឬ បញ្ឈប់ប្រតិបត្តិការ អ្នកផ្ទេរត្រូវតែបំពេញពាក្យស្នើសុំកែប្រែ/បញ្ឈប់ប្រតិបត្តិការ រួចចុះហត្ថលេខា ហើយប្រគល់ជូនសាខាណាមួយរបស់ធនាគារ។ លោកអ្នកអាចធ្វើការទាញយកទម្រង់ស្នើសុំពីគេហទំព័រ www.ababank.com/en/international-transfers/.
ជម្រើសបង់ថ្លៃសេវា "OUR" មានន័យថាអ្នកផ្ទេរទទួលខុសត្រូវលើថ្លៃសេវាទាំងអស់របស់ធនាគារ ABA រួមទាំងថ្លៃសេវារបស់ធនាគារអន្តរការីផងដែរ ។ គួរបញ្ជាក់ផងដែរថា ធនាគាររបស់អ្នកទទួលផល អាចនឹងគិតថ្លៃសេវាផ្សេងៗមួយចំនួន ដោយផ្អែកទៅតាមនីតិវិធីរបស់ធនាគារអ្នកទទួលផល ហេតុនេះ ធនាគារ ABA មិនធានាថាអ្នកទទួលផលនឹងទទួលបានប្រាក់ផ្ទេរក្នុងចំនួនពេញលេញនោះទេ។
អ្នកផ្ទេរបានយល់ស្របថា ធនាគារមួយចំនួនមិនអនុវត្តជម្រើសបង់ថ្លៃសេវា “OUR” នោះទេ។
ជម្រើសបង់ថ្លៃសេវា “BEN” មានន័យថា ថ្លៃសេវាផ្ទេរប្រាក់ទាំងអស់នឹងត្រូវដកចេញពីទឹកប្រាក់ដែលបានផ្ទេរ។
ជម្រើសបង់ថ្លៃ “SHA” មានន័យថាភាគីនីមួយៗ (អ្នកផ្ទេរ និង អ្នកទទួលផល) ត្រូវទទួលខុសត្រូវលើថ្លៃសេវាផ្ទេរប្រាក់ដែលកំណត់ដោយធនាគាររបស់ភាគីនីមួយៗ រៀងខ្លួន។
ដើម្បីបំពេញ និង បញ្ចប់ការផ្ទេរប្រាក់ឱ្យបានត្រឹមត្រូវ ធនាគារអាចធ្វើការជ្រើសរើសធនាគារអន្តរការីដោយខ្លួនឯង។ ធនាគារអន្តរការីអាចនឹងគិតកម្រៃ ដែលកម្រៃនោះនឹងត្រូវដកចេញពីប្រាក់ផ្ទេរ ឬទូទាត់ដោយធនាគារយើងខ្ញុំ ។ ប្រសិនបើធនាគារអន្តរការីយកកម្រៃពីធនាគារយើងខ្ញុំ នោះធនាគារយើងខ្ញុំនឹងដកកម្រៃនោះ ពីគណនីអ្នកផ្ទេរវិញ។
ធនាគារមិនទទួលខុសត្រូវលើពន្ធនានា, កាតព្វកិច្ច និងការចំណាយផ្សេងៗដែលនឹងអាចកើតមាននៅប្រទេសដទៃពាក់ព័ន្ធនឹងការផ្ទេរប្រាក់នេះទេ។
សម្រាប់ប្រទេសមួយចំនួន លេខ IBAN គឺជាតម្រូវការចាំបាច់។ សូមត្រួតពិនិត្យជាមួយអ្នកទទួលជាមុនសិនមុននឹងអ្នកធ្វើការផ្ទេរប្រាក់។សូមមើលគេហទំព័រនេះសម្រាប់ព័ត៌មានលម្អិតបន្ថែម www.iban.com/structure
ការផ្ទេរប្រាក់នៅតាមសាខាធនាគារផ្ទាល់ អាចផ្ទេរទៅកាន់ប្រទេសមួយចំនួន ដែលមិនអនុញ្ញាតឱ្យធ្វើឡើងនៅតាម កម្មវិធី ABA Mobile និង I Banking ។

ដើម្បីធ្វើឲ្យបទពិសោធសេវាធនាគាររបស់អ្នកជាមួយយើងខ្ញុំកាន់តែមានភាពងាយស្រួល និងប្រសិទ្ធភាព សូមធ្វើការផ្ទេរប្រាក់ទៅក្រៅប្រទេស ដោយប្រើកម្មវិធី ABA Mobile! ដើម្បីដឹងបន្ថែម សូមចុចលើគេហទំព័រនេះ www.ababank.com/aba-mobile-app/transfers/aba-swift-mobile-transfers/

