ធនាគារ ABA ឧបត្ថម្ភ សន្និសីទជាតិ លើកទី1 ស្ដីពីគណនេយ្យ
19/Dec/2019
ធនាគារ ABA បានក្លាយអ្នកឧបត្ថម្ភធំនៃ “សន្និសីទជាតិលើកទី1 ស្ដីពីគណនេយ្យ” ដែលត្រូវបានប្រារព្ធធ្វើឡើងនៅរាជធានីភ្នំពេញ កាលពីថ្ងៃទី 18 ខែធ្នូ ឆ្នាំ2019។ ដោយស្ថិតក្រោមការរៀបចំរបស់ ក្រុមប្រឹក្សាជាតិគណនេយ្យ (NAC)ក្នុងកិច្ចសហការជាមួយ វិទ្យាស្ថានគណនេយ្យករជំនាញ និងសវនករកម្ពុជា (KIPCAA) ក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រឹត្តិការណ៍លើកទីមួយនេះ បានកៀងគរមានការចូលរួមពីសំណាក់ ឯកឧត្តម លោកជំទាវ លោកឧកញ៉ា លោក លោកស្រី អ្នកនាង កញ្ញា តំណាងឲ្យស្ថាប័នជាតិ, ក្រុមហ៊ុនឯកជន, និងអង្គការមិនស្វែងរកប្រាក់ចំណេញប្រមាណជាង 600នាក់។
ក្រោមប្រធានបទ “តួនាទីវិស័យគណនេយ្យក្នុងសេដ្ឋកិច្ចឌីជីថល” សន្និសីទនេះ បង្កើតបាននូវបរិការណ៍មួយ ដើម្បីអនុញ្ញាតឲ្យគណនេយ្យករ, សវនករ, និងអ្នកវិជ្ជាជីវៈហិរញ្ញវត្ថុ ទទួលបានបច្ចុប្បន្នភាពថ្មីៗចុងក្រោយពាក់ព័ន្ធនឹងការអភិវឌ្ឍនៅក្នុងវិជ្ជាជីវៈគណនេយ្យនៅកម្ពុជា និងទទួលបានព័ត៌មានពីអ្នកជំនាញនៅក្នុងវិស័យនេះអំពីនិយាម និងការអនុវត្តសមស្របបំផុត។
អំឡុងពេលថ្លែងសុន្ទរកថាបើកសន្និសីទនេះ ឯកឧត្តមអគ្គបណ្ឌិតសភាចារ្យ បានលើកឡើងថា៖ “គោលបំណងសំខាន់របស់សន្និសីទ្ធនេះ គឺដើម្បីផ្ដល់ព័ត៌មានដល់សិក្ខាកាមអំពីវឌ្ឍនភាព ថ្មីៗនៃវិស័យគណនេយ្យនៅកម្ពុជា, តួនាទីរបស់គណនេយ្យករជំនាញនៅក្នុងសេដ្ឋកិច្ចឌីជីថល និងដើម្បីកៀងគរឲ្យមានការចូលរួមសម្រាប់ការរៀបចំ និងកែលម្អក្របខណ្ឌគោលនយោបាយ និងក្របខណ្ឌបទប្បញ្ញត្តិ ដែលនឹងជួយពង្រឹងតួនាទីនិយ័តករ និងគណនេយ្យករជំនាញក្នុងយុគសម័យសេដ្ឋកិច្ចឌីជីថល។”
តាមរយៈការឧបត្ថម្ភនេះ ABA បង្ហាញការប្ដេជ្ញាចិត្តចូលរួមជាមួយរាជរដ្ឋាភិបាលកម្ពុជា ក្នុងកិច្ចគាំទ្រការអភិវឌ្ឍវិស័យគណនេយ្យ ដែលត្រូវបានចាត់ទុកថាជាសសរស្ដម្ភមួយសម្រាប់កំណើនសេដ្ឋកិច្ចប្រកបដោយចីរភាព។
