ABA ទទួលបានពានធនាគារឌីជីថលឆ្នើម ជាងគេនៅកម្ពុជា ក្នុងឆ្នាំ 2020 ពីទស្សនាវដ្តី Asiamoney
14/Jan/2021
ធនាគារ ABA ជាធនាគារកម្ពុជានាំមុខក្នុងវិស័យហិរញ្ញវត្ថុឌីជីថល និងជាបុត្រសម្ព័ន្ធរបស់ធនាគារជាតិកាណាដា ប្រកាសថា ខ្លួនបានទទួលពានរង្វាន់ “ធនាគារឌីជីថលដ៏ឆ្នើមនៅកម្ពុជាឆ្នាំ 2020” ពីទស្សនាវដ្តី Asiamoney ជាទស្សនាវដ្តីថ្នាក់តំបន់របស់ Euromoney ដែលជាទស្សនាវដ្តីហិរញ្ញវត្ថុអន្តរជាតិ។ ពានរង្វាន់ពីទស្សនាវដ្តី Asiamoney បង្ហាញពីឧត្តមភាពប្រព័ន្ធឌីជីថលរបស់ធនាគារ ABA រយៈពេលពីរឆ្នាំជាប់គ្នា។
អំឡុងពេលវាយតម្លៃ គណៈវិនិច្ឆ័យបានវិភាគផលបត្រផលិតផលរបស់ធនាគារ រួមមាន សេវាកម្មនានាដែលបានដាក់ឲ្យប្រើប្រាស់អំឡុងពេលធ្វើរបាយការណ៍។ អ្នកជំនាញរបស់ទស្សនាវដ្តី Asiamoney កោតសរសើរយ៉ាងខ្លាំងចំពោះគំនិតផ្តួចផ្តើមប្លែកពីគេ ដែលបានជួយឲ្យធនាគារឈ្នះនូវពានរង្វាន់ធនាគារឌីជីថលឆ្នើម ដូចខាងក្រោម៖
- កម្ចីភ្លាមៗនៅក្នុងកម្មវិធី ABA Mobile ដែលជួយឲ្យអតិថិជន ABA ដោះស្រាយការលំបាកផ្នែកសាច់ប្រាក់បណ្តោះអាសន្នរបស់ពួកគេដោយមិនបាច់បិទបញ្ញើកាលកំណត់ និងធ្វើឲ្យបាត់បង់ការប្រាក់ដែលទទួលបាន។
- សេវាផ្ទេរប្រាក់ Visa Direct ដែលអនុញ្ញាតឲ្យម្ចាស់កាត ABA Visa អាចផ្ញើប្រាក់បានភ្លាមៗពីកម្មវិធី ABA Mobile ទៅកាន់កាត Visa ណាមួយដែលបើកដោយធនាគារនានានៅកម្ពុជា និងប្រទេសចំនួន 8 ទៀតនៅក្នុងតំបន់។
- ការពង្រីកបន្ថែមនូវប្រព័ន្ធទូទាត់អនឡាញ PayWay និងការទទួលយកការទូទាត់តាមកូដ QR។
- ការពង្រីកសេវាស្វ័យធនាគារ ការដាក់ម៉ាស៊ីនដកដាក់ប្រាក់ និងម៉ាស៊ីនដាក់មូលប្បទានបត្រ និងការដាក់ឲ្យដំណើរការទីតាំងស្វ័យសេវាធនាគារ ABA 24/7 ដែលអនុញ្ញាតឲ្យធ្វើការដក និងដាក់ប្រាក់ និងដាក់មូលប្បទានបត្របានគ្រប់ពេលវេលា ដោយភាពងាយស្រួល។
នៅក្នុងរបាយការណ៍អំពីពានរង្វាន់របស់ខ្លួន ទស្សនាវដ្តី Asiamoney បានកត់សម្គាល់ថា ប្រព័ន្ធសេវាធនាគារឌីជីថលរបស់ធនាគារ ABA បានជួយឲ្យធនាគារក្នុងការទទួលបានអតិថិជន យល់ពីអតិថិជន និងបម្រើអតិថិជនរបស់ខ្លួន។ កម្មវិធី ABA Mobile ជាកម្មវិធីដ៏លេចធ្លោរបស់ធនាគារ ក្នុងឆ្នាំ 2020 មានប្រតិបត្តិការជាង 100 លានដង ដែលមានទឹកប្រាក់សរុបជាង 59 ប៊ីលានដុល្លារ។
