ធនាគារ ABA គាំទ្រ ទិវាសុវត្ថិភាពឌីជីថល របស់សមាគមធនាគារនៅកម្ពុជា ដើម្បីពង្រឹងភាពធន់សុវត្ថិភាពឌីជីថល
21/May/2026
ក្នុងនាមជាធនាគារឈានមុខក្នុងផ្នែកនវានុវត្តធនាគារឌីជីថលក្នុងប្រទេសកម្ពុជា ធនាគារ ABA មានមោទនភាពក្លាយជាដៃគូយុទ្ធសាស្ត្រនៃកម្មវិធី ទិវាសុវត្ថិភាពឌីជីថល 2026 (Cybersecurity Day) ដែលបានរៀបចំឡើងដោយ សមាគមធនាគារនៅកម្ពុជា នៅថ្ងៃទី20 ខែឧសភា ឆ្នាំ 2026។
ក្រោម ប្រធានបទ “ការពង្រឹងភាពធន់លើសុវត្ថិភាពឌីជីថលក្នុងវិស័យធនាគារ និងហិរញ្ញវត្ថុនៅប្រទេសកម្ពុជា” គំនិតផ្តួចផ្តើមនេះ មានគោលបំណងលើកកម្ពស់សារសំខាន់នៃសុវត្ថិភាពឌីជីថល និងជំរុញការប្រើប្រាស់ប្រព័ន្ធអនឡាញប្រកបដោយសុវត្ថិភាព ទូទាំងវិស័យធនាគារ។
ជាផ្នែកមួយនៃកម្មវិធី លោក Tom Watson នាយកហេដ្ឋារចនាសម្ព័ន្ធព័ត៌មានវិទ្យា នៃធនាគារ ABA បានចូលរួមក្នុងកិច្ចពិភាក្សាក្រោមប្រធានបទ “មូលដ្ឋានគ្រឹះនៃសុវត្ថិភាពឌីជីថល និងទិដ្ឋភាពនៃការគំរាមកំហែង”។ កិច្ចពិភាក្សានេះ បានជជែកទៅលើការគំរាមកំហែងតាមប្រព័ន្ធឌីជីថលនាពេលបច្ចុប្បន្ន យុទ្ធសាស្ត្រនៃការបង្ការហានិភ័យ យន្តការការពារ និងចំណេះដឹងផ្នែកសុវត្ថិភាពឌីជីថល ក្នុងចំណោមអ្នកជំនាញក្នុងវិស័យធនាគារ។
នៅក្នុងកម្មវិធីផងដែរ ABA ក៏បានរៀបចំបញ្ជរនៅទីតាំងផ្ទាល់ ដែលបង្ហាញអំពីផលិតផល និងសេវាកម្មរបស់ខ្លួន ជាមួយការផ្តោតសំខាន់ទៅលើមុខងារសុវត្ថិភាពរបស់ ABA Mobile។ អ្នកចូលរួម បានយល់ដឹងកាន់តែច្បាស់អំពីនវានុវត្តមួយចំនួន រួមមាន មុខងារសោមុខ មុខងារឆាតក្នុងអេប និងមុខងារផ្សេងៗដែលរចនាឡើង ដើម្បីការពារអ្នកប្រើប្រាស់ក្នុងសកម្មភាពធនាគារប្រចាំថ្ងៃរបស់ពួកគេ។
ABA លើកទឹកចិត្តដល់អ្នកប្រើប្រាស់ ឲ្យបន្តយល់ដឹង និងតាមដានពីការវិវត្តថ្មីៗនៃហានិភ័យសុវត្ថិភាព និងទទួលយកនូវការអនុវត្តសេវាធនាគារតាមទូរស័ព្ទដៃប្រកបដោយសុវត្ថិភាពតាមគន្លឹះសំខាន់ៗ មួយចំនួនដូចជា
- កុំបង្ហាញ ឬផ្តល់ព័ត៌មានសំខាន់ៗ ដែលប្រើប្រាស់ចាំបាច់សម្រាប់ចុះឈ្មោះប្រើកម្មវិធី ABA Mobile ទៅបុគ្គលណាម្នាក់។
- កុំផ្តល់លេខកូដសុវត្ថិភាពដែលទទួលបានពីសារ ឬពីសារជូនដំណឹង ទៅបុគ្គលណាម្នាក់ឡើយ ទោះបីជាបុគ្គលនោះ អាសអាងថាខ្លួនជាបុគ្គលិកធនាគារក៏ដោយ។
- កុំបង្ហាញលេខទូរស័ព្ទដែលភ្ជាប់ជាមួយគណនីធនាគារ ជាសាធារណៈ
- ដូរលេខកូដ PIN របស់ ABA Mobile ជាប្រចាំ និងប្រើប្រាស់មុខងារសោមុខ (FacePass Secure) ដើម្បីសុវត្ថិភាពបន្ថែម។
- ដំឡើងកម្មវិធីនៅលើទូរស័ព្ទដៃរបស់អ្នក តែពី App Store ដែលមានសិទ្ធិអនុញ្ញាតប៉ុណ្ណោះ។
ធនាគារ ABA បន្តប្តេជ្ញាចិត្តទៅលើការខិតខំប្រឹងប្រែងពង្រឹងសុវត្ថិភាពទៅលើគ្រប់ផលិតផលឌីជីថលរបស់ខ្លួន ដោយធានាថាអតិថិជនអាចប្រើប្រាស់ដំណោះស្រាយធនាគារទំនើប ប្រកបដោយជំនឿទុកចិត្ត។
