ក្រុមហ៊ុនអាកាសចរណ៍ Sky Angkor Airlines រួមបញ្ចូល ABA PayWay សម្រាប់ការទូទាត់សំបុត្រយន្តហោះ យ៉ាងងាយស្រួលនិងសុវត្ថិភាព
24/Feb/2025
ធនាគារ ABA ដែលជាធនាគារពាណិជ្ជធំជាងគេនៅកម្ពុជា មានសេចក្តីរីករាយប្រកាសភាពជាដៃគូជាមួយក្រុមហ៊ុនអាកាសចរណ៍ Sky Angkor Airlines ដែលនៅក្នុងចំណោមក្រុមហ៊ុនអាកាសចរណ៍ឈានមុខក្នុងប្រទេស ដើម្បីបង្កើនភាពងាយស្រួលក្នុងការកក់ និងទូទាត់ថ្លៃសំបុត្រយន្តហោះ តាមរយៈ ABA PayWay។
ការរួមបញ្ចូល ABA PayWay នៅលើ គេហទំព័ររបស់ខ្លួន ក្រុមហ៊ុន Sky Angkor នឹងធានានូវបទពិសោធន៍ទូទាត់ប្រាក់យ៉ាងរលូន ជាមួយនឹងប្រព័ន្ធសុវត្ថិភាព និងប្រសិទ្ធភាព ដែលអនុញ្ញាតឲ្យអតិថិជនជ្រើសរើសពីវិធីទូទាត់ឌីជីថលជាច្រើន។ វឌ្ឍនភាពនេះសមស្របទៅតាមការប្តេជ្ញាចិត្តរបស់ក្រុមហ៊ុន ក្នុងការបង្កើនគុណភាពសេវាកម្ម និងការពេញចិត្តរបស់អតិថិជន។
ABA PayWay ផ្តល់នូវភាពងាយស្រួល និងភាពបត់បែនសម្រាប់អាជីវកម្មគ្រប់ប្រភេទ ដែលអនុញ្ញាតឲ្យអតិថិជនធ្វើប្រតិបត្តិការដោយមិនប្រើប្រាស់សាច់ប្រាក់ ទាំងជាលុយរៀល និងដុល្លារ។ ប្រព័ន្ធនេះក៏គាំទ្រមធ្យោបាយទូទាត់ចម្រុះដូចជា ABA PAY, KHQR, AliPay, WeChat Pay, និងកាតអន្តរជាតិដូចជា Visa Mastercard និងកាតផ្សេងៗ។ ដំណោះស្រាយទូទាត់សម្រាប់គ្រប់តម្រូវការនេះ នឹងធានាថាអតិថិជនមានមធ្យោបាយសុវត្ថិភាពជាច្រើន ក្នុងការទូទាត់ប្រតិបត្តិការផ្អែកទៅលើចំណូលចិត្តរបស់ពួកគេផ្ទាល់។
បន្ថែមពីលើភាពងាយស្រួល និងការផ្តោតទៅលើអ្នកប្រើប្រាស់ សុវត្ថិភាពក៏ជាមូលដ្ឋានគ្រឹះនៃ ABA PayWay។ គាំទ្រដោយការរួមបញ្ចូលដែលអនុលោមតាមស្តង់ដា PCI DSS ច្រកទូទាត់នេះអនុញ្ញាតក្រុមហ៊ុនអាកាសចរណ៍ ទទួលដំណើរការការទូទាត់តាមកាតទាំងអស់ក្នុងប្រទេសកម្ពុជា និងបង្កើនការគ្រប់គ្រងប្រតិបត្តិការនិងភាពជឿជាក់។ ជាមួយពិធីការសារសុវត្ថិភាពឈានមុខគេក្នុងវិស័យ អតិថិជនអាចធានាបាននូវទំនុកចិត្ត ដោយដឹងថាប្រតិបត្តិការនិងព័ត៌មានផ្ទាល់ខ្លួនត្រូវបានការពារយ៉ាងពេញលេញ។
សម្រាប់ព័ត៌មានបន្ថែមអំពី ABA PayWay សូមទៅកាន់គេហទំព័រ www.payway.com.kh/km
