ខ និងលក្ខខណ្ឌ អ្នកផ្ញើ
សូមអានខ និងលក្ខខណ្ឌទាំងនេះដោយប្រុងប្រយ័ត្ន។ ខ និងលក្ខខណ្ឌទាំងនេះ គឺជាកិច្ចព្រមព្រៀងរវាងអ្នក (“អ្នកផ្ញើ”) និងធនាគារវឌ្ឍនៈ អាស៊ីចំកាត់ (“ធនាគារ”) អំពីសេវាផ្ទេរប្រាក់ MoneyGram (“សេវាកម្ម”)។
កិច្ចព្រមព្រៀងនេះ និងសេវាកម្មនេះអនុញ្ញាតឲ្យអ្នកផ្ញើ ធ្វើការផ្ញើប្រាក់ (“ការផ្ទេរប្រាក់”) ទៅកាន់បុគ្គលម្នាក់ (“អ្នកទទួល“) នៅតាមទីតាំង MoneyGram ណាមួយដែលមានវត្តមានជុំវិញពិភពលោក និងអនុញ្ញាតឲ្យអ្នកទទួល (i) ទទួលសាច់ប្រាក់នៅតាមទីតាំងសេវាផ្ទេរប្រាក់ MoneyGram (សេវាកម្ម“ទទួលសាច់ប្រាក់”) ឬក៏ប្រសិនបើមាន (ii) ទទួលប្រាក់ចូលក្នុងគណនីធនាគាររបស់អ្នកទទួល (សេវា“ដាក់ប្រាក់ចូលគណនីធនាគារ”)។
- អ្នកផ្ញើបញ្ជាក់ថា ព័ត៌មានដែលផ្តល់ជូន ជាព័ត៌មានពិត និងត្រឹមត្រូវ ហើយធនាគារនឹងមិនទទួលខុសត្រូវចំពោះការពន្យារពេល, ការអាក់ដំណើរការ, និងការលុបចោលណាមួយបណ្តាលមកពីការផ្ដល់ព័ត៌មានមិនត្រឹមត្រូវ និង/ឬមិនច្បាស់លាស់របស់អ្នកផ្ញើឡើយ។
- អ្នកផ្ញើធានាថា ឈ្មោះបើកចូល(username), លេខសម្ងាត់ (PIN), ពាក្យសម្ងាត់របស់ខ្លួន និងព័ត៌មានបញ្ជាក់អត្តសញ្ញាណផ្សេងៗទាំងអស់ដែលចាំបាច់សម្រាប់ប្រើប្រាស់កម្មវិធីទូរស័ព្ទរបស់ធនាគារ ABA មិនត្រូវបានបង្ហាញ ឬប្រាប់ដល់ភាគីទីបីឡើយ។
- អ្នកផ្ញើបញ្ជាក់ថា ខ្លួនកំពុងតែប្រើប្រាស់កម្មវិធីទូរស័ព្ទសម្រាប់តែប្រតិបត្តិការផ្ទាល់ខ្លួនប៉ុណ្ណោះ ហើយមិនធ្វើប្រតិបត្តិការណាមួយជំនួសឲ្យភាគីទីបីឡើយ។
- អ្នកផ្ញើអនុញ្ញាតឲ្យធនាគារពន្យារពេល, ព្យួរ, ឬបញ្ឈប់ការផ្ទេរប្រាក់នេះ ប្រសិនបើធនាគាររកឃើញថា ការផ្ទេរប្រាក់នេះអាចពាក់ព័ន្ធនឹងសកម្មភាពខុសច្បាប់ និង/ឬរំលោភបំពានច្បាប់ ឬបទប្បញ្ញត្តិជាតិ ឬអន្តរជាតិណាមួយ។
