ធនាគារ ABA ពង្រឹងសហគ្រិនភាពតាមរយៈការឧបត្ថម្ភកម្មវិធី លទ្ធភាពទទួលបានហិរញ្ញប្បទាន 2026 របស់សមាគមសហគ្រិនវ័យក្មេងកម្ពុជា
07/Apr/2026
ធនាគារ ABA បានក្លាយជាអ្នកឧបត្ថម្ភ Gold Sponsor នៃកម្មវិធី លទ្ធភាពទទួលបានហិរញ្ញប្បទាន 2026 (Access to Finance Program) របស់សមាគមសហគ្រិនវ័យក្មេងកម្ពុជា (YEAC)។
រៀបចំឡើងដោយសមាគមសហគ្រិនវ័យក្មេងកម្ពុជា សហការជាមួយពីសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា កម្មវិធីដែលដំណើរការមួយឆ្នាំពេញនេះ នឹងមានសិក្ខាសាលា កិច្ចពិភាក្សា និងកម្មវិធីចែករំលែកជាច្រើនពីអ្នកជំនាញ បង្កើតឡើងដើម្បីផ្សារភ្ជាប់សហគ្រិន និងអាជីវកម្មនានា ជាមួយចំណេះដឹងល្អៗ ធនធាន បទពិសោធ និងការគាំទ្រនានាដែលពួកគាត់ត្រូវការដើម្បីពង្រឹង និងពង្រីកសក្ដានុពលរបស់ខ្លួន។
កម្មវិធីដាក់ប្រកាសសម្ពោធជាផ្លូវការ បានប្រព្រឹត្តិទៅកាលពីថ្ងៃទី 3 ខែមេសា ក្រោមអធិបតីភាព លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា ភាគីពាក់ព័ន្ធសំខាន់ៗ ដៃគូឧបត្ថម្ភ និងភ្ញៀវកិត្តិយសផ្សេងៗ។ ក្នុងការថ្លែងសុន្ទរកថា លោកជំទាវបណ្ឌិតក៏បានគូសបញ្ជាក់អំពីតួនាទីដ៏សំខាន់របស់ កម្មវិធីលទ្ធភាពទទួលបានហិរញ្ញប្បទាន ក្នុងការពង្រឹងសមត្ថភាពរបស់សហគ្រិន និងបង្កើនឱកាសសម្រាប់ពួកគាត់ក្នុងថ្ងៃអនាគត។
ក្នុងឆ្នាំទីប្រាំ នៃការឧបត្ថម្ភកម្មវិធី លទ្ធភាពទទួលបានហិរញ្ញប្បទាន ABA បន្តប្តេជ្ញាចិត្តយ៉ាងមុតមាំក្នុងការគាំទ្រគំនិតផ្តួចផ្តើម ដែលជំរុញទំនាក់ទំនងរវាងសហក្រិនវ័យក្មេង និងវិស័យហិរញ្ញវត្ថុ ដែលបន្តវិនិយោគទៅលើវឌ្ឍនភាពសេដ្ឋកិច្ចប្រកបដោយចីរភាព និងការរីកចម្រើននៃប្រទេសជាតិ។
