សាខា ABA សៀមរាបទាំងអស់ ឥឡូវនេះបើកបម្រើសេវា 12/7 ជូនអតិថិជន
02/Dec/2019
ដើម្បីឆ្លើយតបនឹងតម្រូវការកើនឡើង ផ្នែកសេវាធនាគារដែលមានគុណភាពនៅក្នុងទីរួមខេត្តសៀមរាប ធនាគារ ABA ថ្ងៃនេះ សូមធ្វើការប្រកាសពង្រីកម៉ោងបម្រើសេវារបស់ខ្លួននៅសាខាពីរទៀត គឺ សាខាផ្សារលើ និង សាខាក្រុងសៀមរាប (អង្គរ) ដើម្បីផ្តល់ភាពងាយស្រួល និងភាពបត់បែនជូនដល់អតិថិជន។ សាខាទាំងពីរនាពេលនេះ បើកបម្រើអតិថិជនចាប់ពីម៉ោង 8ព្រឹក ដល់ម៉ោង 8ល្ងាច និងរៀងរាល់ថ្ងៃចន្ទ ដល់ថ្ងៃអាទិត្យ។
សាខាទាំងពីរក៏ទទួលបានម៉ាស៊ីន ATM ម៉ាស៊ីនដាក់ប្រាក់ និងម៉ាស៊ីនដាក់/ដកប្រាក់បន្ថែម ដើម្បីផ្តល់ភាពងាយស្រួល ជូនដល់អតិថិជនក្នុងការចូលប្រើប្រាស់គណនីរបស់ពួកគេបាន 24ម៉ោង លើ 24ម៉ោង ខណៈពេលដែលសាខាផ្សារលើ ត្រូវបានបន្ថែមកន្លែងបេឡាករ និងបញ្ជរបម្រើអតិថិជន ដើម្បីផ្តល់សេវាគ្រប់គ្រាន់ និងឆាប់រហ័សជូនដល់អតិថិជននៅក្នុងតំបន់ដ៏មមាញឹកនេះ។
“បច្ចុប្បន្ននេះ ខេត្តសៀមរាបមានការរីកចម្រើនគួរឲ្យកត់សម្គាល់ ហើយអតិថិជនរបស់យើងក៏មានការកើនឡើងផងដែរ។ ជាមួយនឹងកំណើននៃតម្រូវការផ្នែកសេវាធនាគារពីមួយថ្ងៃទៅមួយថ្ងៃ យើងបានសម្រេចចិត្តពង្រីកម៉ោងធ្វើការនៅសាខាពីរនេះ ដែលធ្វើឲ្យសាខាទាំងបីរបស់ធនាគារ ABA នៅទីរួមខេត្តសៀមរាប គឺបើកបម្រើសេវាជូនអតិថិជន 12ម៉ោងក្នុងមួយថ្ងៃ និងជារៀងរាល់ថ្ងៃតែម្តង” នេះបើតាមប្រសាសន៍របស់លោក យិន ចិន្តាភក្តី ប្រធានសាខាថ្នាក់តំបន់ប្រចាំខេត្តសៀមរាប។
អតិថិជនឥឡូវនេះ អាចមកប្រើប្រាស់ផលិតផល និងសេវាកម្មគ្រប់បែបយ៉ាងរបស់ធនាគារ ABA បន្ទាប់ពីម៉ោងធ្វើការ ឬនៅចុងសប្តាហ៍បាន នៅអាសយដ្ឋានទាំងបីខាងក្រោម
- សាខាសៀមរាប៖ ផ្ទះលេខ 01-04 ផ្លូវទេពវង្ស ភូមិមណ្ឌលពីរ សង្កាត់ស្វាយដង្គំ ក្រុងសៀមរាប។ លេខទំនាក់ទំនង 098 203 829។
- សាខាក្រុងសៀមរាប (អង្គរ)៖ ភូមិមណ្ឌលបី សង្កាត់ស្លក្រាម ក្រុងសៀមរាប។ លេខទំនាក់ទំនង 098 203 089។
- សាខាផ្សារលើ៖ ផ្ទះលេខ 597 ផ្លូវជាតិលេខ 6 ក្រុម 8 ភូមិចុងកៅស៊ូ សង្កាត់ស្លក្រាម ក្រុងសៀមរាប។ លេខទំនាក់ទំនង 098 203 679។