ធនាគារ ABA ឧបត្ថម្ភ គម្រោង My Finance Fitness សិក្ខាសាលាអប់រំផ្តោតលើចំណេះដឹងផ្នែកហិរញ្ញវត្ថុ
14/Feb/2017
ដោយតែងតែអនុវត្ត និងគោរពតាមគោលការណ៍ចូលរួមការងារសង្គម CSR និងចូលរួមជួយបង្កើនចំណេះដឹងផ្នែកហរិញ្ញវត្ថុក្នុងប្រទេសកម្ពុជា ធនាគារ ABA មានមោទនភាពក្នុងការឧបត្ថម្ភគាំទ្រដល់សិក្ខាសាលាអប់រំផ្តោតលើចំណេះដឹងផ្នែកហិរញ្ញវត្ថុដែលមានឈ្មោះថា គម្រោង My Finance Fitness ដែលរៀបចំដោយក្លិបយុវជនរបស់សកលវិទ្យាល័យ ហ្សាម៉ាន់។ សិក្ខាសាលានេះបានប្រារព្វឡើងក្នុងសាលា 3 ផ្សេងគ្នាក្នុងទីក្រុងភ្នំពេញ ចាប់ពីថ្ងៃទី03 ដល់ ថ្ងៃទី07 ខែកុម្ភៈ ឆ្នាំ 2017។
គោលបំណងនៃសិក្ខាសាលានេះ គឺចង់ផ្តល់ឲ្យសិស្សនូវមូលដ្ឋានគ្រឹះពីចំណេះដឹងផ្នែកហិរញ្ញវត្ថុដូចជាការធ្វើផែនការចំណាយ វប្បធម៍នៃការសន្សំប្រាក់ និងគំនិតយោបល់បន្ថែមការត្រិះរះពិចារណាមុនពេលចំណាយនានា។
លោក Igor Zimarev ប្រធាននាយកដ្ឋានផ្នែកទីផ្សាររបស់ធនាគារ ABA បានមានប្រសាសន៍ថា៖ បើយោងតាម គោលការណ៍របស់យើង យើងពិតជារីករាយក្នុងការឧបត្ថម្ភ គម្រោង “My Finance Fitness” ពីព្រោះថា សិក្ខាសាលាបែបនេះអាចជួយដល់សិស្សានុសិស្សទទួលបានចំណេះដឹងផ្នែកហិរញ្ញវត្ថុ និងរៀបចំសិស្សទាំងអស់ឲ្យ ត្រៀមខ្លួនសម្រាប់អនាគតខាងមុខ។ លោកក៏បន្ថែមទៀតថា៖ យើងសង្ឃឹមជឿជាក់យ៉ាងមុតមាំថាគំនិតផ្តួចផ្តើមនេះ នឹងជួយសិស្សានុសិស្សឲ្យយល់ពី សារៈសំខាន់នៃការគ្រប់គ្រងថវិកា ដើម្បីសម្រេចបាននូវគោលដៅក្នុជីវិត។
សិក្ខាសាលា 3ដង នេះមានសិស្សានុសិស្សចូលរួមសរុប 170នាក់ ដែលមានអាយុពី15 ដល់ 25ឆ្នាំ ដែលមកពីស្ថាប័នអប់រំចំនួន 3 ផ្សេងគ្នារួមទាំងសាសាសុវណ្ណភូមិ(សាខាទេពផន និងទួលគោក) និងសាកលវិទ្យាល័យកម្ពុជា។ សិក្ខាសាលានីមួយៗមានរយៈពេល 90នាទី ដែលមានរួមបញ្ជូលនូវប្រធានបទ៖ តម្លៃនៃសាច់ប្រាក់ វដ្តជីវិតនៃការប្រើប្រាស់លុយ វិធីក្នុងការគ្រប់គ្រងលុយ ចំណាយចាំបាច់ ចំណាយមិនចាំបាច់ និងមានវគ្គផ្សេងៗទៀត។
កញ្ញា សារុន ប៊ុនណាលីន ជាអ្នកគ្រប់គ្រងគម្រោង “My Finance Fitness” បានបញ្ជាក់ឲ្យដឹងថា៖ គម្រោង មានភាពច្បាស់លាស់ក្នុងការបង្រៀន ហើយយើងទទួលបានការចូលរួមយ៉ាងស្វាហាប់ពីសិស្ស។ ណាលីន បន្ថែមទៀតថា យើងនឹងត្រៀមបន្តសិក្ខាសាលានៅខែក្រោយៗទៀត ក្នុងសាលា និងសកលវិទ្យាល័យនានាក្នុងឆ្នាំនេះ។
