PayWay អនុញ្ញាតឲ្យមានការទូទាត់ ថ្លៃសេវាចុះបញ្ជីអាជីវកម្មនៅលើ Single Portal របស់ក្រសួងសេដ្ឋកិច្ច និងហិរញ្ញវត្ថុ
15/Jun/2020
ធនាគារ ABA ជាគ្រឹះស្ថានហិរញ្ញវត្ថុនាំមុខផ្នែកហិរញ្ញវត្ថុឌីជីថល មានសេចក្តីរីករាយក្នុងការប្រកាសភាពជាដៃគូជាមួយរាជរដ្ឋាភិបាលកម្ពុជាក្នុងការសម្រួលដល់ការប្រមូលការទូទាត់នៅលើថ្នាលបច្ចេកវិទ្យាព័ត៌មាន Single Portal ដែលទើបតែប្រកាសដាក់ដំណើរការសម្រាប់ការចុះបញ្ជីអាជីវកម្មអនឡាញដែលបង្កើតឡើងដោយក្រសួងសេដ្ឋកិច្ច និងហិរញ្ញវត្ថុដោយមានកិច្ចសហប្រតិបត្តិការជាមួយក្រសួង និងទីភ្នាក់ងាររដ្ឋាភិបាលជាច្រើនផ្សេងទៀត។
ដោយមានការគាំទ្រពី PayWay ជាប្រព័ន្ធទូទាត់តាមអនឡាញដែលទទួលបានពានរង្វាន់របស់ធនាគារ ABA ថ្នាលប្រព័ន្ធបច្ចេកវិទ្យាព័ត៌មាន Single Portal ជាដំណោះស្រាយតាមអនឡាញរួមមួយសម្រាប់ការចុះបញ្ជីអាជីវកម្ម ការបង់ពន្ធ និងការបង់ថ្លៃសេវា ព្រមទាំងការទូទាត់ផ្សេងៗពីម្ចាស់អាជីវកម្ម និងអ្នកបង់ពន្ធ។
ថ្នាលប្រព័ន្ធបច្ចេកវិទ្យាព័ត៌មាននេះត្រូវបានបង្កើតឡើង ដើម្បីជំនួស និងសម្រាលបញ្ហាប្រឈមនានាក្នុងការចុះបញ្ជីពាណិជ្ជកម្មដោយផ្ទាល់ តាមរយៈការបង្កើតប្រព័ន្ធអនឡាញរួមមួយដែលភ្ជាប់ទៅនឹងក្រសួង និងភ្នាក់ងាររដ្ឋាភិបាលផ្សេងៗជាច្រើន ដូចជា ក្រសួងពាណិជ្ជកម្ម អគ្គនាយកដ្ឋានពន្ធដារ ក្រសួងការងារ និងបណ្តុះបណ្តាលវិជ្ជាជីវៈ និងក្រុមប្រឹក្សាអភិវឌ្ឍន៍កម្ពុជា។
ដោយមានក្រសួងជាច្រើននឹងភ្ជាប់បន្ថែមទៀត នោះម្ចាស់អាជីវកម្មកម្ពុជានឹងអាចធ្វើការទូទាត់នានាពាក់ព័ន្ធនឹងការចុះបញ្ជីអាជីវកម្មរបស់ពួកគេ និងការទូទាត់ជាប្រាក់រៀលខ្មែរ ដោយប្រើប្រាស់ ABA PAY ដែលជាប្រព័ន្ធទូទាត់បែបឌីជីថលរបស់កម្មវិធី ABA Mobile ឬកាត Visa កាត Mastercard ឬកាត UnionPay International របស់ពួកគេ។
ការទូទាត់អាចធ្វើទៅបានដោយសុវត្ថិភាពបានគ្រប់ពេលវេលាតាមរយៈ www.registrationservices.gov.kh ។ សម្រាប់ព័ត៌មានបន្ថែមអំពីការចុះបញ្ជីសេវាកម្ម និងថ្លៃសេវារបស់ក្រសួងនីមួយៗ សូមចុច ត្រង់នេះ។
