ធនាគារ ABA គាំទ្រគម្រោងសម្ដេចតេជោសម្រាប់ គោលដៅកម្ពុជាគ្មានមីន តាមរយៈការបរិច្ចាគទឹកប្រាក់ 200,000 ដុល្លារអាមេរិក
13/Jul/2022
ធនាគារ ABA ដែលជាធនាគារពាណិជ្ជកម្ពុជាដ៏ធំបំផុត បានចុះអនុស្សរណៈនៃការយោគយល់គ្នាជាមួយអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន (CMAA)។ ABA បានផ្តល់វិភាគទានសប្បុរសធម៌ចំនួន 200,000 ដុល្លារអាមេរិក ជូនគម្រោងសម្ដេច តេជោសម្រាប់សកម្មភាពមីន។ ថវិកាសប្បុរសធម៌នេះ នឹងត្រូវបានយកទៅប្រើប្រាស់ ដើម្បីជំរុញការងារបោសសម្អាតមីនឆ្ពោះទៅកាន់គោលដៅ កម្ពុជាគ្មានមីនឆ្នាំ 2025។
ពិធីចុះហត្ថលេខាលើអនុស្សរណៈនៃការយោគយល់គ្នានេះ ធ្វើនៅការិយាល័យកណ្ដាលធនាគារ ABA ក្រោមអធិបតីភាពឯកឧត្តម លី ធុជ ទេសរដ្ឋមន្ត្រី និងជាអនុប្រធានទី1 អាជ្ញាធរមីន, លោក Askhat Azhikhanov នាយកប្រតិបត្តិធនាគារ ABA។
ថ្លែងក្នុងពិធីនេះ លោក Askhat Azhikhanov បានមានប្រសាសន៍ថា៖ "អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន បានជួយសង្គ្រោះជីវិតមនុស្សជាច្រើននៅទូទាំងប្រទេស ពីគ្រាប់មីន និងសំណល់ជាតិផ្ទុះពីសង្គ្រាម។ យើងខ្ញុំនៅ ABA មានសេចក្ដីសោមនស្សយ៉ាងក្រៃលែងចំពោះកិច្ចខិតខំប្រឹងប្រែង របស់អាជ្ញាធរមីន និងគាំទ្រយ៉ាងពេញទំហឹងលើ "គម្រោងសម្តេចតេជោសម្រាប់សកម្មភាពមីន (STP-MA)" ដែលផ្តួចផ្តើមឡើងដោយសម្ដេចនាយករដ្ឋមន្ត្រី ដើម្បីសម្រេចបាននូវគោលដៅឆ្ពោះទៅកាន់ កម្ពុជាគ្មានមីនឆ្នាំ 2025។" លោកក៏បានបន្ថែមផងដែរថា៖ "យើងខ្ញុំសង្ឃឹមថា ការរួមចំណែកដ៏ស្ដួចស្ដើងរបស់យើងខ្ញុំ នឹងជួយសម្រួលការងារដ៏មានតម្លៃមួយនេះ ក្នុងការរំដោះដីធ្លី សម្រាប់ការប្រើប្រាស់ដី, ការអភិវឌ្ឍហេដ្ឋារចនាសម្ពន្ធ, សេវាសង្គមមូលដ្ឋាន, ប្រព័ន្ធធារាសាស្ដ្រ និងទឹកស្អាតប្រកបដោយសុវត្ថិភាព។
"ក្រៅពីការបរិច្ចាគទឹកប្រាក់នេះ ធនាគារ ABA នឹងផ្ដល់ឱកាសដល់អតិថិជនរបស់ខ្លួនជាង 2 លាននាក់ ក្នុងការឧបត្ថម្ភជូន CMAA តាមរយៈមុខងារបរិច្ចាគផ្ទាល់ក្នុងកម្មវិធី ABA Mobile ដោយឥតគិតថ្លៃ។ ឯកឧត្តម លី ធុជ បានមានប្រសាសន៍ផងដែរថា៖ "ខ្ញុំ ក្នុងនាមសម្តេចតេជោនាយករដ្ឋមន្ត្រី សូមអរគុណដល់ថ្នាក់ដឹកនាំ និង ធនាគារ ABA ទាំងមូលនូវការបរិច្ចាគសប្បុរសធម៌ចំនួន 2 សែនដុល្លារអាមេរិក ដើម្បីអនុវត្តគម្រោងសម្តេចតេជោសម្រាប់សកម្មភាពមីនផ្តល់ដីសុវត្ថិភាព បង្កើតស្នាមញញឹម"។ អនុស្សរណៈនេះ នឹងចូលរួមចំណែកយ៉ាងសំខាន់ជួយឲ្យប្រជាជនកម្ពុជារស់នៅក្នុងប្រទេសគ្មានមីន។ ប្រជាពលរដ្ឋក៏អាចចូលរួមជួយគាំទ្រដល់សកម្មភាពបោសសម្អាតមីនសល់ពីសង្គ្រាម និងយុទ្ធភណ្ឌមិនទាន់ផ្ទុះ ដោយបរិច្ចាគតាមរយៈគណនី ABA របស់ CMAA បាន។"
ស្របតាមគោលការណ៍ទំនួលខុសត្រូវសង្គមរបស់ខ្លួន ធនាគារ ABA តែងតែចូលរួមក្នុងការបរិច្ចាគ និងកម្មវិធីសប្បុរសធម៌ជាប្រចាំ ដើម្បីជាប្រយោជន៍ដល់ប្រជាជន និងសហគមន៍។ ជាក់ស្តែង កាលពីពេលថ្មីៗនេះ ធនាគារបានបរិច្ចាគថវិកាចំនួន 200,000 ដុល្លារអាមេរិក ជូនកាកបាទក្រហមកម្ពុជា សម្រាប់សកម្មភាពមនុស្សធម៌។
ក្រៅពីនេះ ធនាគារ ក៏បានគាំទ្រដល់ សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) សម្រាប់ការផ្ដល់សេវា ថែទាំសុខភាពឥតគិតថ្លៃដល់ប្រជាពលរដ្ឋនៅជនបទទូទាំងប្រទេស និងសមាគមនិស្សិតអាហារូបករណ៍សម្តេចកិត្តិព្រឹទ្ធបណ្ឌិត (AMT) ដើម្បីគាំទ្រដល់សិស្ស-និស្សិតកម្ពុជាតាមរយៈអាហាររូបករណ៍, កម្មវិធីអប់រំ និងគម្រោងជំនួយហិរញ្ញវត្ថុ ដោយបរិច្ចាគទឹកប្រាក់ចំនួន 100,000 ដុល្លារអាមេរិក ដល់សមាគមនីមួយៗ។ កាលពីខែមេសា ឆ្នាំ2021 ធនាគារ ក៏បានបរិច្ចាគ 1,000,000,000 ដុល្លារអាមេរិក ដើម្បីគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលក្នុងការទប់ស្កាត់ការរីករាលដាលនៃជំងឺកូវីដផងដែរ។
