ធនាគារ ABA ឧបត្ថម្ភព្រឹត្តិការណ៍ ពិព័រណ៍ទេសចរណ៍ វប្បធម៌ និងពាណិជ្ជកម្ម ដើម្បីគាំទ្រការរីកចម្រើននៃតំបន់ឆ្នេរ
26/Feb/2026
ធនាគារ ABA មានមោទនភាពក្នុងការឧបត្ថម្ភព្រឹត្តិការណ៍ ពិព័រណ៍ទេសចរណ៍ វប្បធម៌ និងពាណិជ្ជកម្ម ក្នុងខេត្តព្រះសីហនុ ដែលបញ្ជាក់ជាថ្មីនូវកិច្ចខិតខំប្រឹងប្រែងរបស់ខ្លួន ក្នុងការលើកកម្ពស់វប្បធម៌ទេសចរណ៍ និងគាំទ្រការអភិវឌ្ឍសេដ្ឋកិច្ចប្រកបដោយចីរភាព នៃតំបន់ឆ្នេររបស់កម្ពុជា។
រៀបចំឡើងនៅទីលានតេជោ ចាប់ពីថ្ងៃទី22-27 ខែកុម្ភៈ កម្មវិធីរយៈពេល 5ថ្ងៃនេះ ទទួលបានការអញ្ជើញចូលរួមក្រោមអធិបតីភាព ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ព្រមទាំងថ្នាក់ដឹកនាំពាក់ព័ន្ធមកពីស្ថាប័នរដ្ឋាភិបាល គ្រឹះស្ថានហិរញ្ញវត្ថុ ម្ចាស់អាជីវកម្ម និងសាធារណជនទូទៅយ៉ាងច្រើនកុះករ។
ព្រឹត្តិការណ៍នេះ មានរៀបចំនូវកម្មវិធីចម្រុះជាច្រើនដើម្បីអបអរបេតិកភណ្ឌវប្បធម៌ជាតិ និងសក្តានុពលសេដ្ឋកិច្ចរបស់កម្ពុជា រួមមានកម្មវិធីរត់ប្រណាំង ការសម្តែងសិល្បៈប្រពៃណីបុរាណខ្មែរ និងការតាំងបង្ហាញផលិតផល និងសេវាកម្មក្នុងស្រុក។ កម្មវិធីនេះបានទាក់ទាញអ្នកចូលរួមជាតិ និងអន្តរជាតិយ៉ាងច្រើនកុះករ ដែលរួមចំណែកដល់ភាពរស់រវើកនៃវិស័យទេសចរណ៍របស់ខេត្ត ព្រះសីហនុ។
ជាផ្នែកមួយនៃការរួមចំណែករបស់ខ្លួន ធនាគារ ABA ក៏បានរៀបចំបញ្ជរ និងរថយន្តធនាគារចល័ត ដើម្បីផ្តល់ការប្រឹក្សា និងព័ត៌មានអំពីផលិតផល និងសេវាកម្មហិរញ្ញវត្ថុរបស់ធនាគារ នៅទីតាំងផ្ទាល់។
តាមរយៈការគាំទ្រគំនិតផ្តួចផ្តើមនានា ដូចជា ពិព័រណ៍ទេសចរណ៍ វប្បធម៌ និងពាណិជ្ជកម្ម ធនាគារ ABA បានបន្តពង្រឹងតួនាទីរបស់ខ្លួនក្នុងនាមជាដៃគូជាទីទុកចិត្តក្នុងការពង្រឹងសមត្ថភាពរបស់ប្រជាសហគមន៍ លើកកម្ពស់កំណើនទេសចរណ៍ និងពង្រីកឱកាសសម្រាប់សហគ្រាសធុនតូច និងមធ្យម តាមតំបន់ឆ្នេររបស់កម្ពុជា។