- អ្នកផ្ញើធានាថា ការផ្ទេរប្រាក់នេះមិនពាក់ព័ន្ធនឹងសកម្មភាពខុសច្បាប់ណាមួយ និង/ឬការសម្អាតប្រាក់ និង/ឬហិរញ្ញប្បទានភេរវកម្មឡើយ។ ធនាគារមានសិទ្ធិបដិសេធ ឬពន្យារពេលប្រតិបត្តិការណាមួយរបស់អ្នកទទួល ប្រសិនបើចាំបាច់ ដើម្បីអនុវត្តវិធានប្រឆាំងការសម្អាតប្រាក់/ស្គាល់អតិថិជន។
- អ្នកផ្ញើធានាថាផ្តល់ព័ត៌មានបន្ថែម និង/ឬឯកសារពាក់ព័ន្ធនឹងការផ្ទេរប្រាក់នេះ ប្រសិនបើធនាគារស្នើសុំនោះ។
- អ្នកផ្ញើអនុញ្ញាតឲ្យធនាគារដកប្រាក់ពីគណនីរបស់ខ្លួនសម្រាប់ចំនួនទឹកប្រាក់ផ្ទេរ និងចំនួនទឹកប្រាក់សម្រាប់ទូទាត់ថ្លៃសេវាផ្សេងៗពាក់ព័ន្ធនឹងការផ្ទេរ។
- អ្នកផ្ញើបានយល់ និងបញ្ជាក់ថា ថ្លៃសេវា និងអត្រាប្តូរប្រាក់ នឹងត្រូវផ្ដល់ដោយសេវាផ្ទេរប្រាក់ MoneyGram ហើយ អត្រាប្តូរប្រាក់ស្តង់ដាររបស់សេវាផ្ទេរប្រាក់ MoneyGram នឹងត្រូវអនុវត្តដើម្បីដំណើរការការផ្ទេរប្រាក់ជារូបិយប័ណ្ណបរទេស។
- ប្រសិនបើប្រាក់ផ្ទេរមិនត្រូវបានទទួលក្នុងរយៈពេល 45 ថ្ងៃ MoneyGram អាចគណនាឡើងវិញនូវចំនួនទឹកប្រាក់ដែលបានប្តូរនៅពេលទទួលប្រាក់នោះ ដោយប្រើអត្រាប្តូរប្រាក់ជាក់ស្ដែងនៅថ្ងៃទទួល។ ក្នុងករណីនេះ ចំនួនទឹកប្រាក់ជាដុល្លារអាមេរិក អាចនឹងខុសពីចំនួនដែលបានផ្ញើ។
- ការផ្ទេរប្រាក់នឹងត្រូវធ្វើឡើងសម្រាប់តែគោលបំណងផ្ទាល់ខ្លួន ឬលក្ខណៈបុគ្គលប៉ុណ្ណោះ ហើយមិនមានប្រតិបត្តិការលក្ខណៈពាណិជ្ជកម្មណាមួយត្រូវបានអនុញ្ញាតឡើយ។ សេវាផ្ទេរប្រាក់ MoneyGram ឬធនាគារ មិនទទួលខុសត្រូវចំពោះការបាត់បង់ណាមួយបណ្តាលមកពីការផ្ទេរប្រាក់សម្រាប់គោលបំណងវិនិយោគ ឬអាជីវកម្ម ឬសម្រាប់ការទិញទំនិញ ឬសេវាកម្មនានាឡើយ។
- សេវាកម្មនេះ មិនអាចត្រូវបានប្រើប្រាស់ជំនួសភាគីទីបី ឬល្បែងស៊ីសង និងសកម្មភាពខុសច្បាស់ណាមួយឡើយ។ អ្នកផ្ញើបានយល់ និងបញ្ជាក់ថា ប្រសិនបើខ្លួនធ្វើការផ្ទេរប្រាក់ទៅឲ្យបុគ្គលណាម្នាក់ដែលឆបោកខ្លួន ឬអ្នកដែលមិនបានបំពេញតាមកាតព្វកិច្ច នោះធនាគារ និង MoneyGram នឹងមិនទទួលខុសត្រូវឡើយ។
