គាំទ្រសហគ្រិនវ័យក្មេង និងសហគ្រាសធុនតូច និងមធ្យមនៅកម្ពុជា តាមរយៈកម្មវិធី លទ្ធភាពទទួលបានហិរញ្ញប្បទាន
10/Apr/2023
ធនាគារ ABA មានមោទនភាពដែលបានក្លាយជាអ្នកឧបត្ថម្ភធំ (Diamond) នៅក្នុងកម្មវិធី លទ្ធភាពទទួលបានហិរញ្ញប្បទាន 2023 (AFP) ដើម្បីលើកកម្ពស់ចំណេះដឹងផ្នែកហិរញ្ញវត្ថុ និងបរិយាបន្នហិរញ្ញវត្ថុដល់សហគ្រិនវ័យក្មេង និងសហគ្រាសធុនតូច និងមធ្យមនៅកម្ពុជា តាមរយៈកម្មវិធីបណ្តុះបណ្តាល និងការសម្របសម្រួលកម្មវិធីកម្ចី។
កម្មវិធីនេះត្រូវបានរៀបចំឡើងដោយសមាគមសហគ្រិនវ័យក្មេងកម្ពុជា (YEAC) ដែលជាអង្គការមិនរកប្រាក់ចំណេញ ដែលគាំទ្រដល់ការអភិវឌ្ឍន៍សហគ្រិនវ័យក្មេង និងសហគ្រាសធុនតូច និងមធ្យមនៅកម្ពុជា ដោយសហការជាមួយសមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា ( CMA)។
ដើម្បីចាប់ផ្តើមកម្មវិធី សមាគមសហគ្រិនវ័យក្មេងកម្ពុជា បានរៀបចំការប្រមូលផ្តុំ CEO លើកដំបូងក្រោមប្រធានបទ “លទ្ធភាពទទួលបានហិរញ្ញប្បទាន៖ ការត្រៀមខ្លួនសម្រាប់ទីផ្សារភាគហ៊ុន ហិរញ្ញប្បទានមូលធន និងហិរញ្ញប្បទានធនាគារ/បំណុល” ដើម្បីចែករំលែកការអភិវឌ្ឍន៍ថ្មីៗនៃគោលនយោបាយ កម្មវិធី និងព័ត៌មានអំពីប្រព័ន្ធអេកូឡូស៊ីសហគ្រិននៅកម្ពុជា។
ព្រឹត្តិការណ៍នេះត្រូវបានចូលរួមដោយគណៈប្រតិភូធនាគារជាតិនៃកម្ពុជា (NBC) សហគ្រាសខ្មែរ (KE) សមាគមសហគ្រិនវ័យក្មេងកម្ពុជា (YEAC) និងភ្ញៀវកិត្តិយសជាច្រើនរូបទៀត ដែលបានធ្វើឡើងនៅថ្ងៃទី៣១ ខែមីនា ឆ្នាំ២០២៣។
ដើម្បីគាំទ្រដល់ព្រឹត្តិការណ៍នេះ នាយកឥណទានអាជីវកម្មខ្នាតតូច នៅធនាគារ ABA លោក សរ ច័ន្ទរិទ្ធ បានចូលរួមនៅក្នុងក្រុមពិភាក្សាដើម្បីចែករំលែកជំនាញវិជ្ជាជីវៈស្តីពី "ការរៀបចំសម្រាប់ហិរញ្ញប្បទានបំណុល"។
លោក សរ ចន្ទរិទ្ធ មានប្រសាសន៍ថា “ធនាគារ ABA មានកិត្តិយសដែលបានចូលរួមឧបត្ថម្ភកម្មវិធីនេះ និងមានឱកាសចែករំលែកជំនាញវិជ្ជាជីវៈរបស់ធនាគារលើការផ្តល់ហិរញ្ញប្បទានបំណុល និងជួយផ្តល់ចំណេះដឹងដល់ម្ចាស់អាជីវកម្មខ្នាតតូច និងខ្នាតតូចនូវចំណេះដឹង និងវិធីសាស្ត្រក្នុងការជោគជ័យដល់ពួកគេ។”
លោកបានបន្ថែមថា “នៅធនាគារ ABA យើងប្តេជ្ញាគាំទ្រដល់កំណើន និងការអភិវឌ្ឍន៍អាជីវកម្មខ្នាតតូចនៅកម្ពុជា ហើយមានសេចក្តីសោមនស្សរីករាយដែលបានក្លាយជាផ្នែកមួយនៃគំនិតផ្តួចផ្តើមដ៏អស្ចារ្យនេះ” ។
