ABA ចូលរួមក្នុងវេទិកាបច្ចេកវិទ្យាហិរញ្ញវត្ថុ នៃពិព័រណ៍បច្ចេកវិទ្យាកម្ពុជា 2022
16/Nov/2022
ធនាគារ ABA ដែលជាធនាគារពាណិជ្ជ និងធនាគារឌីជីថលធំជាងគេនៅកម្ពុជា1 មានមោទនភាពបានក្លាយជា Diamond Sponsor ក្នុងវេទិកាបច្ចេកវិទ្យាហិរញ្ញវត្ថុនៃពិព័រណ៍បច្ចេកវិទ្យាកម្ពុជា (CTX) 2022 កាលពីថ្ងៃទី 11-13 ខែវិច្ឆិកា កន្លងទៅនេះ។ វេទិកានេះ បានប្រព្រឹត្តិទៅនៅមជ្ឈមណ្ឌលសន្និបាត និងពិព័រណ៍កោះពេជ្រ ដែលជាផ្នែកមួយនៃកិច្ចប្រជុំកំពូលអាស៊ានលើកទី 40 និង 41។
វេទិកានេះរៀបចំឡើងក្នុងគោលបំណងគាំទ្រ និងជំរុញសេដ្ឋកិច្ចឌីជីថល និងអភិវឌ្ឍបច្ចេកវិទ្យាហិរញ្ញវត្ថុនៅកម្ពុជា ដែលអនុញ្ញាតឲ្យអាជីវកម្មបង្កើតថ្មី (startups) និងបណ្ដាក្រុមហ៊ុនក្នុងវិស័យបច្ចេកវិទ្យាហិរញ្ញវត្ថុ ចែករំលែកចំណេះដឹង បទពិសោធ និងឧត្តមានុវត្តន៍របស់ខ្លួន ជូនដល់សាធារណជន និយ័តករ និងអ្នកជំនាញបច្ចេកវិទ្យាហិរញ្ញវត្ថុ។
លោក Bekzod Ruzmetov ប្រធានអង្គភាព សេវាធនាគារអនឡាញសម្រាប់អាជីវកម្ម និងវិភាគទិន្នន័យ ABA បានចូលរួមជាវាគ្មិនមួយរូបក្នុងកិច្ចពិភាក្សាជុំវិញប្រធានបទ សេវាធនាគារ និងឌីជីថលុបនីយកម្ម។ លោកបានចែករំលែកអំពីអត្ថប្រយោជន៍ដែលវិស័យធនាគារ និងវិស័យផ្សេងទៀតទទួលបានពីបច្ចេកវិទ្យាហិរញ្ញវត្ថុ និងបានគូសបញ្ជាក់អំពីសារៈសំខាន់នៃការមានចំណេះដឹងផ្នែកបច្ចេកវិទ្យាហិរញ្ញវត្ថុនៅក្នុងយុគសម័យនវានុវត្តនេះផងដែរ។
ក្នុងនាមជាធនាគារឌីជីថលឈានមុខនៅកម្ពុជា ABA តែងតែសាទរចំពោះសារៈប្រយោជន៍នៃបច្ចេកវិទ្យាហិរញ្ញវត្ថុ សម្រាប់ការពង្រីកបរិយាបន្នហិរញ្ញវត្ថុ និងប្រសិទ្ធភាពដែលបច្ចេកវិទ្យានេះជះឥទ្ធិពលជាវិជ្ជមានដល់សង្គម។ យើងខ្ញុំជឿជាក់ថាវេទិកានេះនឹងរួមចំណែកដល់ការរីកចម្រើនបន្ថែមនៃនវានុវត្តនៅក្នុងវិស័យធនាគារ និងសេដ្ឋកិច្ចរបស់ប្រទេស។
1 ABA ជាធនាគារពាណិជ្ជកម្ពុជាដ៏ធំបំផុតគិតលើទ្រព្យសកម្ម, ប្រាក់បញ្ញើ, កម្ចីដុល, ប្រាក់បញ្ញើអតិថិជននិងប្រាក់ចំណេញ ផ្អែកលើរបាយការណ៍ត្រួតពិនិត្យប្រចាំឆ្នាំ 2021 របស់ធនាគារជាតិនៃកម្ពុជា។