- ធនាគារអាចផ្លាស់ប្តូរលក្ខខណ្ឌទាំងនេះពីមួយពេលទៅមួយពេលដោយមាន ឬមិនមានការជូនដំណឹងជាមុន។
- ធនាគារអាចបង្ហាញនូវព័ត៌មានអំពីការផ្ទេរប្រាក់នេះដល់ភាគីទីបីដោយអនុលោមតាមបទប្បញ្ញត្តិរបស់ព្រះរាជាណាចក្រកម្ពុជា រួមមានប៉ុន្តែមិនកម្រិតចំពោះ ការសម្រេចចិត្តរបស់តុលាការ, ការស៊ើបអង្កេត, និងបទប្បញ្ញត្តិនានា។ អ្នកផ្ញើក៏បានយល់ និងឯកភាពផងដែរថា ព័ត៌មានអំពីការផ្ទេរប្រាក់របស់ខ្លួន ត្រូវតែមាន ដើម្បីផ្ដល់ជូនសេវាផ្ទេរប្រាក់ MoneyGram ហើយថា ព័ត៌មាននេះអាចត្រូវបង្ហាញដល់ភាគីទីបី ដោយអនុលោមតាមបទប្បញ្ញត្តិនានា និងបទប្បញ្ញត្តិរបស់ប្រទេសដែលប្រតិបត្តិការសេវាផ្ទេរប្រាក់ MoneyGram។
- ធនាគារមិនទទួលខុសត្រូវចំពោះពន្ធអាករ និងចំណាយផ្សេងៗដែលអាចកើតមាននៅក្នុងប្រទេសផ្សេងៗពាក់ព័ន្ធនឹងការផ្ទេរប្រាក់នេះឡើយ។
- សេវាផ្ទេរប្រាក់ MoneyGram ឬធនាគារ នឹងមិនទទួលខុសត្រូវណាមួយឡើយ សម្រាប់ការយឺតយ៉ាវ ឬការមិនប្រគល់ប្រាក់ ដោយសារតែកំហុស ឬការពន្យារពេលណាមួយដែលកើតឡើងដោយសារការបញ្ជូនសារអេឡិកត្រូនិក, ការខូចឧបករណ៍, ឬប្រព័ន្ធ កូដកម្មដែលហួសពីការគ្រប់គ្រងរបស់សេវាផ្ទេរប្រាក់ MoneyGram ឬធនាគារ ឬព័ត៌មានមិនត្រឹមត្រូវ ឬមិនច្បាស់លាស់ណាមួយដែលផ្តល់ដោយអ្នកផ្ញើ ឬអ្នកទទួល ។
- ធនាគារ និងសេវាផ្ទេរប្រាក់ MoneyGram អាចដាក់កម្រិតមួយចំនួន ដូចជា កម្រិតក្នុងមួយប្រតិបត្តិការ, ក្នុងមួយខែ, ឬសម្រាប់អតិថិជនម្នាក់ ជាដើម។ ការដាក់កម្រិតទាំងនេះអាចផ្លាស់ប្តូរពីមួយពេលទៅមួយពេលដោយមាន ឬមិនមានការជូនដំណឹងជាមុន។
- សេវាផ្ទេរប្រាក់ MoneyGram អាចបដិសេធមិនផ្ញើប្រាក់ ឬមិនអនុញ្ញាតឲ្យទទួលយកប្រាក់ ប្រសិនបើពួកគេជឿជាក់ដោយសមហេតុផលថា៖ (ក) តាមរយៈការធ្វើដូច្នេះ ពួកគេអាចរំលោភបំពានច្បាប់, បទប្បញ្ញត្តិ, ក្រម ឬកាតព្វកិច្ចផ្សេងៗដែលអនុវត្តចំពោះពួកគេ (ខ) ការធ្វើដូច្នេះអាចធ្វើឲ្យពួកគេទទួលរងនូវវិធានការពីរដ្ឋាភិបាល ឬនិយតករ ឬ (គ) ការផ្ទេរប្រាក់នេះអាចពាក់ព័ន្ធនឹងសកម្មភាពក្លែងបន្លំ ឬសកម្មភាពខុសច្បាប់។
