ធនាគារ ABA សហការជាមួយ ក្រសួងសាធារណការ និងដឹកជញ្ជូន សម្រាប់ការដាក់ឲ្យដំណើរការជាផ្លូវការ ការស្នើសុំបន្ដសុពលភាពឆៀក ក្នុងអេប ABA Mobile
04/Sep/2026
ធនាគារ ABA បានឧបត្ថម្ភពិធីសម្ពោធដាក់ឲ្យដំណើរការជាផ្លូវការ ការស្នើសុំបន្តសុពលភាពត្រួតពិនិត្យលក្ខណៈបច្ចេកទេសយានជំនិះ (ឆៀក) តាមធនាគារដៃគូ ការស្នើសុំ វិក្កយបត្រឌីជីថល និងការស្នើសុំអាជ្ញាបណ្ណផ្លូវថ្នល់ របស់ក្រសួងសាធារណការ និងដឹកជញ្ជូន។
ក្រោមគំនិតផ្តួចផ្តើមនេះ ម្ចាស់រថយន្ត (រថយន្តប្រភេទគ្រួសារ) អាចដាក់ពាក្យស្នើសុំឆៀក និងទូទាត់កម្រៃសេវាបានយ៉ាងងាយស្រួល តាមរយៈផ្នែក សេវាស្ថាប័នរដ្ឋាភិបាល នៅក្រោម មុខងារមីនីអេប ក្នុង ABA Mobile។
សេវាឌីជីថលថ្មីនេះ បង្កើតឡើងដើម្បីសម្រួលដំណើរការស្នើសុំបន្ដសុពលភាពឆៀក ឲ្យកាន់តែងាយស្រួល និងចំណេញពេល ដោយអនុញាតឲ្យអតិថិជនបំពេញឯកសារ និងបង់កម្រៃសេវាមុនឲ្យហើយ មុនពេលទៅកន្លែង ឆៀក។
អ្នកប្រើប្រាស់ ABA Mobile អាចដាក់ពាក្យស្នើសុំឆៀក តាមជំហានងាយៗខាងក្រោម៖
- បើក ABA Mobile រួចចុចប៊ូតុង មីនីអេប
- ចុច សេវាស្ថាប័នរដ្ឋាភិបាល → សេវាសាធារណៈរបស់ក្រសួងសាធារណការ និងដឹកជញ្ជូន។ បំពេញព័ត៌មានយានយន្ដ, ជ្រើសរើស មណ្ឌលនិងពេលវេលាដែលអ្នកចង់ទៅឆៀក រួចចុចបញ្ជូន ជាការស្រេច។
ក្នុងពិធីសម្ពោធ ធនាគារ ABA ក៏បានរៀបចំបញ្ជរ ដែលអ្នកចូលរួមអាចស្វែងយល់បន្ថែមអំពីសេវាឌីជីថលនេះ និងទទួលបានការណែនាំពីរបៀបប្រើប្រាស់តាម ABA Mobile។
បន្ថែមពីលើនេះ ABA ក៏នឹងបន្តគាំទ្រគំនិតផ្តួចផ្តើមនេះដោយរៀបចំបញ្ជរផ្ដល់ព័ត៌មាននៅតាមមណ្ឌលឆៀកចំនួនបី នៅភ្នំពេញ។ បញ្ជរនេះ នឹងផ្ដល់ព័ត៌មានអំពី សេវាកម្មឌីជីថលនេះដល់អតិថិជនដោយផ្ទាល់នៅមណ្ឌលឆៀក ព្រមទាំងជួយផ្សព្វផ្សាយអំពីងាយស្រួលនៃដំណើរការដាក់ពាក្យស្នើសុំ និងបង់កម្រៃសេវាផងដែរ។
តាមរយៈការគាំទ្រគំនិតផ្តួចផ្តើមនេះ ធនាគារ ABA បន្តរួមចំណែកដល់ឌីជីថលូបនីយកម្មសេវាសាធារណៈ ព្រមទាំងលើកកម្ពស់ដំណោះស្រាយដែលប្រើប្រាស់បច្ចេកវិទ្យា ដើម្បីផ្តល់ភាពងាយស្រួលដល់ការធ្វើប្រតិបត្តិការប្រចាំថ្ងៃសម្រាប់អតិថិជន។
