លើកកម្ពស់យុវជនតាមរយៈប្រវត្តិសាស្ត្រ: ធនាគារ ABA ឧបត្ថម្ភដល់ដំណើរទស្សនកិច្ចសិស្សានុសិស្សទៅកាន់សារមន្ទីរ ស.ស.រ.
30/Jun/2025
ដើម្បីពង្រឹងចំណេះដឹងផ្នែកហិរញ្ញវត្ថុក្នុងចំណោមសិស្សានុសិស្សកម្ពុជា ធនាគារ ABA មានសេចក្តីសោមន្សក្នុងការរួមចំណែកថវិការចំនួន 5,000 ដុល្លារអាមេរិក ជូនសារមន្ទីរ ព្រះស្រីឦសានវរ្ម័ន (ស.ស.រ.) ក្នុងឆ្នាំ 2025។ នេះជាឆ្នាំទីពីរ ដែលធនាគារ ABA បានចូលរួមគាំទ្រ ”កម្មវិធី បណ្តុះបណ្តាលចំណេះដឹងវិស័យធនាគារ និងសេដ្ឋកិច្ច” រៀបចំដោយសមាគមធនាគារនៅកម្ពុជា (ABC)។
ជាផ្នែកមួយនៃគំនិតផ្តួចផ្តើមនេះ សារមន្ទីរ ស.ស.រ. និងសមាគម ABC នឹងសហការគ្នាក្នុងការសម្របសម្រួលដំណើរទស្សនកិច្ច ឥតគិតថ្លៃ សម្រាប់សិស្សានុសិស្សទូទាំងប្រទេសកម្ពុជា ផ្តល់ឱកាសដល់ពួកគេស្វែងយល់ប្រវត្តិសាស្ត្រសេដ្ឋកិច្ចកម្ពុជាដ៏សម្បូរបែប ដែលមានអាយុកាលជាង 2,000 ឆ្នាំ ឆ្លុះបញ្ចាំងតាមរយៈការតាំងពិព័រណ៍អចិន្ត្រៃយ៍ និងមិនអចិន្ត្រៃយ៍ វត្ថុបុរាណរូបិយវត្ថុ និងទីតាំងអន្តរកម្មដ៏ទំនើប។
នៅថ្ងៃទី26 ខែមិថុនា ឆ្នាំ 2025 ពីធីប្រគល់លិខិតថ្លែងអំណរគុណ បានធ្វើឡើងគួបផ្សំជាមួយនឹងដំណើរទស្សនកិច្ចរបស់សិស្សានុសិស្សវិទ្យាល័យ ចំនួនប្រមាណ 100 នាក់ ពីខេត្តកំពង់ចាម ក្នុងគោលបំណងបង្កើនការយល់ដឹងរបស់ពួកគេ ឲ្យកាន់តែស៊ីជម្រៅទៅលើហេដ្ឋារចនាសម្ព័ន្ធហិរញ្ញវត្ថុ ការអភិវឌ្ឍរូបិយវត្ថុ និងដំណើរវិវត្តនៃរូបិយប័ណ្ណរបស់ប្រទេសកម្ពុជា។
លោក Igor Zimarev អគ្គនាយករងប្រតិបត្តិ និងជានាយកទីផ្សារ កិច្ចការ CSR នៃធនាគារ ABA មានប្រសាសន៍ថា “គំនិតផ្តួចផ្តើមនេះ ដើរតួជាឱកាសយ៉ាងសំខាន់ក្នុងការផ្សាភ្ជាប់ហិរញ្ញវត្ដុ ប្រវត្តិសាស្ត្រ និងការអប់រំ បន្ថែមពីការសិក្សាទូទៅក្នុងថ្នាក់រៀន។ យើងខ្ញុំ ពីធនាគារ ABA មានកិត្តិយស ដែលបានរួមចំណែកក្នុងការបង្កើនបទពិសោធន៍អប់រំនេះ ដល់សិស្សានុសិស្សទូទាំងប្រទេស”។
ស្របទៅនឹងគោលការណ៍ទំនួលខុសត្រូវសង្គមរបស់យើងខ្ញុំ ABA នៅតែប្តេជ្ញាចិត្តគាំទ្រគំនិតផ្តួចផ្តើមដែលលើកកម្ពស់ចំណេះដឹងផ្នែកហិរញ្ញវត្ថុ និងវិស័យអប់រំ ដល់យុវជនជំនាន់ក្រោយ។ យើងខ្ញុំក៏លើកទឹកចិត្តអ្នកទាំងអស់គ្នា ទៅទស្សនា សារមន្ទីរ ស.ស.រ. និងរីករាយជាមួយបទពិសោធន៍ដ៏គួរឲ្យចាប់អារម្មណ៍នៃដំណើររូបិយវត្ថុតែមួយគត់របស់ប្រទេសកម្ពុជា។
