ធនាគារ ABA ចាប់ដៃគូជាមួយ ធនាគារអភិវឌ្ឍន៍អាស៊ី (ADB) ដើម្បីពង្រឹងកម្មវិធីហិរញ្ញប្បទានខ្សែសង្វាក់ពាណិជ្ជកម្ម នៅកម្ពុជា និងសកលលោក
26/Sep/2025
ធនាគារ ABA ដែលជាធនាគារពាណិជ្ជដ៏ធំបំផុតរបស់កម្ពុជា បានចូលរួមជាផ្លូវការ ជាមួយកម្មវិធីហិរញ្ញប្បទានខ្សែសង្វាក់ពាណិជ្ជកម្ម (TSCFP) របស់ ធនាគារអភិវឌ្ឍន៍អាស៊ី (ADB) ក្នុងនាមជាធនាគារបញ្ជាក់ (Confirming Bank)។ ភាពជាដៃគូនេះ ត្រូវបានរៀបចំជាផ្លូវការ នៅស្ថានបេសកកម្ម ADB ប្រចាំនៅកម្ពុជា កាលពីថ្ងៃទី 11 ខែកញ្ញា ឆ្នាំ2025 កន្លងទៅ ដោយមានការអញ្ជើញចូលរួមពីលោកជំទាវ Jyotsana Varma នាយិកាធនាគារអភិវឌ្ឍន៍អាស៊ី (ADB) ប្រចាំប្រទេសកម្ពុជា និងលោក Zhiger Atchabarov អគ្គនាយករងប្រតិបត្តិ, នាយកប្រតិបត្តិការ, និងជានាយករងប្រតិបត្តិនៃធនាគារ ABA រួមជាមួយនឹងក្រុមការងារពាក់ព័ន្ធមកពីស្ថាប័នទាំងពីរ។
តាមរយៈកិច្ចព្រមព្រៀងនេះ ធនាគារ ABA នឹងដើរតួនាទីកាន់តែសំខាន់ក្នុងការសម្របសម្រួលពាណិជ្ជកម្មឆ្លងប្រទេស ក្នុងនាមជាធនាគារបញ្ជាក់ (Confirming Bank) ក្រោម TSCFP។ ការណ៍នេះ អាចឲ្យ ABA ផ្តល់នូវសុវត្ថិភាព និងការធានាបន្ថែម ដល់ក្រុមហ៊ុននាំចេញ និងអ្នកនាំចូលរបស់កម្ពុជា ដោយផ្ដល់លទ្ធភាពដល់ពួកគាត់ចូលទៅកាន់ទីផ្សារថ្មីៗ និងឱកាសធ្វើពាណិជ្ជកម្មប្រកបដោយទំនុកចិត្ត។
លោក Zhiger Atchabarov អគ្គនាយករងប្រតិបត្តិ, នាយកប្រតិបត្តិការ, និងជានាយករងប្រតិបត្តិនៃធនាគារ ABA មានប្រសាសន៍ថា "យើងខ្ញុំមានមោទនភាពក្នុងការចាប់ដៃគូជាមួយ ADB ក្រោមកម្មវិធីហិរញ្ញប្បទានខ្សែសង្វាក់ពាណិជ្ជកម្ម។ ជំហានដ៏សំខាន់នេះ ពង្រឹងជំហររបស់ធនាគារ ABA ក្នុងការគាំទ្រដល់សមាហរណកម្មរបស់កម្ពុជាទៅក្នុងខ្សែសង្វាក់ពាណិជ្ជកម្មពិភពលោក ខណៈធានាឲ្យបានថា អតិថិជនរបស់យើងខ្ញុំ ជាពិសេសសហគ្រាសធុនតូច និងមធ្យម មានលទ្ធភាពទទួលបានហិរញ្ញប្បទានពាណិជ្ជកម្ម កាន់តែមានសុវត្ថិភាព និងជាទីទុកចិត្ត។
កម្មវិធីហិរញ្ញប្បទានខ្សែសង្វាក់ពាណិជ្ជកម្ម (TSCFP) របស់ ADB បង្រួមគម្លាតទីផ្សារ ដោយផ្តល់នូវការធានា និងកម្ចី ដើម្បីគាំទ្រដល់ពាណិជ្ជកម្មនៅក្នុងតំបន់អាស៊ីដែលកំពុងអភិវឌ្ឍន៍។ តាមរយៈការកាត់បន្ថយហានិភ័យសម្រាប់ធនាគារចូលរួម កម្មវិធីនេះអាចឲ្យគ្រឹះស្ថានហិរញ្ញវត្ថុនានាពង្រីកហិរញ្ញប្បទានពាណិជ្ជកម្មបានកាន់តែទូលំទូលាយ ជាពិសេស សម្រាប់សហគ្រាសធុនតូច និងមធ្យម (SMEs) ដែលជាធម្មតា មិនសូវទទួលបានការគាំទ្រ។
លោកជំទាវ Jyotsana Varma នាយិកាធនាគារអភិវឌ្ឍន៍អាស៊ី (ADB) ប្រចាំប្រទេសកម្ពុជា មានប្រសាសន៍ថា “ហិរញ្ញប្បទានពាណិជ្ជកម្ម ពិតជាមានសារៈសំខាន់ណាស់សម្រាប់កំណើនសេដ្ឋកិច្ច និងការអភិវឌ្ឍន៍វិស័យឯកជននៅកម្ពុជា។ យើងខ្ញុំសូមស្វាគមន៍យ៉ាងកក់ក្ដៅចំពោះធនាគារ ABA ដែលបានចូលរួមក្នុងនាមជាធនាគារបញ្ជាក់ (Confirming Bank) ក្រោមកម្មវិធី TSCFP ហើយយើងរង់ចាំសម្រេចកិច្ចការរួមគ្នាដើម្បីពង្រីកជម្រើសហិរញ្ញប្បទានឲ្យកាន់តែសម្បូរបែបសម្រាប់អាជីវកម្មនានានៅទូទាំងប្រទេស។
តាមរយៈភាពជាដៃគូនេះ ធនាគារ ABA ពង្រឹងការប្តេជ្ញាចិត្តរបស់ខ្លួនក្នុងការជំរុញកំណើនសេដ្ឋកិច្ចកម្ពុជា ដោយផ្តល់លទ្ធភាពដល់អាជីវកម្មតូចធំគ្រប់ប្រភេទ ក្នុងការចូលរួមយ៉ាងសកម្មនៅក្នុងពាណិជ្ជកម្មក្នុងតំបន់ និងពិភពលោក។
