ABA ទទួលបានចំណាត់ថ្នាក់លេខ 1 ជាគ្រឹះស្ថានហិរញ្ញវត្ថុចូលរួមឆ្នើម ក្រោមគម្រោងធានាឥណទានរបស់ CGCC
29/Jan/2026
ធនាគារ ABA ទទួលបានពានរង្វាន់ជាគ្រឹះស្ថានហិរញ្ញវត្ថុចូលរួមឆ្នើម ចំណាត់ថ្នាក់លេខ1 ប្រចាំឆ្នាំ 2025 ក្រោមគម្រោងធានាឥណទានរបស់ សាជីវកម្មធានាឥណទានកម្ពុជា (CGCC) ដែលបញ្ជាក់ឡើងវិញនូវការនាំមុខរបស់ខ្លួនក្នុងការគាំទ្រសហគ្រាសធុនតូច និងមធ្យម ទូទាំងប្រទេស។
ពិធីប្រគល់ពានរង្វាន់នេះ បានប្រព្រឹត្តទៅកាលពីថ្ងៃទី 27 ខែមករា ជាផ្នែកមួយនៃការអបអរខួប 5ឆ្នាំរបស់ CGCC។ ពិធីនេះ ទទួលបានការអញ្ជើញចូលរួមក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ថ្នាក់ដឹកនាំមកពីស្ថាប័នរដ្ឋ គ្រឹះស្ថានធនាគារ និងមីក្រូហិរញ្ញវត្ថុ ព្រមទាំងភ្ញៀវកិត្តិយសជាច្រើនរូបទៀត។
សមិទ្ធផលនេះ កើតឡើងចេញពីការទទួលស្គាល់ជាបន្តបន្ទាប់របស់ ABA ចំពោះកិច្ចខិតខំប្រឹងប្រែងរបស់ខ្លួន ក្នុងការសម្របសម្រួលចំណែកគួរឲ្យកត់សម្គាល់នៃគណនីមានការធានា ដោយឆ្លុះបញ្ចាំងពីការប្តេជ្ញាចិត្តរបស់ខ្លួនក្នុងការពង្រីកលទ្ធភាពទទួលបានហិរញ្ញប្បទាន និងលើកកម្ពស់បរិយាបន្នហិរញ្ញវត្ថុ។ តាមរយៈការអនុញ្ញាតឲ្យសហគ្រាសនានា អាចទទួលបានប្រាក់កម្ចីដែលមានការធានាឥណទាន ABA បានរួមចំណែកដល់កំណើន និងស្ថិរភាពនៃសេដ្ឋកិច្ចកម្ពុជា។
ការចុះហត្ថលេខាលើអនុស្សរណៈយោគយល់រវាង ABA និង CGCC លើគម្រោងធានាឥណទានចំនួន 2 កាលពីឆ្នាំ 2025 កន្លងទៅ បានពង្រឹងលើភាពជោគជ័យនេះបន្ថែម។ គម្រោងទាំងនេះ អនុញ្ញាតឲ្យ ABA ពង្រីកការផ្ដល់ហិរញ្ញប្បទានដល់អាជីវកម្ម ក្រុមហ៊ុននាំចេញអង្ករ និងរោងម៉ាស៊ីនកិនស្រូវ ដែលខ្វះទ្រព្យធានា សម្រាប់ជាទុនបង្វិល និងបង្កើនភាពប្រកួតប្រជែងរបស់កម្ពុជានៅលើទីផ្សារអន្តរជាតិ។
តាមរយៈលទ្ធផលដ៏រឹងមាំក្រោមគម្រោងធានាឥណទានទាំងនេះ ABA បន្តពង្រឹងសមត្ថភាពរបស់ សហគ្រិន ជំរុញការអភិវឌ្ឍប្រកបដោយចីរភាព និងរួមចំណែកដល់ការរីកចម្រើនយូរអង្វែងរបស់កម្ពុជា - ពង្រឹងជំហររបស់ខ្លួនជាស្ថាប័ននាំមុខ ជាទីទុកចិត្តនៅក្នុងវិស័យធនាគារ។
