ធនាគារ ABA ប្រើប្រាស់ថវិកា ពីការបរិច្ចាគដើម្បីជួយ 316 គ្រួសារទៀត
21/May/2020
នៅថ្ងៃទី 18-20 ឧសភា 2020 ធនាគារ ABA បានផ្តល់ជំនួយស្បៀងបណ្តោះអាសន្នជូនគ្រួសាររាប់រយដែលរងផលប៉ះពាល់ផ្នែកសេដ្ឋកិច្ចបណ្តាលមកពីការរីករាលដាលនៃវីរុសកូវីដ-19។ គ្រួសារនីមួយៗចំនួន 316 គ្រួសារនៅក្នុងខេត្តចំនួនបី បានទទួលជំនួយស្បៀងបណ្តោះអាសន្នដែលមានដូចជា អង្ករ 15 គ.ក ត្រីខកំប៉ុង 10 កំប៉ុង និងមីកញ្ចប់មួយកេស។ លើសពីនេះ មានផ្តល់សាប៊ូលាងដៃ ដើម្បីអនាម័យទូទៅ និងភាពប្រសើរឡើងនូវសុខុមាលភាពរបស់ពួកគេផងដែរ។
សកម្មភាពនេះជាផ្នែកមួយនៃគម្រោងជំនួយគ្រោះអាសន្នវីរុសកូវីដ-19 ដែលជាគំនិតផ្តួចផ្តើមរបស់អង្គការ ស៊ីប៊ីអិន កម្ពុជា (CBN Cambodia) ដែលជាអង្គការចុះបញ្ជីអន្តរជាតិ និងសម្រាប់ជួយដល់តំបន់នានា ដូចខាងក្រោម៖
ខេត្តកណ្តាល
- ភូមិទួលសាលា ឃុំស្អាង ស្រុកស្អាង
- ភូមិព្រែកតាជ័រ ឃុំស្វាយប្រទាល ស្រុកស្អាង
ខេត្តកំពង់ស្ពឺ
- ភូមិអន្លងពពាយ ឃុំក្រាំងអំពិល ស្រុកសំរោងទង
ខេត្តកំពង់ឆ្នាំង
- ភូមិទួលរកា ឃុំមេលំ ស្រុកបរិបូរណ៍
- ភូមិទួលខ្សាច់ ឃុំជ្រៃបាក់ ស្រុករលាប្អៀរ
សម្រាប់ជំនួយនេះ ធនាគារបានប្រើប្រាស់ប្រាក់អតិថិជនដែលបានបរិច្ចាគអំឡុងពេលយុទ្ធនាការរៃអង្គាសប្រាក់ប្រយុទ្ធប្រឆាំងនឹងវីរុសកូវីដ-19 ដែលផ្តួចផ្តើមឡើងនៅក្នុងកម្មវិធី ABA Mobile កាលពីថ្ងៃទី 26 មីនា 2020។ ដូច ជម្រាបជូនពីមុន យុទ្ធនាការនេះទទួលបានការឆ្លើយតបដ៏លើសលប់ពីអតិថិជនធនាគារ ABA។ នៅថ្ងៃទី 2 មេសា 2020 អ្នកតំណាងធនាគារបានប្រគល់ថវិកាចំនួន 18,000 ដុល្លារ ជូនក្រសួងសុខាភិបាលសម្រាប់ទិញសម្ភារពេទ្យដើម្បីកាត់បន្ថយការរីករាលដាលនៃវីរុសកូវីដ-19 នៅកម្ពុជា។
ដោយមើលឃើញនូវវឌ្ឍនភាពគួរកត់សម្គាល់ក្នុងការព្យាបាលអ្នកមានវីរុសកូវីដ-19 ចាប់ពីពេលនោះមក ធនាគារបានសម្រេចចិត្តចំណាយទឹកប្រាក់ដែលនៅសល់ពីការរៃអង្គាសប្រាក់ចំនួន 9,504.45 ដុល្លារ សម្រាប់ជួយ 316 គ្រួសារដែលមានការលំបាកក្នុងជីវភាពរស់នៅរបស់ពួកគេ បន្ទាប់ពីបាត់បង់ប្រភពចំណូលចម្បងរបស់ពួកគេ ដោយសារតែការរីករាលដាលនៃវីរុសកូវីដ-19 ។
យើងនៅធនាគារ ABA សូមថ្លែងអំណរគុណចំពោះអតិថិជនធនាគារ ABA ទាំងអស់ដែលបានចូលរួមក្នុងយុទ្ធនាការរៃអង្គាសប្រាក់ និងបានបរិច្ចាគថវិកាដែលត្រូវបានប្រើប្រាស់សម្រាប់ប្រយុទ្ធប្រឆាំងនឹងការរីករាលដាលនៃវីរុសកូវីដ-19 នេះ និងដើម្បីជួយអ្នកដែលរងគ្រោះដោយសារតែការធ្លាក់ចុះសេដ្ឋកិច្ចបណ្តាលមកពីការរីករាលដាលនៃវីរុសកូវីដ-19 នេះ។
រួមគ្នាដើម្បីសង្គមយើងវិលទៅរកសុខុមាលភាព!
