ABA ទទួលបានកិត្តិនាម “ធនាគារឆ្នើមជាងគេ” ពី Euromoney ជាលើកទី5
19/Jul/2018
ធនាគារ ABA ដែលជាសមាជិកសម្ពន្ធធនាគារជាតិនៃកាណាដា ត្រូវបានជ្រើសរើសជា ធនាគារឆ្នើមជាងគេនៅកម្ពុជា ជាលើកទី5 ក្នុងរយៈពេល5ឆ្នាំជាប់ៗគ្នា ដោយទស្សនាវដ្តីហិរញ្ញវត្ថុដ៏មានឥទ្ធិពលគឺ ទស្សនាវដ្តី Euromoney។ ពានរង្វាន់នេះត្រូវបានប្រគល់ជូន ABA នៅក្នុងពិធីប្រគល់រង្វាន់ដល់ធនាគារជ័យលាភីពីតំបន់អាស៊ី ដែលប្រារព្ធធ្វើឡើងនៅក្នុងកម្មវិធីពិសាភោជនាហារ និងរាត្រីសមោសរ អបអរសាទរពានរង្វាន់ឧត្តមភាព ប្រចាំឆ្នាំរបស់ទស្សនាវដ្តី Euromoney នៅក្នុងទីក្រុងហុងកុងកាលពីថ្ងៃទី18 ខែកក្កដា ម្សិលម៉ិញនេះ។
មានប្រសាសន៍ពាក់ព័ន្ធនឹងជ័យលាភីនេះ លោក Askhat Azhikhanov នាយកប្រតិបត្តិនៃធនាគារ ABA បានថ្លែងថា៖ “យើងខ្ញុំសូមថ្លែងអំណរគុណយ៉ាងជ្រាលជ្រៅ ចំពោះពានរង្វាន់ដ៏ឧត្តុង្គឧត្តមមួយនេះ ពីទស្សនាវដ្តីហិរញ្ញវត្ថុដែលត្រូវបានគេគោរពទទួលស្គាល់ជុំវិញពិភពលោក។ ម្យ៉ាងវិញទៀតការណ៍ដែលយើងទទួលបានកិត្តិនាមជាធនាគារឆ្នើមជាងគេដល់ទៅ5ឆ្នាំជាប់ៗគ្នានេះ សបញ្ជាក់ឲ្យឃើញថា យើងពិតជានៅលើផ្លូវត្រូវក្នុងការផ្តល់ផលិតផលទំនើបទាន់សម័យនិងផ្តោតលើតម្រូវការអតិថិជនជាធំ ជូនទៅដល់ប្រជាពលរដ្ឋ និងអាជីវកម្មនានាក្នុងប្រទេសកម្ពុជា ក៏ដូចជាការបន្តពង្រឹងបរិយាបន្នហិរញ្ញវត្ថុនៅក្នុងប្រទេសថែមទៀតផង។ ខ្ញុំក៏សូមអរគុណដល់បុគ្គលិកយើងទាំងអស់ ដែលជារៀងរាល់ថ្ងៃ ពួកគេតែងតែផ្តោតទៅលើកិច្ចខិតខំប្រឹងប្រែងក្នុងការ ផ្តល់បទពិសោធធនាគារដ៏ល្អឥតខ្ចោះជូនអតិថិជន ហើយក៏សូមអរគុណជាអនេកប្បការដល់អតិថិជនទាំងអស់ដែលតែងតែផ្តល់ការគាំទ្រ និងជឿទុកចិត្តលើ ABA”។
ដំណើរការជ្រើសរើសធនាគារឆ្នើមជាងគេប្រចាំប្រទេសនីមួយៗរបស់ Euromoney គឺពឹងផ្អែកលើទិន្នន័យបែបបរិមាណ និងគុណភាពដែលប្រមូលបានក្នុងរយៈពេល 12 ខែចុងក្រោយនេះ។ ទិន្នន័យទាំងនោះរួមមាន ព័ត៌មានទាំងឡាយដែលផ្តល់ជូនដោយធនាគារដែលចូលរួមក្នុងការប្រកួតនេះទាំងអស់, ការស្ទង់មតិពីបណ្តាញរបស់ Euromoney, និងបទសម្ភាស៍ស៊ីជម្រៅជាមួយអ្នកវិភាគឯករាជ្យនានាក្នុងវិស័យធនាគារនិងហិរញ្ញវត្ថុពីប្រទេសនោះ។ លើសពីនេះទៅទៀត ចំណុចសំខាន់ៗដែលត្រូវបានពិចារណាក្នុងការវាយតម្លៃនេះរួមមាន