ធនាគារជាតិកាណាដា ធនាគារ ABA និង ទីភ្នាក់ងារឧត្តមសិក្សាប្រើប្រាស់ភាសារបារាំង (AUF) បានដាក់ឲ្យដំណើរការកម្មវិធីផ្តល់អាហារូបករណ៍សម្រាប់និស្សិតកម្ពុជា
13/Nov/2026
ធនាគារជាតិកាណាដា ដែលជាភាគទុនិករបស់ធនាគារ ABA បានសហការជាមួយទីភ្នាក់ងារឧត្តមសិក្សាប្រើប្រាស់ភាសារបារាំង (Agence Universitaire de la Francophonie - AUF) ដើម្បីដាក់ឲ្យដំណើរការកម្មវិធីអាហារូបករណ៍កាណាដា-កម្ពុជា ដែលជាគំនិតផ្តួចផ្តើមថ្មីមួយបង្កើតឡើងដើម្បីគាំទ្រដល់និស្សិតកម្ពុជា ក្នុងការស្វែងរកឱកាសសិក្សា និងធ្វើការស្រាវជ្រាវនៅតាមសាកលវិទ្យាល័យនានាក្នុងប្រទេសកាណាដា។
កម្មវិធីនេះត្រូវបានប្រកាសនៅក្នុងសន្និសីទពេញអង្គលើកទី ៣ នៃសន្និសីទថ្នាក់តំបន់អាស៊ី-ប៉ាស៊ីហ្វិករបស់សាកលវិទ្យាធិការ (C2R) ដែលបានរៀបចំឡើងនៅវិទ្យាស្ថានបច្ចេកវិទ្យាកម្ពុជា (ITC)។ កម្មវិធីនេះឆ្លុះបញ្ចាំងពីការប្តេជ្ញាចិត្តរួមគ្នាក្នុងការអភិវឌ្ឍធនធានមនុស្សដែលមានជំនាញខ្ពស់ និងការពង្រឹងកិច្ចសហប្រតិបត្តិការផ្នែកសិក្សាធិការរវាងប្រទេសកម្ពុជា និងប្រទេសកាណាដា។
កម្មវិធីនេះទទួលបានការផ្តល់មូលនិធិពីធនាគារជាតិកាណាដា ដោយមានទំហំវិនិយោគសរុបចំនួន ៥០០.០០០ ដុល្លារកាណាដា (ប្រហែល ៣៦៥.០០០ ដុល្លារអាមេរិក) ក្នុងរយៈពេល ៥ ឆ្នាំ។ កម្មវិធីនេះមានគោលបំណងគាំទ្រដល់និស្សិតកម្ពុជាចំនួនរហូតដល់ ៤០ នាក់ តាមរយៈឱកាសផ្លាស់ប្តូរការសិក្សា និងការស្រាវជ្រាវនៅតាមសាកលវិទ្យាល័យនានាក្នុងប្រទេសកាណាដាដែលត្រូវបានជ្រើសរើស។
ក្រោមកម្មវិធីនេះ និស្សិតកម្ពុជាដែលកំពុងសិក្សានៅតាមសាកលវិទ្យាល័យជាសមាជិករបស់ AUF នឹងមានឱកាសចូលរួមអនុវត្តការងារស្រាវជ្រាវរយៈពេលពី ៣ ទៅ ៦ ខែ។ វិស័យអាទិភាពរួមមាន រដ្ឋបាលធុរកិច្ច ហិរញ្ញវត្ថុ សេដ្ឋកិច្ច សន្តិសុខបច្ចេកវិទ្យា (Cybersecurity) ការគ្រប់គ្រង និងបច្ចេកវិទ្យាបញ្ញាសិប្បនិម្មិត (AI) ព្រមទាំងមុខជំនាញផ្សេងទៀតដែលពាក់ព័ន្ធនឹងអនាគតនៃវិស័យហិរញ្ញវត្ថុ និងសេដ្ឋកិច្ចឌីជីថល។
កម្មវិធីនេះនឹងត្រូវបានអនុវត្តដោយ AUF ដែលនឹងទទួលបន្ទុកលើការផ្សព្វផ្សាយអាហារូបករណ៍ ការជ្រើសរើសបេក្ខជន ការសម្របសម្រួលជាមួយសាកលវិទ្យាល័យ ការគាំទ្រដល់អ្នកចូលរួម និងផ្នែកដែលទាក់ទងនឹងភាសានៃគំនិតផ្តួចផ្តើមនេះ។ ស្របតាមបេសកកម្មរបស់ AUF ក្នុងការលើកកម្ពស់ភាសាបារាំង និងបណ្តាប្រទេសដែលប្រើប្រាស់ភាសាបារាំង (Francophonie) អ្នកទទួលបានអាហារូបករណ៍ដែលមិនចេះភាសាបារាំង ក៏នឹងទទួលបានឱកាសក្នុងការរៀនភាសាបារាំង និងទទួលបានវិញ្ញាបនបត្របញ្ជាក់ផងដែរ។
លោក Igor Zimarev អគ្គនាយករងប្រតិបត្តិ និងជានាយកទីផ្សារ កិច្ចការ CSR របស់ធនាគារ ABA បានលើកឡើងថា៖ «យើងជឿជាក់យ៉ាងមុតមាំថា ការអប់រំគឺជាកត្តាជំរុញដ៏មានឥទ្ធិពលបំផុតមួយសម្រាប់វឌ្ឍនភាពសេដ្ឋកិច្ច។ យើងសង្ឃឹមថា សិស្សនិស្សិតកម្ពុជាដែលទទួលបានអត្ថប្រយោជន៍ពីគំនិតផ្តួចផ្តើមនេះ នឹងត្រឡប់មកវិញដោយនាំមកនូវចំណេះដឹងដ៏មានតម្លៃ បទពិសោធន៍អន្តរជាតិ និងគំនិតថ្មីៗ ហើយនឹងចូលរួមចំណែកដល់ការអភិវឌ្ឍសេដ្ឋកិច្ច វិស័យធុរកិច្ច និងសង្គមរបស់ប្រទេសជាតិ»។
ក្នុងនាមជាស្ថាប័នបុត្រសម្ព័ន្ធរបស់ធនាគារជាតិកាណាដា និងជាស្ថាប័នហិរញ្ញវត្ថុដ៏ធំជាងគេនៅកម្ពុជា ធនាគារ ABA ដើរតួនាទីជាស្ពានតភ្ជាប់រវាងប្រទេសទាំងពីរ ដោយជួយសម្រួលដល់គំនិតផ្តួចផ្តើមនានាដែលរួមចំណែកដល់វិស័យអប់រំ នវានុវត្តន៍ និងការអភិវឌ្ឍធនធានមនុស្ស។