របៀបផ្ទេរប្រាក់ SWIFT តាមទូរស័ព្ទ

បើកកម្មវិធី ABA Mobile
រើសយកផ្នែកផ្ទេរប្រាក់
រើសយកផ្ទេរប្រាក់ក្រៅប្រទេសតាម SWIFT
ជ្រើសរើសគណនី
ដាក់លេខទូរស័ព្ទ
ជ្រើសរើស ផ្ទេរប្រាក់ទៅគណនីផ្ទាល់ខ្លួន ឬគណនីអ្នកផ្សេង (ប្រសិនបើជ្រើសរើស គណនីផ្ទាល់ខ្លួន នោះឈ្មោះអ្នកទទួលនឹងចាប់យកដោយស្វ័យប្រវត្តិ ហើយមិនចាំបាច់ត្រូវការឯកសារគាំទ្រទេ)
បំពេញព័ត៌មានអ្នកទទួលប្រាក់ ដូចជាឈ្មោះ អាសយដ្ឋាន និងប្រទេស
ដាក់កូដ SWIFT នៃធនាគារទទួល
បញ្ចូលលេខគណនី ឬ IBAN អ្នកទទួល (ដាក់ទាំងអស់)
ជ្រើសរើសប្រភេទរូបិយប័ណ្ណ
បញ្ចូលចំនួនទឹកប្រាក់ដែលចង់ផ្ទេរ¹
រើសជម្រើសភាគីដែលត្រូវបង់ថ្លៃសេវា មានជម្រើស 3 ដែលត្រូវជ្រើសរើស មានដូចជា SHA, OUR, ឬ BEN
សរសេរគោលបំណងនៃការផ្ទេរ យ៉ាងតិច 70តួរ
បញ្ចូលលេខកូត SWIFT របស់ធនាគារអន្តរការី (មិនដាក់ក៏បាន)
ចុច “ខ្ញុំបានអាន និងយល់ព្រមតាមលក្ខខណ្ឌ” រួចចុចពាក្យ រួចរាល់
ប្រសិនបើព័ត៌មានត្រឹមត្រូវអស់ហើយ សូមចុចប៊ូតុង ផ្ទេរ ហើយបញ្ជាក់យល់ព្រមផ្ទេរ ដោយបញ្ចូលលេខសម្ងាត់របស់អ្នកទាំង 4ខ្ទង់។

ប្រទេសមួយចំនួនខាងក្រោមនេះ មានតម្រូវការព័ត៌មានដោយឡែកៗពីគ្នា៖

ប្រទេសផ្ញើទៅ	តម្រូវការព័ត៌មានដែលអតិថិជន ABA ត្រូវបញ្ចូល
USA	Routing Number/Fedwire Number/ABA
United Kingdom	Sort code
New Zealand	BSB Number
Australia	BSB Number
Canada¹	Transit Number and Institution Number
Thailand	Branch Name
Japan	Branch Name/Branch Code
Latvia	Intermediary Bank
Vanuatu	Intermediary Bank
UAE	Purpose Code

_{¹ សម្រាប់ការផ្ទេរប្រាក់ទៅកាន់ប្រទេសកាណាដា អាសយដ្ឋានអ្នកទទួល ត្រូវមានទម្រង់ "លេខផ្លូវ/អគារ ឬអាផាតមនត៍, ឈ្មោះផ្លូវ, ទីក្រុង, លេខកូដខេត្ត, លេខកូដប្រៃសណីយ៍, ប្រទេស" ដើម្បីចៀសវាងការបដិសេធ ឬផ្អាកប្រតិបត្តិការ ដោយធនាគារទទួល។}

លក្ខខន្តិកៈផ្សេងទៀត

លោកអ្នកអាចធ្វើការផ្ទេរបាន 24ម៉ោងក្នុងមួយថ្ងៃ និង 7ថ្ងៃក្នុងមួយសប្ដាហ៍។ ពេលវេលាចប់ម៉ោង គឺម៉ោង 4ល្ងាច សម្រាប់ថ្ងៃធ្វើការធម្មតា (ចន្ទ-សុក្រ)។ ដូច្នេះ រាល់ប្រតិបត្តិការដែលអ្នកបញ្ចប់រួចរាល់ចំពេលចប់ម៉ោង នឹងត្រូវដំណើរការនៅថ្ងៃតែមួយ ប៉ុន្តែប្រតិបត្តិការដែលអ្នកធ្វើក្រោយចប់ម៉ោង នឹងត្រូវដំណើរការនៅថ្ងៃធ្វើការបន្ទាប់របស់ធនាគារ។
សេវាផ្ទេរប្រាក់ SWIFT ធ្វើប្រតិបត្តិការតាមរូបិយប័ណ្ណ GBP, EUR, THB, CNY, SGD, AUD, CAD, VND, JPY និង ដុល្លារអាមេរិក។
អតិថិជនត្រូវដំឡើងកម្មវិធី ABA Mobile ជំនាន់ចុងក្រោយបង្អស់ ដើម្បីប្រើប្រាស់សេវានេះបាន។
ដើម្បីកែ និង/ឬបញ្ឈប់ប្រតិបត្តិការ អតិថិជនត្រូវអញ្ជើញទៅសាខា ABA ដោយនាំមកជាមួយនូវ ពាក្យស្នើសុំកែប្រែ/តាមដាន/បញ្ឈប់ការផ្ទេរប្រាក់ ដែលបំពេញរួចរាល់។
ដើម្បីជម្រាបអំពីលក្ខខណ្ឌពេញលេញនៃសេវានេះ ចុចទីនេះ។

ដោនឡូតកម្មវិធី

សូមចុចរូប Store ខាងក្រោម ដើម្បីដោនឡូតយកកម្មវិធី ABA Mobile ពី Apple Store ឬ Google Play Store ឬ Huawei AppGallery ។ បន្ទាប់ពីដោនឡូតរួចហើយ គ្រាន់តែអនុវត្តតាមការណែនាំជាការស្រេច!