ABA ឈ្នះពានរង្វាន់ ធនាគារឆ្នើមនៅកម្ពុជា ឆ្នាំ 2022 ពីទស្សនាវដ្ដីហិរញ្ញវត្ថុ Euromoney
19/Jul/2022
ធនាគារ ABA ដែលជាធនាគារពាណិជ្ជកម្ពុជាលំដាប់ថ្នាក់លេខ11 ត្រូវបានប្រសិទ្ធនាមជា “ធនាគារឆ្នើមនៅ កម្ពុជា ឆ្នាំ 2022” ពី Euromoney ដែលជាទស្សនាវដ្តីហិរញ្ញវត្ថុដ៏ល្បីមួយរបស់ពិភពលោក។ ពិធីប្រគល់ ពានរង្វាន់ជូនម្ចាស់ជ័យលាភីបានប្រព្រឹត្តទៅនៅទីក្រុងឡុងដ៏ (ប្រទេសអង់គ្លេស) ដែលប្រមូលផ្ដុំដោយ ធនាគារកំពូលៗមកពីជុំវិញសកលលោក។
ពានរង្វាន់នេះ បានសបញ្ជាក់ពីជំហររបស់ ABA ក្នុងនាមជាធនាគារឈានមុខគេ និងជាអ្នកផ្គត់ផ្គង់សេវា ធនាគាររូបវន្ដបុគ្គលដ៏ធំបំផុតនៅកម្ពុជា។ Euromoney បានសាទរ ABA ចំពោះដំណោះស្រាយសេវាធនាគារ ប្រកបដោយនវានុវត្តរបស់ខ្លួន ការពង្រីកសក្ដានុពលយ៉ាងរឹងមាំ និងកំណើនដ៏គួរឲ្យកត់សម្គាល់។ សេចក្ដីសម្រេចរបស់គណៈវិនិច្ឆ័យ ក៏ផ្អែកទៅលើការអភិវឌ្ឍ និងការពង្រឹងសមត្ថភាពសំខាន់ៗនៃ ផ្លែតហ្វមឌីជីថលរបស់ធនាគារផងដែរ រួមមាន៖
- ការដាក់ដំណើរការនៃប្រព័ន្ធទូទាត់ប្រាក់ជាមួយបាគង ដែលអតិថិជន ABA អាចទទួលប្រាក់ផ្ទេរ និងប្រាក់ទូទាត់បានពីអតិថិជនធនាគារផ្សេងដែលស្ថិតនៅក្នុងប្រព័ន្ធទូទាត់បាគងរបស់ ធនាគារជាតិនៃកម្ពុជា;
- ការដាក់ឲ្យប្រើប្រាស់មុខងារ ផ្ទេរប្រាក់ពីកាតទៅកាត ជាមួយ Mastercard និង UnionPay International នៅតំបន់អាស៊ីប៉ាស៊ីហ្វិក;
- ការដាក់ដំណើរការនៃកម្ចីប្រាក់បៀវត្ស ដែលជាដំណោះស្រាយកម្ចីរហ័សនៅក្នុងកម្មវិធី ABA Mobile ដើម្បីផ្តល់ហិរញ្ញប្បទានរហ័ស និងងាយស្រួលសម្រាប់ការប្រើប្រាស់ផ្ទាល់ខ្លួនដោយគ្មាន លក្ខខណ្ឌតម្រូវប្រាក់តម្កល់;
- ការដាក់ឲ្យប្រើប្រាស់ សេវាបើកកាតប្លាស្ទិកដោយខ្លួនឯងដំបូង និងតែមួយគត់ ដែលអនុញ្ញាតឲ្យ អតិថិជនស្នើកាតក្នុង ABA Mobile ហើយបើកកាតនោះពីម៉ាស៊ីនបើកកាត ABA;
- ការអាប់ដេតបន្ថែមទៅលើកម្មវិធី ABA Merchant ដែលអនុញ្ញាតឲ្យអាជីវកម្មតូចធំនានាទទួលប្រាក់ទូទាត់ និងគ្រប់គ្រងសកម្មភាពលក់ដូរប្រកបដោយភាពងាយស្រួល និងប្រសិទ្ធភាព;