អ្នកជំនាញរបស់ទស្សនាវដ្តី Asiamoney មានប្រសាសន៍ថា៖ “ដោយមានការទទួលស្គាល់ថាជាធនាគារដែលមាន បច្ចេកវិទ្យាទំនើបបំផុតនៅក្នុងប្រទេស ធនាគារ ABA បានធ្វើមូលធនកម្មពីការរីកចម្រើននៃវិស័យពាណិជ្ជកម្មអេឡិកត្រូនិកដែលកើតឡើងដោយសារការរីករាលដាលជំងឺកូវីដ-19។ ធនាគារបានពង្រីកមុខងារ ABA PAY ដែលជាប្រព័ន្ធទូទាត់មិនប្រើសាច់ប្រាក់តាមកូដ QR ដល់ពាណិជ្ជករតូចៗ។ ធនាគារក៏បានធ្វើឲ្យប្រសើរឡើងនូវប្រព័ន្ធទូទាត់អនឡាញ PayWay របស់ខ្លួនដែលអនុញ្ញាតឲ្យសហគ្រិនក្នុងស្រុកអាចលក់ផលិតផល និងសេវាកម្មរបស់ពួកគេតាមអនឡាញ និងមានមុខងារចេញវិក្កយបត្រ មុខងារគ្រប់គ្រងអ្នកប្រើប្រាស់ និងមុខងារបង្កើតកូដ QR”។
លោក Zokhir Rasulov នាយកឌីជីថលរបស់ធនាគារ ABA មានប្រសាសន៍នាឱកាសនេះថា “ការទទួលស្គាល់នេះបង្កើតទំនុកចិត្តលើយុទ្ធសាស្ត្រសេវាធនាគារឌីជីថលដែលយើងបានជ្រើសរើស និងលើកទឹកចិត្តយើងយ៉ាងខ្លាំងសម្រាប់ការអភិវឌ្ឍ និងនវានុវត្តន៍ថ្មីៗទៀត។ គោលដៅចម្បងរបស់យើង គឺធ្វើឲ្យសកម្មភាពហិរញ្ញវត្ថុប្រចាំថ្ងៃរបស់អតិថិជនយើងមានភាពងាយស្រួល និងមានសុវត្ថិភាព។ យើងនឹងបន្តផ្តោតលើការអភិវឌ្ឍប្រព័ន្ធអេកូឌីជីថលដ៏រឹងមាំដោយផ្តល់ផលិតផល និងសេវាកម្មដ៏ទំនើបដែលនឹងបន្តឲ្យអតិថិជន ABA ពេញចិត្តក្នុងកម្រិតមួយដ៏ខ្ពស់”។
គិតត្រឹមថ្ងៃទី 31 ធ្នូ 2020 ធនាគារ ABA គ្រប់គ្រងទ្រព្យសកម្មសរុបចំនួន 6.1 ប៊ីលានដុល្លារ និងមានអតិថិជនសរុបជាង 1.3 លាននាក់ នៅទូទាំងប្រទេសកម្ពុជា។
អំពីទស្សនាវដ្តី Asiamoney
រយៈពេលជាងបីទសវត្សរ៍ ទស្សនាវដ្តី Asiamoney គឺជាសំឡេងនៃឧស្សាហកម្មធនាគារ និងទីផ្សារមូលធននៅអាស៊ី។ ក្នុងអំឡុងពេលនោះ ការបោះពុម្ពផ្សាយនេះមានសារៈសំខាន់ណាស់ក្នុងការគ្របដណ្តប់លើការអភិវឌ្ឍវិស័យហិរញ្ញវត្ថុនៅក្នុងតំបន់ដ៏រំភើបបំផុតនៅលើពិភពលោក។ ច្បាប់ចេញផ្សាយនីមួយរបស់ទស្សនាវដ្តី Asiamoney មានរបាយការណ៍ស៊ីជម្រៅ និងពានរង្វាន់វិស័យធនាគារជាច្រើននៅក្នុងទីផ្សាររហូតដល់ទៅ 6 នៅអាស៊ីប៉ាស៊ីហ្វិក។ ការសម្រេចចិត្តផ្តល់ពានរង្វាន់របស់ទស្សនាវដ្តី Asiamoney ត្រូវបានធ្វើឡើងដោយក្រុមអ្នកសារព័ត៌មានជាន់ខ្ពស់ដឹកនាំដោយនិពន្ធនាយករបស់ទស្សនាវដ្តី Euromoney បន្ទាប់ពីទទួលបានការដាក់សំណើលម្អិតពីអ្នកចូលរួមទីផ្សារនេះ និងរួមជាមួយការស្រាវជ្រាវលើទីផ្សារធនាគារ និងមូលធនដោយគណៈកម្មាធិការនិពន្ធនាយក។ និពន្ធនាយកជាន់ខ្ពស់ក៏បានធ្វើទស្សនកិច្ចនៅប្រទេស ឬតំបន់នីមួយៗដើម្បីជួបជាមួយនឹងធនាគារិកនាំមុខគេ និងប្រមូលមតិយោបល់ពីអតិថិជន និងគូប្រកួតប្រជែងផងដែរ។
