ABA ឧបត្ថម្ភ សន្និសីទធនាគារនៅកម្ពុជាឆ្នាំ 2023 បង្ហាញពីការយកចិត្តទុកដាក់ចំពោះវឌ្ឍនភាពន...

29/Aug/2023

ABA ដែលជាធនាគារពាណិជ្ជធំបំផុតនៅកម្ពុជា¹ មានមោទនភាពក្នុងការឧបត្ថម្ភគាំទ្រ សន្និសីទធនាគារនៅកម្ពុជាឆ្នាំ 2023។ សន្និសីទនេះផ្តោតលើ "ការលើកកម្ពស់ហិរញ្ញវត្ថុប្រកបដោយចីរភាព និងធនាគារឌីជីថលនៅកម្ពុជា" ដែលបានប្រព្រឹត្តទៅកាលពីថ្ងៃទី 24-25 ខែសីហា នៅរាជធានីភ្នំពេញ។ ព្រឹត្តិការណ៍នេះត្រូវបានរៀបចំឡើងដោយសមាគមធនាគារនៅកម្ពុជា (ABC) ក្រោមការគាំទ្រដោយធនាគារជាតិនៃកម្ពុជា (NBC)។

អង្គសន្និបាតបានប្រព្រឹត្តទៅយ៉ាងអធិកអធមក្រោមវត្តមាន ឯកឧត្តម គិត សុវណ្ណារិទ្ធ អគ្គនាយកត្រួតពិនិត្យនៃធនាគារជាតិនៃកម្ពុជា និងតំណាងសមាគមមីក្រូហិរញ្ញវត្ថុកម្ពុជា សមាជិកសមាគមធនាគារអាស៊ាន គ្រឹះស្ថានធនាគារ និងហិរញ្ញវត្ថុ និងស្ថាប័នពាក់ព័ន្ធផ្សេងទៀត។ តាមរយៈវេទិកានេះ វាគ្មិនជាច្រើនរូបបានអញ្ជើញធ្វើបទបង្ហាញទាក់ទងនឹងហិរញ្ញវត្ថុប្រកបដោយចីរភាព និងប្រព័ន្ធធនាគារឌីជីថល។

ABA បានក្លាយជាអ្នកឧបត្ថម្ភធំនៃសន្និសីទនេះ ដោយបង្ហាញពីការយកចិត្តទុកដាក់របស់ខ្លួនចំពោះនវានុវត្តន៍ និងវឌ្ឍនភាពនៃវិស័យធនាគារក្នុងស្រុក។

លើសពីនេះ លោក វង្ស ចិត្រា ប្រធាននាយកដ្ឋានអភិវឌ្ឍន៍ និងបណ្ដុះបណ្ដាលឥណទាននៅធនាគារ ABA បានចូលរួមក្នុងកិច្ចពិភាក្សាលើប្រធានបទ "ការផ្តល់ប្រាក់កម្ចីក្នុងយុគសម័យឌីជីថលដំបូង"។ លោកបានបង្ហាញពីបម្រែបម្រួលនៅក្នុងទិដ្ឋភាពនៃការផ្តល់ប្រាក់កម្ចីក្នុងយុគឌីជីថលូបនីយកម្មដែលផ្លាស់ប្ដូរយ៉ាងឆាប់រហ័ស និងការកើនឡើងនៃការប្រើប្រាស់បណ្ដាញឌីជីថលសម្រាប់ទំនាក់ទំនងរវាងធនាគារ អ្នកប្រើប្រាស់ និងអាជីវកម្ម។

តាមរយៈការចូលរួមគាំទ្រក្នុងសន្និសីទនេះ ABA បញ្ជាក់ជាថ្មីពីការប្តេជ្ញាចិត្តរបស់ខ្លួនក្នុងការគាំទ្រការរីកចម្រើននៃ វិស័យធនាគារនៅកម្ពុជា និងធានាថាអតិថិជន និងអាជីវកម្មមានលទ្ធភាពទទួលបានសេវាហិរញ្ញវត្ថុប្រកបដោយនវានុវត្តភាព ស្របតាមតម្រូវការដែលកំពុងកើនឡើង។

_{¹ ABA គឺជាធនាគារពាណិជ្ជធំបំផុតនៅកម្ពុជាគិតលើទ្រព្យសកម្ម, ប្រាក់បញ្ញើ, កម្ចីដុល និងប្រាក់ចំណេញ ផ្អែកលើរបាយការណ៍ត្រួតពិនិត្យប្រចាំឆ្នាំ 2022 របស់ធនាគារជាតិនៃកម្ពុជា។}