ធនាគារ ABA ចូលរួមក្នុងពិព័រណ៍វិទ្យាសាស្ដ្រ បច្ចេកវិទ្យា និងនវានុវត្តន៍ដំបូងបង្អស់នៅកម្ពុជា ឆ្នាំ 2023
29/Mar/2023
ធនាគារ ABA បានឧបត្ថម្ភក្នុងពិព័រណ៍វិទ្យាសាស្ដ្រ បច្ចេកវិទ្យា និងនវានុវត្តន៍ កម្ពុជា-អន្ដរជាតិ (STI) លើកទី 1 ដែលត្រូវបានកំណត់ជា ទិវាជាតិវិទ្យាសាស្ដ្រ បច្ចេកវិទ្យា និងនវានុវត្តន៍។ ពិព័រណ៍នេះ ត្រូវបានរៀបចំដោយឡើងដោយក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ (MISTI) ដើម្បីបង្ហាញពីវឌ្ឍនភាពបច្ចេកវិទ្យាចុងក្រោយបង្អស់ក្នុងវិស័យវិទ្យាសាស្ត្រ បច្ចេកវិទ្យា និងនវានុវត្តន៍។
ពិព័រណ៍វិទ្យាសាស្ដ្រ បច្ចេកវិទ្យា និងនវានុវត្តន៍ ត្រូវបានអញ្ជើញចូលរួមក្រោមអធិបតីភាពដ៏ខ្ពង់ខ្ពស់របស់សម្ដេចតេជោ នាយករដ្ឋមន្ដ្រី, ឯកឧត្តម ចម ប្រសិទ្ធ ទេសរដ្ឋមន្ត្រី និងរដ្ឋមន្ដ្រីក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ និងភ្ញៀវកិត្តិយសជាច្រើនរូបទៀតកាលពីថ្ងៃទី 26 ដល់ថ្ងៃទី 28 ខែមីនា នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានី ភ្នំពេញ។
ក្នុងអំឡុងពិព័រណ៍នេះ ក្រុមការងារ ABA បានជួយបើកគណនីរហ័ស ABA ជូនអតិថិជនដែលបានចូលរួមក្នុងពិព័រណ៍ផ្ទាល់ ក៏ដូចជាបានផ្ដល់ព័ត៌មានអំពីផលិតផល និងសេវាកម្មផ្សេងៗរបស់ធនាគារនៅបញ្ជរផ្ទាល់ផងដែរ។
លោកស្រី ធាម រមណីយ នាយិកាទំនាក់ទំនងគូភាគី ប្រធានគ្រប់គ្រងតំបន់ មានប្រសាសន៍ថា “ក្នុងនាមជាធនាគារឌីជីថលឈានមុខគេនៅកម្ពុជា ធនាគារ ABA យល់ច្បាស់អំពីសារៈសំខាន់នៃវឌ្ឍនភាពបច្ចេកវិទ្យា និងនវានុវត្តន៍ ក្នុងការរួមចំណែកដល់ការអភិវឌ្ឍ និងការរីកចម្រើននៅក្នុងប្រទេស។ យើងខ្ញុំមានកិត្តិយសដែលបានចូលរួមក្នុងពិព័រណ៍ដ៏មានសារៈសំខាន់មួយនេះ និងត្រូវបានរៀបចំជាលើកដំបូងបង្អស់នៅក្នុងប្រទេស។ យើងខ្ញុំនៅតែបន្ដប្ដេជ្ញាគាំទ្រគំនិតផ្ដួចផ្ដើមផ្សេងៗ ដែលរួមចំណែកដល់វឌ្ឍនភាពរបស់ប្រទេសកម្ពុជា”។
ពិព័រណ៍នេះ គឺជាជំហានដ៏សំខាន់មួយឆ្ពោះទៅកាន់ការគាំទ្រគោលនយោបាយរបស់រាជរដ្ឋាភិបាល និងជាផែនទីបង្ហាញផ្លូវសម្រាប់សង្គមឌីជីថលកម្ពុជា ក៏ដូចជាពង្រឹងការអភិវឌ្ឍធនធានមនុស្សបន្ថែមទៀតនៅក្នុងស្រុកផងដែរ។
ការចូលរួមរបស់ ABA នៅក្នុងពិព័រណ៍នេះ ឆ្លុះបញ្ចាំងអំពីការប្ដេជ្ញាចិត្តរបស់ធនាគារ ក្នុងការគាំទ្រសង្គមឌីជីថលកម្ពុជា ខណៈខ្លួនបាននឹងកំពុងផ្ដល់ដំណោះស្រាយសេវាធនាគារដ៏ទំនើបជូនអតិថិជន ព្រមទាំងគាំទ្រដល់ចក្ខុ វិស័យរបស់រដ្ឋាភិបាល ក្នុងការប្រែក្លាយកម្ពុជា ជាប្រទេសកាន់តែជឿនលឿនផ្នែកបច្ចេកវិទ្យា៕
