ABA ឧបត្ថម្ភកម្មវិធី តន្ដ្រីដើម្បីកុមារ ដើម្បីកៀរគរមូលនិធិជូនមន្ទីរពេទ្យកុមារអង្គរ
17/Jan/2023
ធនាគារ ABA បានក្លាយជា Diamond Sponsor នៃគម្រោង តន្ដ្រីដើម្បីកុមារ ដែលផ្ដួចផ្ដើមឡើងដោយនិស្សិតសកលវិទ្យាល័យផារ៉ាហ្គន ក្នុងគោលបំណងរៃអង្គាសថវិកា ដើម្បីជួយដល់កុមារដែលរងគ្រោះដោយសារជំងឺមហារីក។ ការប្រគុំតន្ដ្រី ដែលមានការសំដែងដោយផ្ទាល់ពី លោក ម៉ម ពេជ្ជរិទ្ធ តារាចម្រៀងវ័យក្មេងដ៏មានប្រជាប្រិយភាព បានប្រព្រឹត្តទៅនៅ Royal Train Square ក្នុងរាជធានីភ្នំពេញ កាលពីថ្ងៃទី 15 ខែមករា ឆ្នាំ 2023 កន្លងទៅ។
តន្ដ្រីដើម្បីកុមារ គឺជាសកម្មភាពសប្បុរសធម៌មួយដែលផ្ដោតសំខាន់លើការប្រមូលថវិកាជូនមន្ទីរពេទ្យកុមារអង្គរ តាមរយៈការរៀបចំការប្រគុំតន្ដ្រីសប្បុរសធម៌ ដែលចូលរួមដោយសិល្បករកម្ពុជាវ័យក្មេង។ កម្មវិធីនេះ មានគោលបំណងជួយដល់អាណាព្យាបាលកុមារដែលខ្វះលទ្ធភាពក្នុងការព្យាបាលជំងឺមហារីករបស់កូនៗ។
បុគ្គលិក ABA ក៏បាននៅទីតាំងប្រគុំតន្ដ្រីផ្ទាល់ ដើម្បីជួយបើកគណនីជូនអ្នកចូលរួមទស្សនាផងដែរ ដែលអាចឲ្យពួកគាត់ធ្វើការបរិច្ចាគបន្ថែមជូនដល់មន្ទីរពេទ្យ តាមកម្មវិធី ABA Mobile បានយ៉ាងងាយស្រួល។
សកម្មភាពសប្បុរសធម៌នេះ ស្របនឹងគោលការណ៍ទំនួលខុសត្រូវសង្គមរបស់ ABA ហើយធនាគារប្ដេជ្ញាគាំទ្រយ៉ាងពេញទំហឹងដល់សហគមន៍មូលដ្ឋានតាមរយៈកម្មវិធី និងគំនិតផ្ដួចផ្ដើមផ្សេងៗ។
អតិថិជន ABA ក៏អាចរួមចំណែកជួយមន្ទីរពេទ្យកុមារអង្គរនេះ តាមរយៈការបរិច្ចាគដោយផ្ទាល់នៅក្នុងកម្មវិធី ABA Mobile បានផងដែរ។ ដើម្បីបរិច្ចាគ សូមធ្វើតាមជំហានណែនាំងាយៗ ដូចខាងក្រោម៖
- បើកកម្មវិធី ABA Mobile រួចចុចប៊ូតុង ទូទាត់ប្រាក់
- ចូលទៅ សប្បុរសធម៌ & បរិច្ចាគ រួចជ្រើសរើស មន្ទីរពេទ្យកុមារអង្គរ
- ជ្រើសរើស គណនី រួចដាក់លេខទូរស័ព្ទ និងចំនួនទឹកប្រាក់
- ចុច បង់ឥឡូវ រួចបញ្ជាក់ជាមួយលេខសម្ងាត់ PIN ABA Mobile របស់អ្នក ជាការស្រេច។