ធនាគារ ABA ឧបត្ថម្ភសិក្ខាសាលាដំបូងបំផុត របស់សហព័ន្ធតេនីសអាស៊ាន
19/Oct/2017
ធនាគារ ABA មានមោទនភាពឧបត្ថម្ភសិក្ខាសាលាដំបូងបំផុតរបស់សហព័ន្ធតេនីសអាស៊ានដែលបានរៀបចំដោយសហព័ន្ធកីឡាវាយតេនីសកម្ពុជា។ សិក្ខាសាលាប្រចាំឆ្នាំនេះបានរៀបចំឡើងក្នុងគោលបំណងអប់រំកម្មវិធីជាច្រើនដែលផ្តល់ដោយស្ថាប័នគ្រប់គ្រងកម្រិតពិភពលោក ដើម្បីអភិវឌ្ឍកីឡាតេនីសក្នុងប្រទេសនានា។ សិក្ខាសាលារយៈពេល 2 ថ្ងៃ នេះបានប្រព្រឹត្តទៅនាថ្ងៃ 16 និង 17 ខែតុលា ឆ្នាំ 2017 ដែលមានគណៈប្រតិភូចូលរួមចំនួន 40 រូប អញ្ជើញមកពី 25 ប្រទេស។
លោក ម៉ម ផលគុណ ប្រធានផ្នែកអភិវឌ្ឍនៃសហព័ន្ធកីឡាវាយតេនីសកម្ពុជា បានមានប្រសាសន៍ថា៖ “នេះគឺជាលើកទីមួយហើយដែលសហព័ន្ធកីឡាវាយតេនីសកម្ពុជាធ្វើជាម្ចាស់ផ្ទះរៀបចំព្រឹត្តិការណ៍នេះឡើង ហើយវាជាជោគជ័យដ៏ធំក្នុងការចំណាយពេលវេលាដ៏មានតម្លៃជាមួយសមាគមបណ្តាប្រទេសអាស៊ានរបស់យើង។ ជាងនេះទៅទៀត វាទិកានេះមានគោលបំណងក្នុងការលើកកម្ពស់ចំណេះដឹងរបស់ប្រទេសនីមួយៗពីការផ្លាស់ប្តូររដ្ឋបាលនៃការរៀបចំដំណើរការ ការប្រកួតរបស់ សហព័ន្ធកីឡាតេនីសអន្តរជាតិ(ITF) និងសហព័ន្ធកីឡាតេនីសអាស៊ាន(ATF) រួមទាំងព្រឹត្តិការណ៍ និងការប្រកួតដទៃទៀត។”
ក្នុងអំឡុងពេលនៃសិក្ខាសាលា សមាជិកនៃប្រទេសនីមួយៗមានឱកាសក្នុងការធ្វើបទបង្ហាញនៃដំណើរការអភិវឌ្ឍកីឡាតេនីសរបស់ប្រទេសរៀងខ្លួន និងបានចូលរួមស្តាប់ការបង្រៀនផ្នែករដ្ឋបាលនានា ដែលទាក់ទងនឹងការរៀបចំព្រឹត្តិការណ៍ និងការប្រកួតតេនីស។