- កំណើនឥតឈប់ឈរនៃបណ្ដាញស្វ័យសេវា ABA 24/7។ ជាមួយទីតាំង ABA 24/7 អតិថិជនអាចធ្វើប្រតិបត្តិការបានគ្រប់ពេលវេលា និងឥតគិតថ្លៃដូចជា ដក/ដាក់ប្រាក់, ដាក់មូលប្បទានបត្រ ក៏ដូចជាបើកកាតប្លាស្ទិកជាដើម។
មានមតិក្នុងពិធីនេះ លោក Askhat Azhikhanov នាយកប្រតិបត្តិធនាគារ ABA មានប្រសាសន៍ថា៖ “នេះជាពានរង្វាន់ ប្រាំបួនឆ្នាំជាប់ៗគ្នាពីទស្សនាវដ្ដី Euromoney ដែលបញ្ជាក់ពីជំហរឈានមុខរបស់ ABA នៅកម្ពុជា ក្នុងការនាំយកនូវផលិតផល និងសេវាកម្មហិរញ្ញវត្ថុ ប្រកបដោយនវានុវត្ត និងអត្ថប្រយោជន៍ ជូនដល់អតិថជន។ យើងខ្ញុំសូមចែករំលែកកិត្តិនាមនេះជូនដល់អតិថិជនទាំងអស់ និងសូមថ្លែងអំណរ គុណអតិថិជនចំពោះទំនុកចិត្តមកលើ ABA”។
ក្នុងនាមជាធនាគារពាណិជ្ជកម្ពុជាដ៏ធំបំផុត ABA ត្រូវបានទទួលស្គាល់ថាជាធនាគារដែលផ្ដល់នូវសេវាហិរញ្ញវត្ថុឌីជីថលល្អផ្ដាច់ ជូនដល់សហគ្រាសធុនតូច និងមធ្យម អាជីវកម្មខ្នាតមីក្រូ និងរូបវន្ដបុគ្គល។ គិតត្រឹមថ្ងៃទី 30 ខែមិថុនា ឆ្នាំ2022 ធនាគារមានទ្រព្យសកម្មសរុប 8.5 ប៊ីលានដុល្លារអាមេរិក ខណៈដែល ចំនួនសរុបនៃប្រតិបត្តិការឌីជីថលនៅលើ ABA Mobile តែមួយមានសរុបជិត 100 ប៊ីលានដុល្លារអាមេរិក។
អំពីពានរង្វាន់ឧត្តមភាព
ពានរង្វាន់ឧត្តមភាពរបស់ ទស្សនាវដ្ដី Euromoney ត្រូវបានបង្កើតឡើងនៅឆ្នាំ 1992 ហើយជានិយាមសកលសម្រាប់វិស័យធនាគារ។ ពានរង្វាន់ប្រចាំឆ្នាំទាំងនេះ គ្របដណ្ដប់លើផលិតផលសកលជាង 20 ប្រភេទ ពានរង្វាន់លំដាប់ថ្នាក់ឧត្តមប្រចាំតំបន់ និងធនាគារឆ្នើមនៅបណ្ដាប្រទេសប្រមាណ 100 ប្រទេសទូទាំងពិភពលោក។ សេចក្តីសម្រេចផ្ដល់ពានរង្វាន់របស់ទស្សនាវដ្ដី Euromoney ធ្វើឡើងដោយគណៈកម្មាធិការ អ្នកសារព័ត៌មានជាន់ខ្ពស់ ដែលដឹកនាំដោយនិពន្ធនាយករបស់ទស្សនាវដ្ដី Euromoney បន្ទាប់ពីទទួលបានការដាក់ជូនព័ត៌មានលម្អិតពីសំណាក់អ្នកចូលរួមនៃទីផ្សារនេះ បូករួមជាមួយការធ្វើការស្រាវជ្រាវមួយឆ្នាំពេញនៅក្នុងវិស័យធនាគារ និងទីផ្សារមូលធននៅក្នុងតំបន់ដោយនិពន្ធនាយក អ្នកសារព័ត៌មាន និងក្រុមស្រាវជ្រាវ។
1 ABA ជាធនាគារពាណិជ្ជកម្ពុជាដ៏ធំបំផុតគិតលើទ្រព្យសកម្ម, ប្រាក់បញ្ញើ, កម្ចីដុល, ប្រាក់បញ្ញើអតិថិជននិងប្រាក់ចំណេញ ផ្អែកលើរបាយការណ៍ត្រួតពិនិត្យប្រចាំឆ្នាំ 2021 របស់ធនាគារជាតិនៃកម្ពុជា។
