ធនាគារ ABA បន្តរក្សាចំណាត់ថ្នាក់ឥណទានប្រភេទ B+/Stable/B ពីទីភ្នាក់ងារវាយតម្លៃឥណទាន S&P
30/Oct/2026
ធនាគារ ABA បន្តរក្សាចំណាត់ថ្នាក់ឥណទាន ប្រភេទ B+/Stable/B ពីទីភ្នាក់ងារវាយតម្លៃឥណទានឈានមុខរបស់ពិភពលោក S&P ដែលឆ្លុះបញ្ចាំងពីជំហរទីផ្សារដ៏ខ្លាំងក្លា ប្រូហ្វាលមូលនិធិប្បទានដ៏រឹងមាំ និងកម្រិតប្រាក់ចំណេញខ្ពស់ធៀបនឹងដៃគូនានាក្នុងវិស័យធនាគារ ដូចមានបង្ហាញនៅក្នុងរបាយការណ៍ចុងក្រោយបង្អស់របស់ស្ថាប័នវាយតម្លៃនេះ។
ការវាយតម្លៃ អនាគតស្ថិរភាព សម្រាប់ ABA ស្ដែងឲ្យឃើញតាមរយៈទស្សនៈរបស់ S&P ដោយបានវិនិច្ឆ័យគ្រប់ជ្រុងជ្រោយថា ធនាគារនឹងរក្សាបាននូវកំណើនប្រាក់កម្ចីប្រកបដោយចីរភាព ជាមួយនឹងការប្រមូលប្រាក់បញ្ញើបានគ្រប់គ្រាន់ និងស្តង់ដារវាយតម្លៃកម្ចីយ៉ាងគត់មត់រឹងមាំ សម្រាប់រយៈពេល 12ខែ ទៅ 18ខែជាបន្ដទៀត។
S&P ក៏ទទួលស្គាល់ភាពនាំមុខរបស់ធនាគារនៅកម្ពុជា ដោយបានពណ៌នាថា ជាធនាគារមាន “វត្តមានអាជីវកម្មដ៏រឹងមាំនៅកម្ពុជា ជាមួយនឹងមូលដ្ឋានប្រាក់បញ្ញើរូបវន្ដបុគ្គលដ៏រឹងមាំ” ។ គិតត្រឹមថ្ងៃទី31 ខែធ្នូ ឆ្នាំ 2025 ABA មានចំណែកជាង 20% នៃប្រាក់បញ្ញើ និង 17% នៃប្រាក់កម្ចីរបស់កម្ពុជា ដោយបញ្ជាក់ពីជំហររបស់ខ្លួន ជាធនាគារពាណិជ្ជធំជាងគេរបស់កម្ពុជា ទាំងផ្នែកប្រាក់បញ្ញើ និងប្រាក់កម្ចី។
ការបន្ដពង្រីកបណ្តាញឌីជីថល និងបណ្តាញរូបវន្ដ បានជួយពង្រឹងវត្តមានរបស់ ABA ក្នុងទីផ្សារ និងសមត្ថភាពរបស់ធនាគារក្នុងការបម្រើសេវាជូនអតិថិជននៅទូទាំងប្រទេសកម្ពុជា។ របាយការណ៍ S&P បានគូសបញ្ជាក់ពីសារៈសំខាន់ជាយុទ្ធសាស្ត្រនៃសមត្ថភាពឌីជីថលរបស់ ABA ដោយលើកឡើងថា “ផ្លែតហ្វមឌីជីថលដ៏ទូលំទូលាយរបស់ ABA នឹងបន្តជាមូលដ្ឋានគ្រឹះដ៏សំខាន់ក្នុងការគាំទ្រជំហរអាជីវកម្មដ៏រឹងមាំរបស់ធនាគារ។ ការវិនិយោគរបស់ ABA លើបច្ចេកវិទ្យា ទាំងការអភិវឌ្ឍប្រព័ន្ធដោយធនាគារផ្ទាល់ និងកិច្ចសហការជាមួយដៃគូ បានធ្វើឲ្យ ABA ក្លាយជាអ្នកនាំមុខក្នុងវិស័៏យធនាគារនៅកម្ពុជា។ កាណ៍នេះ បានផ្តល់នូវអត្ថប្រយោជន៍ប្រកួតប្រជែង ជាពិសេសក្នុងវិស័យធនាគារប្រតិបត្តិការ”។
ភាពរឹងមាំនៃមូលនិធិប្បទានក៏ជាចំណុចខ្លាំងមួយទៀតរបស់ ABA ផងដែរ។ អនុបាតប្រាក់កម្ចីធៀបនឹងប្រាក់បញ្ញើ (LDR) របស់ធនាគារ នៅរក្សាបានក្រោម 80% ខណៈដែលជាមធ្យមនៅក្នុងវិស័យនេះមានប្រមាណ 114%។ S&P ក៏បានវាយតម្លៃថា ជំហរមូលនិធិប្បទានរបស់ ABA មានភាពរឹងមាំ ដែលគាំទ្រដោយមូលដ្ឋានអាជីវកម្មដ៏រឹងមាំ និងសេវាឌីជីថលដែលទំនើបឈានមុខនៅក្នុងទីផ្សារ។
S&P ក៏បានកត់សម្គាល់ផងដែរថា អត្រាផលចំណេញលើទ្រព្យសកម្មជាមធ្យម របស់ ABA បានរក្សាកម្រិតខ្ពស់គួរឲ្យកត់សម្គាល់លើសមធ្យមភាគនៃវិស័យធនាគារ ដោយបញ្ជាក់ថា ប្រាក់ចំណេញរបស់ ធនាគារ “នឹងបន្តរក្សាភាពរឹងមាំជាងដៃគូប្រកួតប្រជែងនានានៅក្នុងវិស័យធនាគារ”។
លទ្ធផលនៃរបាយការណ៍នេះ បានបង្ហាញតួនាទីដ៏រឹងមាំរបស់ធនាគារ ABA នៅក្នុងវិស័យហិរញ្ញវត្ថុកម្ពុជា ព្រមទាំងការប្ដេជ្ញាចិត្តជាបន្ដបន្ទាប់របស់ធនាគារក្នុងការជំរុញឌីជីថលនវានុវត្តន៍ គាំទ្រកំណើនប្រកបដោយចីរភាព និងផ្តល់នូវសេវាធនាគារដែលងាយស្រួលប្រើប្រាស់ និងងាយទទួលបានសម្រាប់រូបវន្ដបុគ្គល និងអាជីវកម្មនៅទូទាំងប្រទេស។
