គ្រប់គ្រងកាតឥណពន្ធរបស់លោកអ្នកតាមកម្មវិធី ABA Mobile!
26/May/2020
ដើម្បីធ្វើឲ្យបទពិសោធសេវាធនាគារតាមទូរស័ព្ទរបស់អតិថិជនយើងកាន់តែប្រសើរឡើង ធនាគារ ABA នាំមកនូវមុខងារថ្មីចំនួនបួនក្នុងការគ្រប់គ្រងកាតឥណពន្ធនៅក្នុងកម្មវិធី ABA Mobile ដូចខាងក្រោម៖
គ្រប់គ្រងកម្រិតប្រតិបត្តិការ (ទូទាត់/ដកប្រាក់)
អ្នកអាចកែប្រែចំនួនទឹកប្រាក់កំណត់សម្រាប់ប្រតិបត្តិការកាតរបស់អ្នក ឬបង្កើនកម្រិតទឹកប្រាក់ប្រតិបត្តិការអតិបរមាជាបណ្តោះអាសន្ន តាមប្រភេទកាតរបស់អ្នក។ កម្រិតប្រតិបត្តិការដែលបានបង្កើន នឹងមានសុពលភាពអំឡុងថ្ងៃដែលបានធ្វើការកែប្រែនោះតែប៉ុណ្ណោះ។
ប្ដូរលេខសម្ងាត់ (PIN) កាត
ដើម្បីសុវត្ថិភាព យើងខ្ញុំសូមលើកទឹកចិត្តឲ្យលោកអ្នកផ្លាស់ប្តូរលេខសម្ងាត់ (PIN) កាតរបស់លោកអ្នក ហើយឥឡូវនេះលោកអ្នកអាចផ្លាស់ប្តូរលេខសម្ងាត់ (PIN) កាតរបស់លោកអ្នកបានគ្រប់ពេលវេលា ហើយមិនចាំបាច់អញ្ជើញមកកាន់សាខាធនាគារ ឬម៉ាស៊ីន ATM ឡើយ។
ប្តូរគណនីភ្ជាប់កាត
ប្រសិនបើគណនីធនាគារដែលភ្ជាប់ទៅកាន់កាតមិនមានសមតុល្យគ្រប់គ្រាន់ទេ លោកអ្នកអាចភ្ជាប់កាតជាមួយគណនីមួយទៀតបានយ៉ាងងាយស្រួល។
បិទកាត
ប្រសិនបើកាតរបស់លោកអ្នកលែងប្រើប្រាស់ទៀតហើយ លោកអ្នកអាចជ្រើសរើសបិទកាត1 ជាអចិន្ត្រៃយ៍បាន។
លោក Zokhir Rasulov នាយកឌីជីថលរបស់ធនាគារ ABA បានមានប្រសាសន៍ថា “នៅក្នុងសេវាធនាគារ បណ្តាញឌីជីថលនឹងបន្តរីកចម្រើនបន្ថែមទៀត ស្របតាមការរស់នៅ និងចំណង់ចំណូលចិត្តរបស់ប្រជាជនកំពុងតែវិវឌ្ឍ និងផ្លាស់ប្តូរ ដោយសារតែស្ថានភាពនៃវីរុសកូវីដ-19។ ចំណុចនេះជំរុញឲ្យយើងប្រឹងប្រែងបន្ថែមទៀតដើម្បីផ្តល់សេវាកម្ម និងមុខងារថ្មីៗដែលធ្វើឲ្យជីវិតរស់នៅប្រចាំថ្ងៃរបស់អ្នកប្រើប្រាស់កម្មវិធីទូរស័ព្ទរបស់យើងកាន់តែប្រសើរឡើង។”
លោកបានបន្ថែមទៀតថា “យើងពិតជាមានសេចក្ដីរីករាយដែលជានិច្ចកាល យើងមានលទ្ធភាពផ្តល់នូវបទពិសោធសេវាធនាគារតាមទូរស័ព្ទមានលក្ខណៈពេញលេញ ពីព្រោះយើងយល់ច្បាស់ពីតម្រូវការផ្សេងៗគ្នារបស់អតិថិជនយើង។ ការពង្រឹងឧបករណ៍គ្រប់គ្រងកាត ដោយបន្ថែមមុខងារថ្មីៗនៅក្នុងកម្មវិធីរបស់យើងគ្រាន់តែជាចំណុចតូចមួយប៉ុណ្ណោះ។ មុខងារថ្មីទាំងនេះផ្តល់ឲ្យអតិថិជននូវភាពងាយស្រួល និងទំនុកចិត្តក្នុងការប្រើប្រាស់កាត ABA ខណៈពេលធ្វើដំណើរ ឬទិញទំនិញ។”
ដើម្បីទទួលបានមុខងារថ្មីទាំងអស់នេះ សូមធ្វើបច្ចុប្បន្នភាព កម្មវិធី ABA Mobile របស់លោកអ្នកឲ្យដល់សំណៅចុងក្រោយបង្អស់។ ត្រង់នេះជាព័ត៌មានបន្ថែមអំពី កម្មវិធី ABA Mobile និងកាតឥណពន្ធ ABA ។
សូមអរគុណសម្រាប់ការប្រើប្រាស់សេវាធនាគារយើងខ្ញុំ!
1 សូមបញ្ជាក់ថា កាតបិទហើយ មិនអាចបើកវិញបានទេ ដូច្នេះលោកអ្នកនឹងមិនអាចប្រើប្រាស់កាតនោះបានទៀតឡើយ។ ដូច្នេះ ប្រសិនបើកាតរបស់លោកអ្នកបាត់ ការបង្កកកាត ជាបណ្តោះអាសន្ន ជាជម្រើសដ៏ល្អមួយ។