- ក្នុងករណីមានការកែប្រែ ឬការបញ្ឈប់ប្រតិបត្តិការ អ្នកផ្ញើនឹងមិនឲ្យធនាគារទទួលខុសត្រូវចំពោះការទាមទារ, បណ្តឹង, នីតិវិធី, ការទទួលខុសត្រូវ, ការអះអាង, ការខូចខាត, ការបាត់បង់, ថ្លៃទូទាត់, និងចំណាយណាមួយពាក់ព័ន្ធនឹងការកែប្រែ ឬការបញ្ឈប់នោះឡើយ។ ប្រតិបត្តិការអាចត្រូវបានបញ្ឈប់ មុនពេលអ្នកទទួល ធ្វើការដកប្រាក់ ឬទទួលប្រាក់នោះ និងអាស្រ័យលើការយល់ព្រមពី MoneyGram។
- អ្នកផ្ញើបានយល់ និងឯកភាពថា ថ្លៃសេវាមួយចំនួននឹងមិនអាចបង្វិលសងវិញបានឡើយ។ អ្នកផ្ញើក៏បានយល់ផងដែរថា សម្រាប់សេវាដាក់ប្រាក់ចូលគណនីធនាគារ អ្នកទទួលអាចនឹងទូទាត់ថ្លៃសេវា និងបន្ទុកដោយខ្លួនឯង ដែលមិនស្ថិតក្រោមការគ្រប់គ្រងរបស់ MoneyGram ឬធនាគារឡើយ។
- ធនាគារនឹងប្រគល់ប្រាក់ផ្ទេរ ទៅឲ្យអ្នកផ្ញើវិញ បន្ទាប់ពីទទួលបានប្រាក់នោះពីសេវាផ្ទេរប្រាក់ MoneyGram ប៉ុណ្ណោះ។ អ្នកផ្ញើបានយល់ និងឯកភាពថា ធនាគារអាចនឹងគិតថ្លៃសេវារបស់ខ្លួន ហើយអត្រាប្តូរប្រាក់ដែលបានអនុវត្តរួចនៅពេលផ្ញើ អាចនឹងត្រូវផ្លាស់ប្តូរ ដែលធ្វើឲ្យប្រាក់ទទួលបានមកវិញ នឹងមានចំនួនតិចជាងចំនួនដែលបានផ្ញើ។
- នៅពេលដំណើរការផ្ទេរប្រាក់ត្រូវបានបំពេញរួចរាល់ អ្នកផ្ញើត្រូវតែផ្តល់លេខយោងសេវាផ្ទេរប្រាក់ MoneyGram (លេខសម្ងាត់ PIN) ទៅឲ្យអ្នកទទួល។ អ្នកផ្ញើត្រូវតែប្រុងប្រយ័ត្នក្នុងការផ្ញើលេខយោង MoneyGram និងត្រូវតែទទួលខុសត្រូវចំពោះការរក្សាការសម្ងាត់លេខយោងនោះ ដោយមិនត្រូវបង្ហាញដល់ភាគីទីបីណាមួយឡើយ។ ធនាគារមិនទទួលខុសត្រូវចំពោះការបាត់បង់ណាមួយដែលបណ្តាលមកពីការប្រើប្រាស់មិនត្រឹមត្រូវ ឬ ការបង្ហាញលេខយោងសេវាផ្ទេរប្រាក់ MoneyGram ឬព័ត៌មានប្រតិបត្តិការដែលត្រូវបានអ្នកផ្ញើ ឬអ្នកទទួលធ្វើឲ្យលេចធ្លាយដល់ភាគីទីបី។
