ធនាគារ ABA ដាក់ឲ្យដំណើរការសេវា ផ្ទេរប្រាក់ក្នុងស្រុកតាមទូរស័ព្ទ
30/Apr/2020
ធនាគារ ABA ដែលជាធនាគារពាណិជ្ជនាំមុខផ្នែកហិរញ្ញវត្ថុឌីជីថលរបស់កម្ពុជា ប្រកាសនាថ្ងៃនេះអំពីការដាក់ឲ្យដំណើរការនូវមុខងារថ្មីមួយនៅក្នុងកម្មវិធី ABA Mobile ដែលមានឈ្មោះថា សេវាផ្ទេរប្រាក់ទៅកាន់ធនាគារផ្សេង។
តាមរយៈសេវាកម្មថ្មីនេះ អ្នកប្រើប្រាស់កម្មវិធី ABA Mobile អាចផ្ទេរប្រាក់ទៅកាន់ធនាគារផ្សេងក្នុងស្រុកបានយ៉ាងលឿនរហ័ស និងគ្រប់ពេលបាន ដោយមិនបាច់ទៅកាន់សាខាធនាគារ ឬចេញមូលប្បទានប័ត្រឡើយ។ ការផ្ទេរប្រាក់នេះមានជាប្រាក់ដុល្លារ និងប្រាក់រៀល អាស្រ័យលើរូបិយបណ្ណនៃគណនីប្រភព ហើយថ្លៃសេវាគិតត្រឹមតែ 0.05% នៃចំនួនទឹកប្រាក់ដែលត្រូវផ្ទេរប៉ុណ្ណោះ (អប្បបរមា 3 ដុល្លារ)។
ដើម្បីផ្ទេរប្រាក់ទៅកាន់ធនាគារផ្សេងដោយប្រើប្រាស់កម្មវិធី ABA Mobile អ្នកប្រើប្រាស់អាចអនុវត្តតាមជំហានដូចខាងក្រោមនេះ៖
- ចូលទៅកាន់ផ្នែក ផ្ទេរប្រាក់ នៅក្នុងកម្មវិធី
- ជ្រើសរើស ផ្ទេរប្រាក់ទៅកាន់ធនាគារផ្សេង
- ជ្រើសរើស គណនីប្រភពរបស់ធនាគារ ABA ហើយបំពេញព័ត៌មានលម្អិតរបស់អ្នកទទួលព្រមជាមួយនឹងចំនួនទឹកប្រាក់ត្រូវផ្ទេរ និងគោលបំណងផងដែរ
- បញ្ជាក់អំពីប្រតិបត្តិការជាមួយនឹងលេខកូដ PIN 4 ខ្ទង់របស់កម្មវិធី ABA Mobile។
ក្នុងករណីប្រតិបត្តិការមិនបានជោគជ័យ អតិថិជននឹងត្រូវបានជូនដំណឹងនៅក្នុងកម្មវិធីនេះក្នុងរយៈពេលមួយថ្ងៃធ្វើការ។
លោក Zhiger Atchabarov នាយកប្រតិបត្តិការអន្តរជាតិនៃធនាគារ ABA មានប្រសាសន៍ថា “ដោយសារអតិថិជនកាន់តែច្រើនចាប់ផ្តើមប្រើប្រាស់បច្ចេកវិទ្យាឌីជីថលដើម្បីធ្វើឲ្យការងាររបស់ពួកគេមានភាពងាយស្រួលនោះ សេវាធនាគារតាមទូរស័ព្ទរបស់ធនាគារ ABA ជួយដោះស្រាយការងារប្រចាំថ្ងៃរបស់ពួកគេបានច្រើន”។
លោកក៏បានបន្ថែមទៀតថា “ឥឡូវនេះ អតិថិជនធនាគារ ABA មិនចាំបាច់ដកសាច់ប្រាក់ ហើយយកទៅកាន់សាខាធនាគារផ្សេង ឬដកមូលប្បទានប័ត្រ គ្រប់ពេលដែលពួកគេត្រូវការផ្ទេរប្រាក់ទៅកាន់ធនាគារផ្សេងក្នុងស្រុកឡើយ។ ផ្ទុយទៅវិញ ពួកគេអាចផ្ទេរប្រាក់តាមទូរស័ព្ទរបស់ពួកគេបានយ៉ាងស្រួលនៅតាមផ្ទះ ឬទីតាំងអាជីវកម្មរបស់ពួកគេបាន។ សេវាកម្មនេះមាន 24/7 ហើយយើងជឿជាក់ថា សេវាកម្មនេះនឹងមានភាពងាយស្រួលខ្លាំងចំពោះអតិថិជនជាច្រើន”។
សម្រាប់ព័ត៌មានបន្ថែមអំពីមុខងារដ៏មានប្រយោជន៍ថ្មីនេះ សូមចូលទៅកាន់ទំព័រ សេវាផ្ទេរប្រាក់ក្នុងស្រុកតាមទូរស័ព្ទ។