ធនាគារ ABA ទទួលបានពានរង្វាន់ កិច្ចការទីផ្សារឆ្នើមប្រចាំឆ្នាំ 2026 សម្រាប់យុទ្ធនាការមហាសង្ក្រាន្ត
04/Sep/2026
ABA ដែលជាធនាគារពាណិជ្ជធំជាងគេរបស់កម្ពុជា ទទួលបានពាន កិច្ចការទីផ្សារឆ្នើមប្រចាំឆ្នាំ 2026 ពីកម្មវិធីពានរង្វាន់ CMO Asia Awards សម្រាប់ឧត្តមភាពក្នុងកិច្ចការទីផ្សារ និងផ្សព្វផ្សាយកិត្តិនាម ដែលជាជ័យជម្នះលើកទីបីជាប់ៗគ្នារបស់ធនាគារ នៅក្នុងប្រភេទពានរង្វាន់នេះ។
កិច្ចការផ្សព្វផ្សាយសម្រាប់ មហាសង្ក្រាន្ត នាឆ្នាំនេះ បានលើកយកការបង្ហាញតាមរយៈការបង្កើតសាច់រឿងបែបប្រពៃណីវប្បធម៌ ការផលិតវីដេអូចម្រៀងស្នាដៃដើម ការបង្កើតមាតិកានានា និងបទពិសោធក្នុងអេប ABA Mobile ដ៏ថ្មីសន្លាង ក្នុងយុទ្ធនាការទីផ្សាររួមមួយដែលប្រទាក់ក្រឡាគ្នាយ៉ាងមានន័យ។ គោលគំនិតនៃយុទ្ធនាការនេះ ចង់រំលេចនូវការរួមបញ្ចូលគ្នាយ៉ាងឥតខ្ចោះនៃឌីជីថលនវានុវត្តន៍ ដែលអាចចែករំលែក និងអបអររួមគ្នាក្នុងការលើកស្ទួយវប្បធម៌ជាតិ។
ទិដ្ឋភាពពិធីបុណ្យចូលឆ្នាំខ្មែរ នៅក្នុង ABA Mobile
ពិធីចូលឆ្នាំខ្មែរឆ្នាំនេះ ABA បានបង្កើតម៉ូដរចនា មហាសង្ក្រាន្ត នៅក្នុង ABA Mobile ដោយរំលេចនូវទិដ្ឋភាពដ៏រស់រវើកនៃការរៀបចំពិធីចូលឆ្នាំខ្មែរ នៅលើផ្លែតហ្វមឌីជីថលរបស់ខ្លួន។ ម៉ូដរចនានេះ បានអនុញ្ញាតឲ្យអតិថិជនទទួលបាននូវបរិយាកាសបុណ្យទាន រាល់ពេលពួកគាត់បើកអេប សម្រាប់តម្រូវការប្រើប្រាស់សេវាធនាគារប្រចាំថ្ងៃ។
តាមរយៈការរួមបញ្ចូលវប្បធម៌ជាមួយនឹងឌីជីថលនវានុវត្តន៍ យុទ្ធនាការនេះ បានបង្កើតបទពិសោធដែលអតិថិជនអាចផ្សារភ្ជាប់ជាមួយប្រពៃណីរបស់ខ្លួនតាមរយៈសេវាធនាគារដែលពួកគាត់ប្រើប្រាស់ជាប្រចាំ។ ការណ៍នេះ បានឆ្លុះបញ្ចាំងពីការប្តេជ្ញាចិត្តរបស់ ABA ក្នុងការពង្រីកសេវាធនាគារឌីជីថលឲ្យមានភាពទាក់ទាញ ខណៈអបអរមរតកវប្បធម៌ខ្មែរដ៏សម្បូរបែប។
វប្បធម៌តាមរយៈសាច់រឿង និងតន្ដ្រី
