ABA ប្រារព្ធទិវា បុណ្យឯករាជ្យជាតិកាណាដា នៅថ្ងៃទី 01 កក្កដា
02/Jul/2018
ថ្ងៃទី 01 ខែកក្កដា គឺជាថ្ងៃដ៏សំខាន់របស់ប្រជាជនកាណាដានៅទូទាំងពិភពលោក ដោយថ្ងៃនេះគឺជាថ្ងៃដែលប្រទេសកាណាដា ប្រកាសជារដ្ឋឯករាជ្យ កាលពីឆ្នាំ 1867។
ធនាគារ ABA ក្នុងនាមជាសមាជិកនៃសម្ពន្ធធនាគារជាតិកាណាដា មានមោទនភាពក្នុងការចូលរួមអបអរសាទរទិវាបុណ្យឯករាជ្យជាតិកាណាដា ដែលរៀបចំឡើងដោយសភាពាណិជ្ជកម្ម កាណាដា ប្រចាំប្រទេសកម្ពុជានៅថ្ងៃទី 01 ខែកក្កដា ឆ្នាំ2018 កន្លងទៅនេះ។
ពិធីនេះត្រូវបានប្រារព្ធធ្វើឡើងនៅក្នុងបរិវេណកោះពេជ្រនៃរាជធានីភ្នំពេញ និងមានវត្តមានភ្ញៀវចូលរួមជាង៤០នាក់ពីបណ្តាក្រុមហ៊ុននានាក្នុងប្រទេសកម្ពុជា, ប្រជាជនកាណាដានៅកម្ពុជា, មន្ត្រីរដ្ឋាភិបាលកម្ពុជាដែលមានសញ្ជាតិកាណាដាជាច្រើនរូប, លោកអភិបាលទទួលបន្ទុកផ្នែកពាណិជ្ជកម្មកាណាដា លោក ម៉ែន ប៊ុនលេង, និងភ្ញៀវកិត្តិយសពិសេស គឺលោកជំទាវ Donica Pottie ឯកអគ្គរាជទូតកាណាដាប្រចាំប្រទេសកម្ពុជា ថៃ និងឡាវផងដែរ។ ពិធីដ៏ឱឡារិកនេះមានទទួលបដិសណ្ឋារកិច្ច ជាម្ហូបអាហារពិសេសៗ ភេសជ្ជៈច្រើនប្រភេទ តន្ត្រីប្រគំកំដរ បរិយាកាសនៃសំណើចក្អាកក្អាយ និងបានបញ្ចប់ដោយការកាត់នំខេកដែលមានលម្អឲ្យរូបទង់ជាតិប្រទេសកាណាដានៅពីលើថែមទៀតផង។
កម្មវិធីនេះមានការចូលរួមគាំទ្រពីសំណាក់ក្រុមហ៊ុន Manulife, សាលា Learning Jungle, សាលាអន្តរជាតិកាណាដា និងធនាគារ ABA។
យើងខ្ញុំទាំងអស់គ្នានៅ ABA សូមជូនពរដល់ប្រជាជនកាណាដាទាំងអស់ ក្នុងឱកាសនៃទិវាបុណ្យឯករាជ្យលើកទី 151 នេះ!