សូមការពារខ្លួនអ្នកពីការឆបោកតាមកូដ QR
19/May/2023
អតិថិជនជាទីគោរព!
យើងខ្ញុំបានដឹងអំពីសកម្មភាពបន្លំ និងឆបោក ពាក់ព័ន្ធនឹងកូដ QR នៅតាមហាង ដោយជនឆបោកបានព្រីន កូដ QR ផ្ទាល់ខ្លួនរបស់គេ ហើយយកទៅបិទពីលើកូដ QR របស់ម្ចាស់ហាង។ ជាលទ្ធផល នៅពេលដែលអតិថិជនស្គែនកូដនោះដើម្បីបង់ប្រាក់ ទឹកប្រាក់ដែលផ្ទេរនឹងចូលគណនីរបស់ជនឆបោកនោះ។
ដើម្បីធានានូវសុវត្ថិភាពទាំងអ្នកបង់ប្រាក់ និងអ្នកទទួលប្រាក់ យើងខ្ញុំសូមណែនាំនូវគោលការណ៍សំខាន់ៗ ដែលលោកអ្នកអាចអនុវត្តបាន ពេលទូទាត់តាមកូដ QR ម្តងៗ៖
សម្រាប់អ្នកបង់ប្រាក់/អតិថិជន៖
- សូមត្រួតពិនិត្យអត្តសញ្ញាណរបស់ម្ចាស់គណនីទទួល ដោយមើលឈ្មោះ និងលេខគណនីរបស់គាត់ឲ្យបានច្បាស់លាស់សិន មុននឹងធ្វើប្រតិបត្តិការណាមួយបន្តទៀត។
- ផ្ទៀងផ្ទាត់ឡើងវិញ នូវឈ្មោះអ្នកទទួលប្រាក់ពីលោកអ្នក ដែលបង្ហាញនៅលើអេក្រង់អេប ABA Mobile មុននឹងធ្វើប្រតិបត្តិការណាមួយ។
- បន្ទាប់ពីបញ្ចប់ប្រតិបត្តិការដោយជោគជ័យរួច សូមប្រាប់ឲ្យអ្នកលក់/អាជីវករ ពិនិត្យគណនីរបស់ពួកគាត់ ឬពិនិត្យសារជូនដំណឹង ដើម្បីប្រាកដថា អ្នកលក់ពិតជាបានទទួលប្រាក់ប្រាកដមែន។
សម្រាប់អ្នកទទួលប្រាក់/ពាណិជ្ជករ៖
- សូមត្រួតពិនិត្យជាប់ជានិច្ចថា ទឹកប្រាក់ពិតជាបានចូលគណនីរបស់អ្នក ដោយពិនិត្យមើលរបាយការណ៍គណនី និង/ឬសារជូនដំណឹងបញ្ជាក់ពីការទទួលប្រាក់។
- ប្រើប្រាស់ មុខងារផ្តល់សារជូនដំណឹងតាម គ្រុប Telegram ពីយើងខ្ញុំ។ តាមរយៈការភ្ជាប់សារបញ្ជាក់ការទូទាត់ប្រាក់ទៅក្នុងគ្រុប Telegram លោកអ្នកនឹងទទួលបានសារបញ្ជាក់ភ្លាមៗ រាល់ពេលអតិថិជនបង់ប្រាក់ ឬទូទាត់រួច។ មុខងារនេះ នឹងអនុញ្ញាតឲ្យលោកអ្នក ក៏ដូចជាសមាជិកគ្រុប និងបុគ្គលិក តាមដានរាល់ប្រតិបត្តិការទាំងអស់រួមគ្នា។ សូមមើលពីរបៀបភ្ជាប់សារបញ្ជាក់ការទូទាត់ក្នុងគ្រុប Telegram ទីនេះ។
វាពិតជាសំខាន់ណាស់ ដែលភាគីទាំងពីរ បង្កើនការប្រុងប្រយ័ត្នខ្ពស់បំផុត និងអនុវត្តនូវវិធានការចាំបាច់ ដើម្បីការពារខ្លួន កុំឲ្យក្លាយជាជនរងគ្រោះ នៃសកម្មភាពឆបាកទាំងនោះ។
នៅធនាគារ ABA យើងខ្ញុំប្ដេជ្ញាការពារអតិថិជនរបស់យើងជានិច្ច និងសូមលើកទឹកចិត្តដល់លោកអ្នក ឲ្យបន្ដចែកចាយព័ត៌មាននេះ ទៅកាន់ក្រុមគ្រួសារ និងមិត្តភក្ដិ ដើម្បីជួយការពារពួកគាត់ពីការឆបោកទាំងនោះ។
ប្រសិនបើលោកអ្នកមានចម្ងល់ផ្សេងៗ សូមទាក់ទងមកយើងខ្ញុំតាមរយៈអ៊ីម៉េល info@ ឬទូរស័ព្ទមកលេខ 1 800 203 203 (ដោយឥតគិតថ្លៃ នៅក្នុងប្រទេសកម្ពុជា)។ ababank.com
សូមអរគុណ សម្រាប់ការប្រើប្រាស់សេវាធនាគារយើងខ្ញុំ!