ABA គាំទ្រសហគ្រិនស្ដ្រី តាមរយៈការឧបត្ថម្ភក្នុងកម្មវិធី ពិព័រណ៍ផលិតផលសហគ្រិនស្ត្រី 2023
03/Apr/2023
ABA ដែលជាធនាគារពាណិជ្ជធំបំផុតមួយនៅកម្ពុជា1 មានមោទនភាព ដែលបានក្លាយជាអ្នកឧបត្ថម្ភមួយ នៅក្នុងកម្មវិធី ពិព័រណ៍ផលិតផលសហគ្រិនស្ត្រី 2023 (CWEA Expo)។ ពិព័រណ៍នេះ បានប្រព្រឹត្តទៅ ពីថ្ងៃទី 29 ដល់ 31 ខែមីនា ឆ្នាំ 2023 នៅផ្សារទំនើបអូឡាំព្យា រាជធានីភ្នំពេញ។
ពិព័រណ៍ផលិតផលសហគ្រិនស្ត្រី ដែលមានរយៈពេល 3 ថ្ងៃនេះ ធ្វើឡើងក្នុងគោលបំណងគាំទ្រ និងបង្កើនភាពអង់អាចរបស់សហគ្រិនស្ដ្រី ដោយផ្ដល់ទីតាំង (ស្តង់) មួយ ដើម្បីឲ្យពួកគាត់ដាក់បង្ហាញផលិតផល និងសេវាកម្មរបស់ខ្លួន, ផ្លាស់ប្ដូរមតិយោបល់ និងកសាងបណ្ដាញ និងទំនាក់ទំនង ក្នុងចំណោមសហគ្រិនស្ដ្រីផងដែរ។ ពិព័រណ៍នេះមានស្ដង់ប្រមាណ 100 ដែលអនុញ្ញាតឲ្យសហគ្រាស ដែលគ្រប់គ្រងដោយស្ដ្រី ដាក់បង្ហាញផលិតផលដែលមានគុណភាពខ្ពស់។
ក្នុងនាមជា Gold Sponsor ធនាគារ ABA បានគាំទ្រកម្មវិធីនេះ និងលើកកម្ពស់សហគ្រិនភាពស្ដ្រីនៅក្នុងប្រទេសកម្ពុជា។ ការចូលរួមរបស់ធនាគារ ក៏បានបង្ហាញនូវឆន្ទៈរបស់ខ្លួន ក្នុងការគាំទ្រសហគមន៍ និងសហគ្រិននៅក្នុងប្រទេសកម្ពុជា ក៏ដូចជាការប្ដេជ្ញាចិត្តរបស់ធនាគារ ក្នុងការលើកកម្ពស់កំណើនសេដ្ឋកិច្ច ប្រកបដោយចីរភាព និងសមភាពយេនឌ័រ។
លោកស្រី ធាម រមណីយ នាយិកាទំនាក់ទំនងគូភាគី និងប្រធានគ្រប់គ្រងតំបន់ នៃធនាគារ ABA មានប្រសាសន៍ថា “ធនាគារ ABA មានកិត្តិយសក្រៃលែង ដែលបានចូលរួមចំណែកក្នុងពិព័រណ៍ផលិតផលសហគ្រិនស្ត្រី 2023 នេះ និងមានឱកាសក្នុងការលើកកម្ពស់សហគ្រិនភាពស្ដ្រី នៅក្នុងប្រទេសកម្ពុជា។”
លោកស្រីបានបន្ដថា “យើងខ្ញុំយល់ថា ការគាំទ្រសហគមន៍មូលដ្ឋាន ក៏ដូចជាសហគ្រិននៅក្នុងប្រទេស ពិតជាមានសារៈសំខាន់ ហើយយើងខ្ញុំនៅតែប្ដេជ្ញារួមចំណែក ដល់កំណើនសេដ្ឋកិច្ច និងសមភាពយេនឌ័រនៅក្នុងប្រទេស”។
1 ABA ជាធនាគារពាណិជ្ជកម្ពុជាដ៏ធំបំផុតគិតលើទ្រព្យសកម្ម, ប្រាក់បញ្ញើ, កម្ចីដុល, ប្រាក់បញ្ញើអតិថិជននិងប្រាក់ចំណេញ ផ្អែកលើរបាយការណ៍ត្រួតពិនិត្យប្រចាំឆ្នាំ 2021 របស់ធនាគារជាតិនៃកម្ពុជា។