យុទ្ធសាស្ត្រក្នុងការពង្រឹងការគ្រប់គ្រងហានិភ័យនិងសុវត្ថិភាពតាមអុីនធឺណិតរបស់ធនាគារ, ការវិវឌ្ឍទៅមុខនៃផលិតផលនិងយុទ្ធសាស្ត្រនៃសេវាធនាគារបែបឌីជីថល, ការពង្រីកភូមិសាស្ត្រនៃប្រតិបត្តិការការងារ, គោលជំហរនិងឥទ្ធពលរបស់ធនាគារក្នុងទីផ្សារ ក៏ដូចជាសមិទ្ធិផលផ្នែកហិរញ្ញវត្ថុក្នុងឆ្នាំចុងក្រោយដោយធៀបនឹងឆ្នាំទៅម៉ិញផងដែរ។
លោក Clive Horwood និពន្ធនាយកនៃទស្សនាវដ្តី Euromoney ក៏បានមានប្រសាសន៍ដែរថា៖ “ធនាគារ ABA នៅតែជាធនាគារនាំមុខគេក្នុងប្រទេសកម្ពុជា ហើយបានទទួលកំណើនប្រាក់ចំណេញដល់ទៅ 59% ក្នុងឆ្នាំ 2017 បើធៀបនឹងឆ្នាំ 2016 ដោយកើនរហូតដល់ 46.19 លានដុល្លារអាមេរិក។ ទ្រព្យសកម្មកើនបាន 49% រហូតដល់ 1.64 ពាន់លានដុល្លារ និងអត្រានៃលទ្ធភាពទទួលបានប្រាក់ចំណេញគឺ 28.1%”។ លោកបានបន្ថែមទៀតថា៖ “ការគាំទ្រពីភាគហ៊ុនិកដ៏ធំ គឺធនាគារជាតិនៃកាណាដា នឹងបន្តជាអត្ថប្រយោជន៍ដ៏ពិសេសក្នុងការដឹកនាំការអនុវត្តការងារនានាផងដែរ។ ABA បន្តជំរុញសេវាធនាគារនានាឲ្យទៅជាលក្ខណៈឌីជីថល និងមានការឆ្លើយតបខ្ពស់ទៅនឹងតម្រូវការនៅកម្ពុជា ដោយបានដាក់ឲ្យប្រើសេវាទូទាត់ប្រាក់តាមអនឡាញ PayWay ក្នុងអំឡុងពេលវាយតម្លៃនេះ។ ធនាគារ ABA បានអនុម័តកាតថ្មី ប្រភេទ VISA, Mastercard, និង UPI សរុបប្រមាណជិត 10 ម៉ឺនកាត នៅក្នុងឆ្នាំ 2017 ហើយថែមទាំងបានចុះកិច្ចព្រមព្រៀងជាដៃគូរយៈពេល 15 ឆ្នាំជាមួយក្រុមហ៊ុនធានារ៉ាប់រង Manulife ដើម្បីផ្តល់សេវាធានារ៉ាប់រងអាយុជីវិតដល់អតិថិជនខ្លួនថែមទៀតផង។
ប៉ុន្មានឆ្នាំកន្លងទៅនេះ ធនាគារ ABA បានទទួលពានរង្វាន់ធំៗពីគ្រឹះស្ថានបោះពុម្ពហិរញ្ញវត្ថុអន្តរជាតិល្បីៗជាច្រើន។ ក្នុងនោះ ទស្សនាវដ្តី The Banker បានប្រសិទ្ធនាម ABA ជា “ធនាគារប្រចាំឆ្នាំ” ក្នុងប្រទេសកម្ពុជានៅឆ្នាំ 2014 និង 2016 ខណៈពេលដែលទស្សនាវដ្តី Global Finance បានទទួលស្គាល់ ABA ថាជា “ធនាគារឆ្នើមជាងគេនៅកម្ពុជា” ក្នុងរយៈពេល 4 ឆ្នាំជាប់ៗគ្នាគឺ 2015, 2016, 2017 និង 2018។ ពានរង្វាន់ “ធនាគារឆ្នើមជាងគេនៅកម្ពុជាប្រចាំឆ្នាំ 2018” ពី Euromoney នេះ គឺជាពានទី 5 ពីទស្សនាវដ្តីមួយនេះ ដោយបន្ថែមទៅលើបញ្ជីសមិទ្ធផលដែលបន្តកើនពីឆ្នាំ 2014, 2015, 2016, និង 2017។
អំពីធនាគារ ABA៖
