ធនាគារ ABA បានចូលរួមក្នុងកម្មវិធី ទិវាប្រាក់រៀល ឆ្នាំ 2026 ដើម្បីជំរុញការប្រើប្រាស់រូបិយប័ណ្ណជាតិ
04/Nov/2026
ធនាគារ ABA បានចូលរួមក្នុងកម្មវិធី ទិវាប្រាក់រៀល ឆ្នាំ 2026 ប្រព្រឹត្តឡើងថ្មីៗនេះក្នុងខេត្តកំពត ដែលបញ្ជាក់ឡើងវិញនូវការប្តេជ្ញាចិត្តក្នុងការលើកកម្ពស់ការប្រើប្រាស់រូបិយប័ណ្ណជាតិ និងគាំទ្រគំនិតផ្តួចផ្តើមដែលទាក់ទងនឹងចំណេះដឹងផ្នែកហិរញ្ញវត្ថុ ទូទាំងប្រទេសកម្ពុជា។
រៀបចំឡើងដោយធនាគារជាតិនៃកម្ពុជា កម្មវិធីនេះ មានការអញ្ជើញចូលរួមក្រោមអធិបតីភាព ឯកឧត្តម យឹម លាត ទេសាភិបាលរង ធនាគារជាតិនៃកម្ពុជា និងឯកឧត្តម ខៀវ រិទ្ធិភ័ណ្ឌ អភិបាលរង នៃគណៈអភិបាលខេត្តកំពត ព្រមទាំងរួមមានតំណាងស្ថាប័នរដ្ឋាភិបាល គ្រឹះស្ថានហិរញ្ញវត្ថុ សិស្សានុសិស្ស និងសាធារណជន ដើម្បីអបអរប្រាក់រៀល និងជំរុញការប្រើប្រាស់ក្នុងប្រតិបត្តិការប្រចាំថ្ងៃ។
ក្នុងរយៈពេលពេញមួយថ្ងៃនោះ ABA បានរាក់ទាក់យ៉ាងសកម្មជាមួយអ្នកចូលរួមនៅបញ្ជររបស់ខ្លួន។ ក្រុមការងារ ABA បានផ្តល់ព័ត៌មានសំខាន់ៗទាក់ទងនឹងគណនីសន្សំជាប្រាក់រៀល សង្កត់ធ្ងន់ទៅលើអត្រាការប្រាក់ខ្ពស់ សម្រាប់គណនីប្រាក់បញ្ញើ ការបើកគណនីរហ័ស និងផ្តល់រង្វាន់ដល់អ្នកចូលរួមផងដែរ។
ស្របទៅនឹងការប្តេជ្ញាចិត្តជាបន្តបន្ទាប់របស់ ABA ក្នុងការលើកកម្ពស់ការប្រើប្រាស់ប្រាក់រៀល ម៉ាស៊ីន ATM ម៉ាស៊ីនដាក់ប្រាក់ និងម៉ាស៊ីនដកប្រាក់របស់ធនាគារ គឺសុទ្ធតែទទួលយក និងចែកចាយក្រដាសប្រាក់រៀល ដែលមានក្រដាសប្រាក់គ្រប់ប្រភេទ។ ការដាក់ដំណើរការម៉ាស៊ីនទាំងនេះ នឹងធានាថាអតិថិជនអាចសន្សំ ដក និងគ្រប់គ្រងហិរញ្ញវត្ថុរបស់ខ្លួនជារូបិយប័ណ្ណជាតិ ដោយងាយស្រួល។
ABA ក៏នឹងចូលរួមកម្មវិធី ទិវាប្រាក់រៀលនៅបណ្តាខេត្តផ្សេងៗ រួមមាន ខេត្តកែប (ថ្ងៃទី6 ខែវិច្ឆិកា) ខេត្តកណ្តាល (ថ្ងៃទី20 ខែវិច្ឆិកា) ខេត្តព្រះសីហនុ (ថ្ងៃទី4 ខែធ្នូ) ខេត្តត្បូងឃ្មុំ (ថ្ងៃទី18 ខែធ្នូ) និងខេត្តកំពង់ចាម (ថ្ងៃទី21 ខែធ្នូ) ។
ABA សូមលើកទឹកចិត្តអ្នកទាំងអស់គ្នាបន្តប្រើប្រាស់ប្រាក់រៀលក្នុងប្រតិបត្តិការប្រចាំថ្ងៃ និងចូលរួមយើងខ្ញុំគាំទ្ររូបិយប័ណ្ណជាតិទាំងអស់គ្នា!
