​សេចក្តី​ប្រកាស​ព័ត៌មាន​អំពី​ការ​បន្លំ​ក្រដាសប្រាក់​ក្លែងក្លាយ​

08/04/2019

Public Annountment 08 April 2019 3

អតិថិជន​ និង​បងប្អូន​អ្នកគាំទ្រ​ធនាគារ​ ABA​ ជាទី​គោរព​!
​យើងខ្ញុំ​សូម​ជម្រាប​ថា​ កាលពី​ថ្ងៃ​ទី​ 6​ ខែមេសា​ លោក​ Peter​ Hofer​ ដែល​ជា​ជនជាតិ​ស្វ៊ី​ស​ បាន​អះអាង​ថា​ គាត់​បាន​ទទួល​ក្រដាសប្រាក់​ 100​ ដុល្លារ​ ដែល​មាន​ពាក្យ​ COPY​ (​លេខ​មាលា​ HH​ 26841921​ E)​ ពី​ម៉ាស៊ីន​ ATM​ ដែល​មា​នទី​តាំងនៅ​ក្នុង​សាខា​ធនាគារ​ ABA​ ផ្សារ​ធំ​ថ្មី​។

ភ្លាមៗ​ក្រោយ​ពី​បាន​ទទួល​ពាក្យបណ្តឹង​ ក្រុមការងារ​ពាក់ព័ន្ធ​របស់​ធនាគារ​ បាន​ធ្វើការ​ស៊ើបអង្កេត​យ៉ាង​ហ្មត់ចត់​។​ ដំបូង​ យើង​រក​ឃើញ​ថា​ លេខ​មាលា​របស់​ក្រដាសប្រាក់​ដុល្លារ​ដែល​ភ្ញៀវ​បាន​រាយការណ៍​មក​នោះ​ មិន​មាននៅ​ក្នុង​កំណត់​ត្រា​ក្រដាសប្រាក់​ដែល​ចេញពី​ប្រព័ន្ធ​របស់​យើងខ្ញុំ​ឡើយ​។​ បន្ថែម​ពីលើ​នោះ​ទៀត​ រូបភាព​វី​ដេ​អូ​កាមេរ៉ា​សុវត្ថិភាព​របស់​យើង​បាន​បង្ហាញ​ថា​ ការ​ពិត​លោក​ Hofer​ បាន​ទទួល​ក្រដាសប្រាក់​ពិត​ចេញពី​ម៉ាស៊ីន​ ATM​ ហើយ​បន្ទាប់​មក​បាន​ដូរ​វា​ជាមួយ​ក្រដាស​លុយ​ COPY​ ដែល​យក​ចេញពី​កាបូបស្ពាយ​របស់​គាត់​។​

បន្ទាប់​ពី​កា​រសើប​អង្កេត​ នៅ​ថ្ងៃ​តែ​មួយ​នោះ​ ក្រុមការងារ​របស់​យើង​បាន​អញ្ជើញលោក​ Hofer​ មក​កាន់​សាខា​របស់​យើង​ ហើយ​យើង​បាន​បង្ហាញ​គាត់​នូវ​រាល់​ភ័ស្តុតាង​នៃ​ការ​បន្លំ​របស់​គាត់​ និង​បាន​សួរនាំ​គាត់​អំពី​ករណី​នេះ​។​ លោក​ Hofer​ បាន​សារភាព​ថា​គាត់​ពិតជា​បាន​ព្យាយាម​បោកប្រាស់​ធនាគារ​មែន​។​ ជា​លទ្ធផល​ ក្រុម​សន្តិសុខ​របស់​ធនាគារ​ ABA​ បាន​បញ្ជូន​គាត់​ទៅ​អធិការដ្ឋាន​នគរបាល​ខណ្ឌដូនពេញ​ ដើម្បី​ចាត់វិធានការ​បន្ត​រួម​ជាមួយនឹង​អំណះអំណាង​ និង​ភ័ស្តុតាង​ផ្សេងៗ​។​

