ធនាគារ ABA ចូលរួមគាំទ្រមន្ទីរពេទ្យកុមារអង្គរ ដែលរងផលប៉ះពាល់ដោយសារការរីករាលដាលវីរុសកូវីដ-19
14/Aug/2020
អំឡុងពេលការរីករាលដាលវីរុសកូវីដ-19 ធនាគារ ABA ជាបុត្រសម្ព័ន្ធធនាគារជាតិកាណាដា មានសេចក្តីសោមន្សរីករាយដែលប្រកាសពីការចូលរួមឧបត្ថម្ភសប្បុរសធម៌ចំនួន 4,000,000 រៀល ជូនមន្ទីរពេទ្យកុមារអង្គរ (AHC) ជាមន្ទីរពេទ្យឯករាជ្យ និងមិនរកប្រាក់ចំណេញដែលផ្តល់ការថែទាំព្យាបាលកុមារ មានទីតាំងស្ថិតនៅខេត្តសៀមរាប។
មន្ទីរពេទ្យកុមារអង្គរ នាពេលថ្មីៗនេះ កំពុងជួបនូវការបាត់បង់ថវិកា ដោយសារតែការបរិច្ចាគតិចតួចពីម្ចាស់ជំនួយទាំងក្រុង និងក្រៅប្រទេស និងការលុបចោលនូវយុទ្ធនាការសប្បុរសធម៌ជាច្រើនដោយសារតែការភ័យខ្លាចការឆ្លងវីរុស។ ការធ្លាក់ចុះនូវការគាំទ្រជាថវិកា បានប៉ះពាល់ដល់ចំណាយប្រតិបត្តិការប្រចាំថ្ងៃរបស់មន្ទីរពេទ្យដែលភាគច្រើនពឹងផ្អែកលើការបរិច្ចាគសប្បុរសធម៌ពីអ្នកផ្សេង។ ដោយយល់ពីការលំបាកនេះ យើងខ្ញុំសង្ឃឹមថា ការបរិច្ចាគនេះនឹងជួយមន្ទីរពេទ្យកុមារអង្គរឲ្យបន្តកិច្ចប្រឹងប្រែងរបស់ខ្លួនក្នុងការជួយដល់ប្រជាជនក្រីក្រ។
កិច្ចប្រឹងប្រែងរបស់ធនាគារ ABA ក្នុងការគាំទ្រមន្ទីរពេទ្យកុមារអង្គរ មិនបញ្ចប់ត្រឹមនេះទេ។ ឥឡូវនេះ ការបរិច្ចាគក៏អាចធ្វើទៅបានតាមរយៈ ABA Pay ដោយស្គែនកូដ QR ដែលមាននៅតាមទីតាំងមន្ទីរពេទ្យ។ អ្នកប្រើប្រាស់កម្មវិធី ABA Mobile ក៏អាចធ្វើការបរិច្ចាគជូនមន្ទីរពេទ្យកុមារអង្គរដោយងាយស្រួលដោយផ្ទាល់ពីទូរស័ព្ទដៃរបស់ខ្លួន។ ដើម្បីបរិច្ចាគ អ្នកប្រើប្រាស់សូមអនុវត្តតាមជំហានងាយៗ ដូចខាងក្រោម៖
- បើកកម្មវិធី ABA Mobile និងចុចប៊ូតុង ទូទាត់ប្រាក់
- ចូលទៅផ្នែក សប្បុរសធម៌ និងការបរិច្ចាគ បន្ទាប់មកជ្រើសរើស មន្ទីរពេទ្យកុមារអង្គរ
- ជ្រើសរើសគណនីធនាគារដែលអ្នកមានបំណងធ្វើការបរិច្ចាគ បញ្ចូលលេខទូរស័ព្ទរបស់អ្នក និងចំនួនទឹកប្រាក់
- ចុចប៊ូតុង បង់ឥឡូវ ហើយបញ្ជាក់ជាមួយលេខកូដ PIN កម្មវិធី ABA Mobile របស់អ្នក។