លើកកម្ពស់ពាណិជ្ជកម្មក្នុងស្រុក៖ ABA ឧបត្ថម្ភពិព័រណ៍ផលិតផលខ្មែរ 2025 របស់សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC)
18/Sep/2025
ក្នុងកិច្ចប្រឹងប្រែងលើកកម្ពស់ផលិតផលជាតិ និងសហគ្រិនភាព ធនាគារ ABA បានក្លាយជាអ្នកឧបត្ថម្ភធំ Diamond Sponsor របស់ពិព័រណ៍ផលិតផលខ្មែរ 2025 រៀបចំដោយសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC)។
ប្រព្រឹត្តទៅកាលពីថ្ងៃទី11-13 ខែកញ្ញា ឆ្នាំ 2025 កន្លងទៅនេះ ការតាំងពិព័រណ៍រយៈពេលបីថ្ងៃនេះ មានការអញ្ជើញចូលរួមជាអធិបតីដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រមទាំងភ្ញៀវកិត្តិយសដទៃទៀត នៅមជ្ឈមណ្ឌលសាលសន្និបាទ និងពិព័រណ៍កោះពេជ្រ។
ការតាំងពិព័រណ៍នេះ មានស្តង់ និងបញ្ជរចំនួនប្រមាណ 300 ដែលបានចូលរួមដាក់បង្ហាញផលិតផលខ្មែរចម្រុះជាច្រើនប្រភេទ រួមមានពីអាជីវកម្មតូចៗ សហគ្រាសធុនតូច និងមធ្យមដែលកំពុងរីកលូតលាស់ និងសហគ្រាសដែលមានកិត្តិនាមក្នុងប្រទេសស្រាប់។ គំនិតផ្តួចផ្តើមនេះ មិនត្រឹមតែបានបង្ហាញផ្សព្វផ្សាយផលិតផលជាតិដល់ប្រជាជនឲ្យបានស្គាល់ប៉ុណ្ណោះទេ ប៉ុន្តែក៏បានដើរតួជាវេទិកាសម្រាប់ការពង្រីកទីផ្សារ និងឱកាសទីផ្សារអន្តរជាតិផងដែរ។
ជាផ្នែកមួយនៃការឧបត្ថម្ភនេះ កូដ KHQR របស់ ABA បានប្រើប្រាស់ជាវិធីទូទាត់ផ្តាច់មុខ នៃកម្មវិធី ដែលអនុញ្ញាតឲ្យអ្នកចូលរួម ទូទាត់ប្រាក់បានភ្លាមៗនៅគ្រប់ស្តង់ ប្រកបដោយភាពងាយស្រួល និងសុវត្ថិភាព ព្រមទាំងជំរុញប្រតិបត្តិការដោយមិនប្រើប្រាស់ក្រដាសប្រាក់។ លើសពីនេះទៀត ធនាគារក៏បានរៀបចំបញ្ជរនៅទីតាំងផ្ទាល់ សម្រាប់ផ្តល់ព័ត៌មានបន្ថែមទៅលើផលិតផល និងសេវាកម្ម ដើម្បីបំពេញតម្រូវការរបស់អាជីវករ និងអាជីវកម្មនានា។
ទៅថ្ងៃអនាគត ABA នឹងបន្តដើរតួជាដៃគូសហការដែលមានទំនុកចិត្តសម្រាប់រដ្ឋាភិបាលកម្ពុជា និងសហគមន៍អាជីវកម្មក្នុងស្រុក ដោយផ្តល់នូវដំណោះស្រាយហិរញ្ញវត្ថុដែលមានវានុវត្ត និងការណែនាំបែបយុទ្ធសាស្ត្រ ដែលជំរុញដល់ការអភិវឌ្ឍប្រកបដោយចីរភាព និងវឌ្ឍនភាពយូរអង្វែង។