ឆ្នាំនេះ ជំនួសឲ្យការផ្សព្វផ្សាយបែបប្រពៃណី យុទ្ធនាការនេះបានពង្រីកវិសាលភាពលើសពី ABA Mobile តាមរយៈរឿងខ្លីចំនួនបី ដែលមានការចូលរួមសម្ដែងពីជនបរទេសរស់នៅក្នុងប្រទេសកម្ពុជា រួមជាមួយសិល្បករខ្មែរឆ្នើម និងមានប្រជាប្រិយភាពដូចជា លោកវណ្ណដា លោកថេណា និងអ្នកអង្គម្ចាស់ក្សត្រិយ៍ ចេណ្ណា។ វគ្គនីមួយៗ ផ្តោតលើមួយថ្ងៃនៃពិធីបុណ្យចូលឆ្នាំខ្មែរ ដែលរំលេចនូវប្រពៃណី និងអត្ថន័យនៃថ្ងៃនីមួយៗ តាមរយៈបងប្អូនខ្មែរក្នុងស្រុក និងទស្សនិកជនអន្តរជាតិ។
ជាមួយគ្នានេះ លោក វណ្ណដា ក៏បាននិពន្ធ និងផលិតវីដេអូចម្រៀងស្នាដៃដើមសម្រាប់យុទ្ធនាការនេះផងដែរ ដែលផ្តោតទៅលើសិរីសួស្តី ការជួបជុំញាតិមិត្ត និងការទទួលពរជ័យក្នុងឱកាសចូលឆ្នាំខ្មែរ។ វីដេអូចម្រៀងនេះទទួលបានអ្នកចូលទស្សនាសរុបជិត 22 លានដងនៅលើបណ្តាញរបស់លោកដែលបានក្លាយជាកិច្ចសហការ ចូលឆ្នាំខ្មែរដែលទទួលបានជោគជ័យខ្លាំងបំផុតរបស់ ABA មកទល់បច្ចុប្បន្ន។
យុទ្ធនាការនេះ បានប្រមូលផ្តុំអ្នកបង្កើតមាតិកា អ្នកលក់ដូរ និងផ្លែតហ្វមឌីជីថលរបស់ ABA ដើម្បីបង្កើតនូវបទពិសោធចូលឆ្នាំថ្មីដ៏សម្បូរបែប ដែលមានទំនាក់ទំនងគ្នាយ៉ាងប្រទាក់ក្រឡា ឆ្លុះបញ្ចាំងអត្ថន័យពិតនៃការប្រារព្ធពិធីបុណ្យប្រពៃណីនេះ។
ការរួមចំណែកដ៏រឹងមាំពីសំណាក់ទស្សនិកជន
តាមរយៈបណ្តាញផ្លូវការរបស់ ABA យុទ្ធនាការនេះទទួលបានការបង្ហាញខ្លួន (impressions) ជាង 170 លានដង និងទទួលបានការចូលទស្សនាជាង 90 លានដង។ តួលេខនេះ បង្ហាញពីភាពជោគជ័យនៃយុទ្ធការ តាមរយៈវិសាលភាពនៃការមើលឃើញយ៉ាងទូលំទូលាយ និងសន្ទុះគាំទ្រយ៉ាងច្រើនពីទស្សនិកជន ព្រមទាំងពង្រឹងតួនាទីរបស់ ABA Mobile ជាផ្លែតហ្វមដ៏ចម្បងសម្រាប់ផ្សារភ្ជាប់អតិថិជនជាមួយអ៊ីកូស៊ីស្ទែម ឌីជីថលរបស់ធនាគារ។
ការទទួលស្គាល់ក្នុងឆ្នាំ 2026 នេះ គឺជាពានឧត្តមភាពល្អឯកសម្រាប់កិច្ចការទីផ្សារប្រចាំឆ្នាំ លើកទីបីជាប់ៗគ្នា របស់ធនាគារ ABA ពីកម្មវិធីពានរង្វាន់ CMO Asia Awards ដោយបញ្ជាក់ពីសមត្ថភាពជាបន្ដបន្ទាប់របស់ធនាគារក្នុងការរួមបញ្ចូលឌីជីថលនវានុវត្តន៍ជាមួយនឹងសាច់រឿងដែលឆ្លុះបញ្ចាំងពីបរិបទ និងអត្តសញ្ញាណជាតិយ៉ាងពិតប្រាកដ។
តាមរយៈសមិទ្ធផលថ្មីនេះ ABA បន្តបង្ហាញឲ្យឃើញថា ការបញ្ជ្រាបមរតកវប្បធម៌ប្រពៃណី ទៅក្នុងឌីជីថលនវានុវត្តន៍ អាចបង្កើតបទពិសោធដ៏មានអត្ថន័យ ដែលចូលរួមបម្រើជាទស្សនីយភាពជូនដល់បងប្អូនខ្មែរ។
