ធនាគារ ABA បង្ហាញដំណោះស្រាយឌីជីថលនៅក្នុងកម្មវិធី សន្និសីទអ្នកអភិវឌ្ឍន៍សុសវែរ និងពិព័រណ៍បច្ចេកវិទ្យា
04/Jul/2024
ABA ដែលជាធនាគារពាណិជ្ជធំបំផុតនៅកម្ពុជា និងឈានមុខគេនៅក្នុងវិស័យធនាគារឌីជីថល មានមោទនភាពដែលបានធ្វើជាអ្នកឧបត្ថម្ភ Gold Sponsor នៃកម្មវិធី សន្និសីទអ្នកអភិវឌ្ឍន៍សុសវែរ និងពិព័រណ៍បច្ចេកវិទ្យា (Code-C 2024) កាលពីថ្ងៃទី 28-29 ខែមិថុនា ឆ្នាំ 2024 កន្លងទៅថ្មីៗនេះ។ កម្មវិធីនេះ បានរៀបចំឡើងនៅបណ្ឌិតសភាបច្ចេកវិទ្យា ឌីជីថលកម្ពុជា (CADT) ដោយមានអ្នកចូលរួមជាង 3,500 នាក់ ប្រជុំដោយ អ្នកអភិវឌ្ឍន៍, អ្នកតាមដានបច្ចេកវិទ្យា, បណ្ដាអាជីវកម្ម និងសិស្ស-និស្សិត។
អ្នកនាងប្លុង ម៉ាលីពណ៌ ប្រធានអង្គភាពអភិវឌ្ឍន៍ផលិតផលឌីជីថល នៃធនាគារ ABA មានប្រសាសន៍ថា “កម្មវិធី Code-C នៅឆ្នាំនេះ គឺជាជំហានជោគជ័យដ៏សំខាន់មួយ ដោយអបអរខួបដប់ឆ្នាំនៃការបង្កើត CADT។ យើងខ្ញុំមានមោទនភាពដែលបានចូលរួមនៅក្នុងកម្មវិធីនេះ និងរួមចំណែកជំរុញដល់អេកូស៊ីស្ទែមឌីជីថលដ៏រស់រវើករបស់កម្ពុជា”។
ការចូលរួមរបស់ ABA នៅក្នុងកម្មវិធី Code-C នេះ បានគូសបញ្ជាក់ពីការប្ដេជ្ញាចិត្តចំពោះនវានុវត្តន៍ និងកិច្ចសហការរបស់ធនាគារនៅក្នុងវិស័យបច្ចេកវិទ្យា។ ធនាគារបានរៀបចំបញ្ជរនៅទីតាំងកម្មវិធីផ្ទាល់ ដើម្បីឲ្យអ្នកចូលរួមបានស្វែងយល់ និងសិក្សាបន្ថែមពីដំណោះស្រាយហិរញ្ញវត្ថុឌីជីថលប្រកបដោយភាពងាយស្រួល និងនវានុវត្ត ដូចជាផ្លែតហ្វម សេវាកម្ម របស់កម្មវិធី ABA Mobile និងកម្មវិធីទូទាត់អនឡាញ ABA PayWay ។
អ្នកនាងបានពន្យល់ថា “យើងខ្ញុំមានបំណងបង្ហាញផលិតផលឌីជីថលជាច្រើនប្រភេទដែលស្ថិតនៅក្រោម ABA PayWay ដែលជាផ្លែតហ្វមទូទាត់របស់ធនាគារយើង បង្កើតឡើងសម្រាប់បណ្ដាអាជីវកម្ម និងកន្លែងលក់ដូរតូចធំគ្រប់ប្រភេទ អាចដំណើរការទូទាត់ឌីជីថលទាំងនៅលើអេបរបស់ពួកគេ ឬនៅហាង/កន្លែងលក់ដូរផ្ទាល់។ ក្រៅពីនេះ យើងបានណែនាំ ABA Billzone ដែលជាផ្លែតហ្វមរបស់យើងសម្រាប់ការប្រមូលប្រាក់ទូទាត់ពីអតិថិជនជារូបវន្ដបុគ្គល និងអតិថិជនជាអាជីវកម្ម ព្រមទាំងផ្លែតហ្វមសេវាកម្មអភិវឌ្ឍន៍ នៅក្នុង ABA Mobile ផងដែរ។ ផ្លែតហ្វមសេវាកម្ម អនុញ្ញាតឲ្យអ្នកផ្គត់ផ្គង់មកពីគ្រប់វិស័យ ផ្ដល់សេវាកម្មរបស់ពួកគេដោយផ្ទាល់នៅក្នុងកម្មវិធី ABA Mobile ដែលបច្ចុប្បន្នមានអ្នកប្រើប្រាស់ជាង 3 លានគណនី ដោយជួយឲ្យអាជីវកម្មរបស់ពួកគេរីកចម្រើនកាន់តែឆាប់រហ័ស។ យើងខ្ញុំមានចំណាប់អារម្មណ៍ចំពោះការឆ្លើយតបជាវិជ្ជមានពីសំណាក់អ្នកចូលរួមទាំងអស់ ជាពិសេសម្ចាស់អាជីវកម្ម, អ្នកអភិវឌ្ឍន៍ និងសិស្ស-និស្សិត ដែលចង់សិក្សាស្វែងយល់ ពីសក្ដានុពល និងអានុភាពនៃការប្រើប្រាស់ដំណោះស្រាយឌីជីថលរបស់យើងខ្ញុំ”។
ការចូលរួមធ្វើជាអ្នកឧបត្ថម្ភក្នុងកម្មវិធី Code-C របស់ ABA បង្ហាញពីការប្ដេជ្ញាចិត្តរបស់ធនាគារក្នុងការគាំទ្រដំណើរនៃវឌ្ឍនភាពឌីជីថលរបស់កម្ពុជា។ ធនាគារនៅតែបន្ដយកចិត្តទុកដាក់ផ្ដល់សេវាហិរញ្ញវត្ថុប្រកបដោយនវានុវត្តន៍ និងជំរុញនូវបរិយាកាសប្រកបដោយស្មារតីសាមគ្គី ដែលពង្រឹងសមត្ថភាពរបស់អាជីវកម្ម និងអ្នកអភិវឌ្ឍន៍ ឲ្យរីកចម្រើនទៅមុខនៅក្នុង យុគសម័យឌីជីថល។
