ABA ជាប់ជាសហគ្រាសបង់ពន្ធ លើប្រាក់ចំណូលប្រចាំឆ្នាំ 2022 ច្រើនជាងគេ
24/Apr/2023
ធនាគារ ABA ដែលជាធនាគារពាណិជ្ជធំជាងគេនៅកម្ពុជា1 បានទទួលលិខិតសរសើរពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសាទរ ABA ក្នុងនាមជាសហគ្រាសបង់ពន្ធលើប្រាក់ចំណូលប្រចាំឆ្នាំ ច្រើនជាងគេ នៅឆ្នាំ 2022។ យោងតាមការអនុវត្តកាតព្វកិច្ចសារពើពន្ធរបស់កម្ពុជា សហគ្រាសប្រកបអាជីវកម្ម ត្រូវបង់ពន្ធលើប្រាក់ចំណូលត្រឹមថ្ងៃទី 31 ខែមីនា នៃឆ្នាំនីមួយៗ។
ការប្រតិបត្តិយ៉ាងខ្ជាប់ខ្ជួនចំពោះកាតព្វកិច្ច និងបទប្បញ្ញត្តិពន្ធដាររបស់កម្ពុជា បានបង្ហាញពីឆន្ទៈ និងអនុវត្តប្រកបដោយតម្លាភាពរបស់ធនាគារក្នុងការរក្សាអភិបាលកិច្ចពន្ធសារជីវកម្មដ៏ល្អ ដែលឆ្លុះបញ្ចាំងតាមរយៈសមិទ្ធផលមួយនេះ។
ប្រសាសន៍ក្នុងលិខិតសរសើររបស់សម្តេចតេជោនាយករដ្ឋមន្ត្រី បានថ្លែងថា៖ “ខ្ញុំសូមថ្លែងអំណរគុណ និងកោតសរសើរដោយស្មោះអស់ពីដួងចិត្តជូនចំពោះលោកនាយកធនាគារ ABA ដែលបានប្រកាស និងបង់ពន្ធលើប្រាក់ចំណូលប្រចាំឆ្នាំ 2022 ច្រើនជាងគេក្នុងចំណាត់ថ្នាក់លេខ 1 ក្នុងចំណោមសហគ្រាសចំនួន 10 ដែលបានប្រកាស និងបង់ពន្ធលើប្រាក់ចំណូលប្រចាំឆ្នាំ 2022 ច្រើនជាងគេ។
ការបំពេញកិច្ចបង់ពន្ធបានល្អ និងដោយស្ម័គ្រចិត្តរបស់ធនាគារ គឺជាគំរូដ៏ល្អសម្រាប់សហគ្រាសនានា ជាពិសេសឆ្លុះបញ្ចាំងពីអនុលោមភាពសារពើពន្ធកម្រិតខ្ពស់ និងអភិបាលកិច្ចសាជីវកម្មដ៏ល្អប្រសើររបស់សហគ្រាស។ ជាមួយគ្នានេះ ខ្ញុំសូមធ្វើការវាយតម្លៃខ្ពស់ជូនដល់សហគ្រាសក្នុងការចូលរួមចំណែកយ៉ាងសំខាន់ដល់ការអភិវឌ្ឍ និងរីកចម្រើនលូតលាស់នៃសេដ្ឋកិច្ច និងសង្គមជាតិយើង។”
កាលពីដើមខែមីនា ឆ្នាំ 2023 បានទទួលលិខិតសរសើរមួយទៀត ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋ មន្ត្រីនៃព្រះរាជាណាចក្រកម្ពុជា ដែលសាទរចំពោះការរួមចំណែករបស់ធនាគារក្នុងការអភិវឌ្ឍសេដ្ឋកិច្ចជាតិ ក្នុងនាមជាសហគ្រាសបង់ពន្ធច្រើនជាងគេទីពីរ ប្រចាំឆ្នាំ 2022។
ថ្មីៗនេះ ធនាគារ ABA ក៏ទទួលបានវិញ្ញាបនបត្រអនុលោមភាពសារពើពន្ធ ប្រភេទ “មាស” ពីអគ្គនាយកដ្ឋានពន្ធដាររយៈពេល 3 ឆ្នាំជាប់ៗគ្នាសម្រាប់ឆ្នាំហិរញ្ញវត្ថុ 2019, 2020 និង 2021 ដែលជាសមិទ្ធផលនៃការប្តេជ្ញាចិត្តយ៉ាងរឹងមាំ និងតម្លាភាពចំពោះអនុលោមភាពពន្ធដារនៅកម្ពុជា។
1 ABA ជាធនាគារពាណិជ្ជកម្ពុជាដ៏ធំបំផុតគិតលើទ្រព្យសកម្ម, ប្រាក់បញ្ញើ, កម្ចីដុល, ប្រាក់បញ្ញើអតិថិជននិងប្រាក់ចំណេញ ផ្អែកលើរបាយការណ៍ត្រួតពិនិត្យប្រចាំឆ្នាំ 2021 របស់ធនាគារជាតិនៃកម្ពុជា។