ABA ឧបត្ថម្ភកុមារឆ្នើម តំណាងឲ្យកម្ពុជាទៅប្រកួតនៅប្រទេសមីយ៉ាន់ម៉ា
18/Sep/2018
ដោយប្រកាន់ភា្ជប់ទៅតាមគោលការណ៍វិភាគទានសង្គមរបស់ខ្លួន ក្នុងការជួយលើកកម្ពស់វិស័យអប់រំសម្រាប់កុមារកម្ពុជា ធនាគារ ABA បានឧបត្ថម្ភកម្មវិធីប្រកួតប្រជែងផ្នែកគំនូរថ្នាក់ជាតិ 2018 ដែលរៀបចំដោយសាលា Global Art Cambodia (GAC)។ កម្មវិធីប្រកួតប្រជែងនេះត្រូវបានធ្វើឡើងនៅ អ៊ីអនម៉ល 2 (ខណ្ឌសែនសុខ) កាលពីថ្ងៃទី16 ខែកញ្ញា ឆ្នាំ2018 ក្នុងគោលបំណងលើកកម្ពស់សមត្ថភាពក្នុងការប្រមើលរូបភាព, ការបង្កើតអ្វីដែលថ្មី និងគំនិតច្នៃប្រឌិតរបស់កុមារ ក៏ដូចជាពង្រឹងសមត្ថភាពនៃការត្រិះរិះ និងការសិក្សារៀនសូត្ររបស់ពួកគាត់ឲ្យបានទូលំទូលាយ។ ធនាគារ ABA បានគាំទ្រកម្មវិធីប្រកួតប្រជែងនេះតាំងពីឆ្នាំ 2014 មកម្លេះ។
“យើងមានក្តីសោមនស្សរីករាយមែនទែន ដែលបានបន្តចូលរួមគាំទ្រ Global Art Competition ក្នុងការជំរុញការអភិវឌ្ឍទេពកោសល្យ និងគំនិតច្នៃប្រឌិតផ្នែកសិល្បៈរបស់ក្មេងៗជំនាន់ក្រោយ” នេះបើតាមប្រសាសន៍របស់អ្នកស្រី ធាម រមណីយ អ្នកគ្រប់គ្រងធនាគារ ABA ប្រចាំសាខាទួលគោក ដែលបានផ្តល់រង្វាន់សំបុត្រយន្តហោះទៅកាន់ប្រទេសមីយ៉ាន់ម៉ា ដល់ម្ចាស់ជ័យលាភីទាំងបីរូប។ “យើងជឿជាក់ថាព្រឹត្តិការណ៍បែបនេះ នឹងជួយបង្រៀនក្មេងៗកម្ពុជាឲ្យចេះបង្ហាញសមត្ថភាពខ្លួនឯងប្រកបដោយទំនុកចិត្ត ដើម្បីធ្វើដំណើរឆ្ពោះទៅរកជំហានថ្មីនៃជីវិតរបស់ពួកគេ។ ABA នឹងបន្តចូលរួមចំណែកគាំទ្រសកម្មភាពជាវិជ្ជាមានបែបនេះតទៅទៀត ដើម្បីជាប្រយោជន៍ដល់ក្មេងៗជំនាន់ក្រោយ និងការអភិវឌ្ឍន៍នាពេលអនាគត។”
ព្រឹត្តិការណ៍នេះបានទាក់ទាញឲ្យមានការចូលរួមពីកុមារៗជាង 200នាក់ ដែលមានអាយុចន្លោះពី 4 ដល់ 18ឆ្នាំ មកពីសាលាផ្សេងៗ។ អ្នកចូលរួមប្រកួតត្រូវបានចែកចេញជាបីក្រុម៖ ក្រុមមានអាយុពី 4ដល់6 ឆ្នាំ, 7ដល់9 ឆ្នាំ, និង 10ដល់18 ឆ្នាំ។ អ្នកឈ្នះមកពីក្រុមនីមួយៗទទួលបានរង្វាន់ដូចជា អាហារូបករណ៍រៀនឥតគិតថ្លៃ នៅសាលា Global Art ចំនួនកន្លះឆ្នាំ, សំបុត្រយន្តហោះ, ពានជ័យលាភី, បណ្ណសរសើរ, និងកញ្ចប់កាដូ ហើយក៏មានរង្វាន់លួងចិត្តសម្រាប់អ្នកជាប់លេខរៀងបន្ទាប់ៗផងដែរ។
ម្ចាស់ជ័យលាភីទាំងបីរូប មានឈ្មោះ សាង សុគន្ធនីកា, ឡាយ ពេជ្រមុនីរចនា និង បួនហ៊ីង សុចេស្តា នឹងតំណាងឲ្យប្រទេសកម្ពុជា បន្តដំណើរទៅចូលរួមការប្រកួតជាលក្ខណៈអន្តរជាតិនៅក្នុងប្រទេសមីយ៉ាន់ម៉ា នាថ្ងៃទី2 ខែធ្នូ ឆ្នាំ2018 ខាងមុខនេះ។
អំពី Global Art Cambodia
Global Art Cambodia គឺជាសាលាមានស្តង់ដារកម្រិតទីមួយក្នុងប្រទេសកម្ពុជាដែលផ្តល់កម្មវិធីបណ្តុះសិល្បៈសម្រាប់សិស្សានុសិស្ស។ យើងនៅទីនេះ ដើម្បីលើកទឹកចិត្តឲ្យក្មេងៗមានគំនិតច្នៃប្រឌិតដោយយកសិល្បៈច្របាច់បញ្ជូលក្នុងជីវិតរស់នៅ។ Global Art Cambodia មានគោលបំណងជួយដល់អ្នករៀន ឲ្យទទួលបានចំណេះដឹង ការលូតលាស់ និងការអភិវឌ្ឍន៍ប្រកបដោយភាពច្នៃប្រឌិតក្នុងបរិយាកាសជំរុញលើកទឹកចិត្តខ្ពស់បំផុត។
