ABA គាំទ្រ កម្មវិធី ចំណេះដឹងផ្នែកហិរញ្ញវត្ថុ របស់ NBC ដោយផ្ដល់សៀវភៅ ដល់សិស្សានុសិស្ស 5,000នាក់
15/Aug/2022
ABA ដែលជាធនាគារពាណិជ្ជលេខមួយនៅកម្ពុជា បានឧបត្ថម្ភថវិកា $15,000 ដល់កម្មវិធី ចំណេះដឹងផ្នែកហិរញ្ញវត្ថុ ដែលផ្ដួចផ្ដើមដោយធនាគារជាតិនៃកម្ពុជា។ ទឹកប្រាក់ឧបត្ថម្ភនេះ ត្រូវបានប្រើប្រាស់ដើម្បី បោះពុម្ពសៀវភៅកុមារ ក្រោមចំណងជើងថា “តោះ! និយាយពីលុយ” ចំនួន 5,000 ក្បាល ដែលត្រូវបានចែកជូនដល់សិស្សានុសិស្សនៅសាលាបឋមសិក្សាមុខនាគ ក្នុងខេត្តសៀមរាប កាលពីថ្ងៃទី12 ខែសីហា ឆ្នាំ2022។
កម្មវិធី ត្រូវបានប្រព្រឹត្តធ្វើឡើងក្រោមអធិបតីភាព ឯកឧត្តមបណ្ឌិត ម៉ុក សារ៉ុម អគ្គនាយករងអប់រំ តំណាងក្រសួងអប់រំ យុវជន និងកីឡា អមដោយសមាសភាពគណៈអធិបតីជាច្រើនរូបទៀត។
កម្មវិធីនេះ មានគោលដៅ បញ្ជ្រាបខ្លឹមសារចំណេះដឹងផ្នែកហិរញ្ញវត្ថុទៅក្នុងវិស័យអប់រំ ដូចជា ផែនការរៀបចំកញ្ចប់ថវិកា និងវប្បធម៌នៃការសន្សំប្រាក់ ដែលជួយឲ្យសិស្សានុសិស្សចេះត្រិះរិះពិចារណាស៊ីជម្រៅ និងដឹងថា ការទុកដាក់ប្រាក់នៅគ្រឹះស្ថានហិរញ្ញវត្ថុមានសុវត្ថិភាព និងប្រយោជន៍កម្រិតណា។
សកម្មភាពនេះ ឆ្លើយតបទៅនឹងគោលការណ៍ទំនួលខុសត្រូវសង្គម (CSR) របស់ ABA ហើយធនាគារយើងខ្ញុំ សូមគាំទ្រយ៉ាងពេញទំហឹង ចំពោះគំនិតផ្ដួចផ្ដើមរបស់ធនាគារជាតិនៃកម្ពុជា ក្នុងការផ្ដល់សិស្សានុសិស្សទូទាំងប្រទេស ជាមួយមូលដ្ឋានគ្រឹះនៃចំណេះដឹងផ្នែកហិរញ្ញវត្ថុ។