សំខាន់ – ប្រយ័ត្នករណីឆបោកពាក់ព័ន្ធការផ្ទេរប្រាក់របស់អ្នក
សូមរក្សាសុវត្ថិភាពថវិការបស់អ្នក។ ប្រសិនមានពាក់ព័ន្ធករណីខាងក្រោម សូមកុំផ្ញើប្រាក់របស់អ្នក។វាជាអំពើឆបោក ហើយបុគ្គលណាម្នាក់ កំពុងព្យាយាមលួចប្រាក់របស់អ្នក។
ប្រសិនបើអ្នកផ្ញើប្រាក់ អ្នកទទួលនឹងអាចបើកភ្លាមៗ ហើយអ្នកអាចនឹងមិនមានលទ្ធភាពក្នុងការយកប្រាក់នោះត្រលប់មកវិញឡើយ។
#1 កុំផ្ញើប្រាក់ទៅមនុស្សមិនស្គាល់ ឬចម្លែក។ ត្រូវស្គាល់បុគ្គលដែលអ្នកធ្វើការទាក់ទងជាមួយ។ទឹកប្រាក់ផ្ទេរ ដូចសាច់ប្រាក់ដែរ។
#2 សូមកុំផ្ទេរប្រាក់ សម្រាប់ស្ថានភាពខាងក្រោម៖
- ដើម្បីការបរិច្ចាគសប្បុរសធម៌ ឬ ដើម្បីពាណិជ្ជករតាមអ៊ីធឺណិត ឬអនឡាញ សម្រាប់ផ្គត់ផ្គង់អំឡុងពេលរីករាលដាល, គ្រោះធម្មជាតិ, ឬវិបត្តិផ្សេងៗ
- ដើម្បីទទួលប្រាក់ (ឧទាហរណ៍ ការឈ្នះឆ្នោតផ្សងសំណាង, រង្វាន់, ការផ្ដល់ការងារ ឬកម្ចី)
- ដើម្បីបង់ពន្ធជូនអាជ្ញាធររដ្ឋាភិបាល ឬប៉ូលីស
- ដើម្បីទិញរថយន្ត, សត្វចិញ្ចឹម, វត្ថុឯកវន្ត ឬមានតម្លៃថ្លៃ, ឬកក់ថ្លៃអាផាតមិនត៍
#3 កុំផ្ញើប្រាក់ ដោយមិនបានស្រាវជ្រាវ ឬសិក្សាពីការពិត។ សូមទាក់ទង់ទៅមិត្តភក្តិ ឬសមាជិកគ្រួសាររបស់បុគ្គលដែលកំពុងត្រូវការជំនួយជាមុនសិន។
#4 សាច់រឿងដូចល្អពេក ស្រួលពេក ហួសពីការពិត វាអាចជាទង្វើឆបោក។
#5 សូមកុំប្រគល់លេខយោងប្រតិបត្តិការ ឬលេខដកប្រាក់ទៅដល់បុគ្គលផ្សេង ក្រៅពីបុគ្គលដែលត្រូវទទួលប្រាក់។ អ្នកលក់ និងអ្នកទីផ្សារតាមទូរគមនាគមន៍ មិនអាចដកប្រាក់ផ្ទេរពីអតិថិជននៅសហរដ្ឋអាមេរិក សម្រាប់ទំនិញ ឬអ្វីដែលពួកគេលក់នៅតាមទីផ្សារទូរគមនាគមន៍ឡើយ។
ប្រសិនបើអ្នកចាញ់ល្បិចជនឆបោកតាម MoneyGram សូមធ្វើការទាក់ទងទៅ MoneyGram តាមរយៈលេខ +1 720 362 5024 ឬ 1800209536 ឬចូលទៅកាន់ www.moneygram.com ដើម្បីរាយការណ៍អំពីករណីឆបោក។