ABA គាំទ្រមហោស្រពសហគ្រិនវ័យក្មេងអាស៊ាន 2022
15/Nov/2022
ធនាគារ ABA ដែលជាធនាគារពាណិជ្ជធំជាងគេនៅកម្ពុជា1 បានធ្វើជា Gold Sponsor នៃមហោស្រពសហគ្រិនវ័យក្មេងអាស៊ាន (AYE) 2022។ មហោស្រពនេះ ត្រូវបានប្រព្រឹត្តិទៅកាលពីថ្ងៃទី 12-13 ខែវិច្ឆិកា នៅរាជធានីភ្នំពេញ ស្របគ្នានឹងឱកាសដែលកម្ពុជាធ្វើជាម្ចាស់ផ្ទះសម្រាប់កិច្ចប្រជុំកំពូលអាស៊ាន 2022។
មហោស្រព AYE ប្រមូលផ្តុំដោយសហគ្រិនវ័យក្មេង ពីសមាជិកក្រុមប្រឹក្សាសហគ្រិនវ័យក្មេងអាស៊ាន (AYEC) និងដៃគូសន្ទនារបស់ខ្លួន។ មហោស្រពនេះ ត្រូវបានរៀបចំឡើងជារៀងរាល់ឆ្នាំ ចាប់តាំងពីឆ្នាំ 2016 ដើម្បីលើកកម្ពស់កិច្ចសហប្រតិបត្តិការ និងការសិក្សាស្វែងយល់ពីគ្នាទៅវិញទៅមក រវាងសហគ្រិនវ័យក្មេង និងវិនិយោគិន ក្នុងបណ្ដាប្រទេសជាសមាជិកអាស៊ាន។
មហាស្រពសហគ្រិនវ័យក្មេងអាស៊ានលើកទី 7 នេះ មានគោលបំណងជួយដល់ធុរកិច្ច និងសហគ្រិនវ័យ ក្មេង ក្នុងការជម្នះរាល់បញ្ហាបង្កដោយកូវីដ19 តាមរយៈឌីជីថលុបនីយកម្ម, ភាពជាអ្នកដឹកនាំ, កិច្ចសហការ, និងការចូលរួមពីស្ត្រី ក្នុងការដោះស្រាយបញ្ហាប្រឈមជាច្រើន ខណៈដែលយើងសម្របខ្លួនទៅនឹងការវិលមករកប្រក្រតីភាព ជាថ្មីម្តងទៀតនេះ។
តាមរយៈការឧបត្ថម្ភនេះ ABA បានរួមចំណែកដល់ការអភិវឌ្ឍសហគ្រាសមីក្រូ ធុនតូច និងមធ្យម (MSME) និងការកសាងអេកូស៊ីស្ទឹមសហគ្រិនភាពក្នុងប្រទេសកម្ពុជា ពិសេសក្នុងការគាំទ្រសហគ្រិនវ័យក្មេង និងអាជីវកម្មបង្កើតថ្មី (startups) ដែលត្រូវបានចាត់ទុកជាសសរស្ដម្ភដ៏សំខាន់មួយក្នុងការអភិវឌ្ឍសេដ្ឋកិច្ចប្រកបដោយស្ថិរភាព។
1 ABA ជាធនាគារពាណិជ្ជកម្ពុជាដ៏ធំបំផុតគិតលើទ្រព្យសកម្ម, ប្រាក់បញ្ញើ, កម្ចីដុល, ប្រាក់បញ្ញើអតិថិជននិងប្រាក់ចំណេញ ផ្អែកលើរបាយការណ៍ត្រួតពិនិត្យប្រចាំឆ្នាំ 2021 របស់ធនាគារជាតិនៃកម្ពុជា។