នៅ​ថ្ងៃ​ ចន្ទ​ ទី​08​ ឆ្នាំ​ 2019​ ប៉ូ​លី​ស​ក៏​បាន​បញ្ជូន​លោក​ Hofer​ ទៅ​កាន់​សាលាដំបូង​រាជធានី​ភ្នំពេញ​ ដើម្បី​ធ្វើការ​សាកសួរ​។​ គាត់​ត្រូវ​បាន​ជាប់​សង្ស័យ​ពី​ការ​ប្រព្រឹត្តិ​បទល្មើស​ព្រហ្មទណ្ឌ​ ដែល​មាន​ចែង​នៅ​ក្នុង​មាត្រា​ 377​ និង​ 378​ នៃ​ក្រមព្រហ្មទណ្ឌ​ (​អំពើ​ឆបោក​)​ ត្រូវ​ផ្តន្ទាទោស​ជាប់​ពន្ធនាគារ​ពី​ 6​ខែ​ ទៅ​ 3​ឆ្នាំ​ និង​ពិន័យ​ជា​ប្រាក់​ចាប់ពី​ 1​លាន​រៀល​ ទៅ​ដល់​ 6​លាន​រៀល​។​ ក្រុម​អ្នក​ច្បាប់​របស់​ធនាគារ​ ABA​ នឹង​បន្ត​ធ្វើការ​សហការ​ជាមួយ​ភ្នាក់ងារ​អនុវត្ត​ច្បាប់​ក្នុង​តំបន់​ ហើយ​យើង​នឹង​ធ្វើ​បច្ចុប្បន្នភាព​ព័ត៌មាន​ជូន​លោក​អ្នក​នៅ​ពេល​បន្ត​ទៀត​។​

​ឆ្លៀត​ក្នុង​ឱកាស​នេះ​ យើងខ្ញុំ​ក៏​សូម​ធ្វើការ​បដិសេធ​យ៉ាង​ម៉ឺងម៉ាត់​ ចំពោះ​ការ​ផ្សព្វផ្សាយ​ព័ត៌មាន​ទាំងឡាយ​ណា​ ដែល​ធ្វើការ​ចោទប្រកាន់​ធនាគារ​ពាក់ព័ន្ធ​នឹង​ករណី​ក្រដាសប្រាក់​ដែល​មិន​អាច​ប្រើប្រាស់​បាន​នេះ​ផង​ដែរ​។​ យើង​នៅ​តែ​ជឿជាក់​ថា​ វា​គឺជា​ផែនការ​ទុច្ចរិត​ ដែល​មាន​គោលបំណង​បង្ខូចកេរ្តិ៍​ឈ្មោះ​របស់​ធនាគារ​ និង​យើង​សូម​រក្សារ​សិទ្ធិ​បញ្ជូន​ករណី​បែប​នេះ​ទៅ​កាន់​អាជ្ញាធរ​ក្នុង​តំបន់​ និង​ចាត់វិធានការ​ចំពោះ​ករណី​ចោទប្រកាន់​បែប​នេះ​ ទៅ​តាម​ទំហំ​ដែល​ផ្លូវច្បាប់​អនុញ្ញាត​។

ធនាគារ​ ABA​ ក៏​សូម​ធ្វើការ​រំលឹក​ដល់​អតិថិជន​ សូម​ត្រួតពិនិត្យ​ និង​រាប់​លុយ​របស់​ខ្លួន​ឲ្យ​បាន​ច្បាស់​ មុន​នឹង​ចេញពី​ម៉ាស៊ីន​ ATM​ ឬ​ បញ្ជរ​របស់​ធនាគារ​ ព្រោះថា​ ធនាគារ​មិន​ទទួលខុសត្រូវ​ឡើយ​ចំពោះ​បញ្ហា​ដែល​កើត​មាន​បន្ទាប់​ពី​ភ្ញៀវ​ចាកចេញ​។​