ABA គាំទ្រយុទ្ធនាការវះកាត់ដោយឥតគិតថ្លៃរបស់ អង្គការស្នាមញញឹមកម្ពុជា ក្នុងខេត្តសៀមរាប
19/Mar/2025
ក្នុងនាមជាសាជីវកម្មមានទំនួលខុសត្រូវសង្គម ធនាគារ ABA មានកិត្តិយសឧបត្ថម្ភ ដល់យុន្ធនាការវះកាត់ដោយឥតគិតថ្លៃ របស់អង្គការស្នាមញញឹមកម្ពុជា នៅមន្ទីរពេទ្យបង្អែកខេត្តសៀមរាប។ ធនាគារបានបរិច្ចាគទឹកប្រាក់ចំនួន 10,000 ដុល្លាអាមេរិក រួមចំណែកដល់ភាពជោគជ័យនៃយុទ្ធនាការនេះ។
យុទ្ធនាការនេះប្រព្រឹត្តទៅកាលពីថ្ងៃទី13 ដល់ 15 ខែមីនា ឆ្នាំ 2025 ដោយបានព្យាបាលអ្នកជំងឺដែលមានមាត់ឆែប ក្រអូមឆែប និងមុខមាត់មិនប្រក្រតីផ្សេងៗ ដោយដោយឥតគិតថ្លៃ។ ក្រុមអ្នកជំនាញផ្នែកវេជ្ជសាស្ត្រ រួមមានគ្រូពេទ្យវះកាត់ និងក្រុមការងារស្ម័គ្រចិត្តជនជាតិខ្មែរ ចិន និងហុងកុង ជាច្រើនរូបបានធ្វើការខិតខំប្រឹងប្រែងផ្តល់អ្នកជំងឹនូវស្នាមញញឹមថ្មី ដែលពួកគាត់ត្រូវការ។
លោក Chan Kok Choy នាយកប្រតិបត្តិនៃអង្គការស្នាមញញឹមកម្ពុជា មានប្រសាសន៍ថា “យើងខ្ញុំ សូមអរគុណចំពោះការគាំទ្រដ៏ឥតងាករេរបស់ធនាគារ ABA។ ក្នុងយុន្ធនាការថ្មីៗនេះ យើងបានផ្តល់ការវះកាត់ព្យាបាលដល់អ្នកជំងឺចំនួន 44 នាក់។ ការវះកាត់នេះមិនត្រឹមតែផ្លាស់ប្តូររូបរាងមុខមាត់របស់ពួកគាត់នោះទេ គឺបន្ថែមទាំងផ្តល់ឱកាសដល់កុមារកម្ពុជាទាំងនេះ ឲ្យទទួលបានអនាគតភ្លឺស្វាងផងដែរ។”
លោក យិន ចិន្តាភក្តី នាយកសាខាធនាគារ ABA ខេត្តសៀមរាប ក៏មានប្រសាសន៍ថា “ការងាររបស់ អង្គការស្នាមញញឹមកម្ពុជា ពិតជាគួរឲ្យកោតសរសើរណាស់។ យើងខ្ញុំមានភាពរីករាយ ដែលការរួមចំណែកនេះ បានផ្តល់ផលវិជ្ជមានយ៉ាងយូរអង្វែងនៅក្នុងសហគមន៍។”
លើសពីនេះ បុគ្គលិកធនាគារ ABA ប្រមាណ 50 នាក់ មកពីសាខាខេត្តសៀមរាប ក៏បានចូលរួមក្នុងព្រឹត្តិការណ៍ “ដើរដើម្បីស្នាមញញឹម” នៅថ្ងៃបន្ទាប់ ដើម្បីអបអរដល់ជោគជ័យរបស់ អង្គការស្នាមញញឹមកម្ពុជា និងលើកកម្ពស់ការយល់ដឹង អំពីយុទ្ធនាការដ៏សំខាន់មួយនេះដល់ប្រជាពលរដ្ឋខ្មែរ។
ក្នុងនាមជាដៃគូគាំទ្រយូរអង្វែង ABA តែងតែដើរតួយ៉ាងសកម្ម ក្នុងការគាំទ្រ អង្គការស្នាមញញឹមកម្ពុជា និងយុទ្ធនាការរបស់ខ្លួន។ ក្នុងឆ្នាំ 2024 ABA បានធ្វើជាអ្នកឧបត្ថម្ភធំ នៃយុទ្ធនាការនេះដូចគ្នា ក្នុងខេត្តសៀមរាប។ ធនាគារក៏បានជួយលើកកម្ពស់ការយល់ដឹង អំពីយុទ្ធនាការវះកាត់នេះ នៅតាមបណ្តាខេត្តផ្សេងៗ តាមរយៈការផ្សព្វផ្សាយតាមបណ្តាញសង្គមរបស់ខ្លួន។
ABA នៅតែបន្តប្តេជ្ញាចិត្តគាំទ្រដល់យុទ្ធនាការ ដែលជួយលើកស្ទួយសុខុមាលភាព និងជីវភាពរបស់ប្រជាពលរដ្ឋក្នុងប្រទេសកម្ពុជា៕