ធនាគារ ABA គឺជាស្ថាប័នហិរញ្ញវត្ថុឯកជនដែលនាំមុខគេមួយនៅក្នុងប្រទេសកម្ពុជា ដែលត្រូវបានបងើ្កតឡើងនៅឆាំ្ន 1996 មានឈ្មោះថាធនាគារ វឌ្ឍនៈ អាស៊ី ចំកាត់។ សព្វថៃ្ងនេះ ធនាគារ ABA ផ្តល់ជូននូវវិសាលគមនៃសេវាដែលប្រកបដោយគុណភាពខ្ពស់ជូនអតិថិជន ដូចជា សហគ្រាសខ្នាតតូចនិងមធ្យម, អាជីវកម្មខ្នាតតូច, និងបុគ្គល។ ជាមួយនឹងបណ្តាញសាខាចំនួន 55 ម៉ាស៊ីនស្វ័យធនាគារ 121 ម៉ាស៊ីន និងទូ ATM ជាង 230 កន្លែងនៅទូទាំងប្រទេស (គិតត្រឹមថ្ងៃទី 01 ខែកក្កដា ឆ្នាំ 2018) ABA អាចឈានទៅដល់អតិថិជនបានយ៉ាងច្រើន ដោយផ្តល់ជូននូវសេវាហិរញ្ញវត្ថុទំនើប និងដំណោះស្រាយធនាគារបែបឌីជីថល។ ត្រឹមថ្ងៃទី 01 ខែកក្កដា ឆ្នាំ 2018 ទ្រព្យសកម្មរបស់ធនគារ ABA មានស្មើនឹង 2.03ពាន់លានដុល្លារ ធ្វើឲ្យធនាគារនេះក្លាយជាធនាគារធំជាងគេលំដាប់ទី4 ក្នុងប្រទេសកម្ពុជា។ ភាគហ៊ុនិកធំជាងគេរបស់ធនាគារ ABA គឺធនាគារជាតិនៃកាណាដា (www.nbc.ca) ជាធនាគារធំជាងគេលំដាប់ទី6 ក្នុងប្រទេស កាណាដា ហើយជាធនាគារនាំមុខគេនៅគេបិច និងជាប់ជាធនាគារជម្រើសនៃក្រុមសហគ្រិនថែមទៀតផង។
អំពីទស្សនាវដ្តី Euromoney និងកម្មវិធី ពានរង្វាន់ឧត្តមភាព៖
ទស្សនាវដ្ដី Euromoney គឺជាទស្សនាវដ្ដីប្រចាំខែដ៏គួរឲ្យជឿទុកចិត្ត និងល្បីល្បាញបំផុតមួយ ដែលផ្ដោតលើអាជីវកម្ម និងហិរញ្ញវត្ថុ។ ទស្សនាវដ្តីនេះត្រូវបានបោះពុម្ពផ្សាយដំបូងបង្អស់នៅក្នុងឆ្នាំ 1969 ហើយបានចុះផ្សាយអំពីវិសាលភាពលើការលេចឡើងជាថ្មីនៃទីផ្សារមូលធនឆ្លងដែនអន្តរជាតិ។ ពានរង្វាន់ឧត្តមភាពប្រចាំឆ្នាំរបស់ទស្សនាវដ្តី Euromoney ត្រូវបានបង្កើតឡើងនៅឆ្នាំ 1992 ហើយជានិយាមសកលសម្រាប់វិស័យ ធនាគារ។ ពានរង្វាន់ប្រចាំឆ្នាំទាំងនេះ គ្របដណ្ដប់លើផលិតផលសកលជាង 20 ប្រភេទ ពានរង្វាន់លំដាប់ថ្នាក់ឧត្តមប្រចាំតំបន់ និងធនាគារឆ្នើមនៅបណ្ដាប្រទេសប្រមាណ 100 ប្រទេសទូទាំងពិភពលោក។ សេចក្តីសម្រេចផ្ដល់ពានរង្វាន់របស់ទស្សនាវដ្ដី Euromoney ធ្វើឡើងដោយគណៈកម្មាធិការអ្នកសារព័ត៌មានជាន់ខ្ពស់ ដែលគ្រប់គ្រងដោយនិពន្ធនាយករបស់ទស្សនាវដ្ដី Euromoney បន្ទាប់ពីទទួលបានការដាក់ជូនព័ត៌មានលម្អិតពីសំណាក់អ្នកចូលរួមនៃទីផ្សារនេះ បូករួមជាមួយការធ្វើការស្រាវជ្រាវមួយឆ្នាំពេញនៅក្នុងវិស័យធនាគារ និងទីផ្សារមូលធននៅក្នុងតំបន់ដោយនិពន្ធនាយក អ្នកសារព័ត៌មាន និងក្រុមស្រាវជ្រាវ។