ធនាគារ ABA ត្រូវបានទទួលស្គាល់ជាធនាគារលេខ 1 របស់កម្ពុជា ក្នុងបញ្ជីធនាគារឆ្នើមរបស់ពិភពលោក ឆ្នាំ2026 ពីទស្សនាវដ្តី Forbes
11/Sep/2026
ធនាគារ ABA ត្រូវបានទទួលស្គាល់ជាធនាគារលេខ 1 របស់កម្ពុជា នៅក្នុងការវាយតម្លៃ ធនាគារឆ្នើមលំដាប់ពិភពលោក ឆ្នាំ2026 (World’s Top Performing Banks 2026 Ranking) លើកដំបូង របស់ទស្សនាវដ្តី Forbes ដោយជាប់ចំណាត់ថ្នាក់លេខ 31 ទូទាំងពិភពលោក នៅក្នុងប្រភេទ ធនាគារខ្នាតមធ្យមកម្រិតទាប (Lower Mid-size Banks) និងស្ថិតក្នុងចំណោមស្ថាប័នធនាគារដែលមានប្រតិបត្តិការល្អបំផុតនៅលើពិភពលោក។
ការទទួលស្គាល់នេះ គឺជាសមិទ្ធផលដ៏សំខាន់មួយសម្រាប់ធនាគារ ABA និងជាស្តង់ដារសកលសម្រាប់វាស់ស្ទង់ភាពរឹងមាំ ភាពធន់ និងគុណភាពនៃលទ្ធផលហិរញ្ញវត្ថុរបស់ធនាគារ។ ចំណាត់ថ្នាក់ធនាគារឆ្នើមលំដាប់ពិភពលោក ត្រូវបានរៀបចំដោយទស្សនាវដ្តី Forbes សហការជាមួយក្រុមហ៊ុនស្រាវជ្រាវទីផ្សារ Statista ដោយផ្អែកទៅលើទិន្នន័យហិរញ្ញវត្ថុជាក់ស្ដែង និងវាយតម្លៃលើ 4 ចំណុច៖
- ប្រាក់ចំណេញ
- ការរីកចម្រើន និងគុណភាពប្រាក់ចំណូល
- ដើមទុន និងភាពធន់នៃការផ្ដល់ហិរញ្ញប្បទាន
- គុណភាពទ្រព្យសកម្ម និងប្រសិទ្ធភាពប្រតិបត្តិការ។
ដើម្បីធានានូវការវាយតម្លៃបានត្រឹមត្រូវរវាងធនាគារដែលមានទំហំខុសៗគ្នា គ្រឹះស្ថាននីមួយៗត្រូវបានបែងចែកជា 6 ក្រុម ដោយផ្អែកទៅលើទំហំទ្រព្យសកម្មសរុប។ ធនាគារ ABA ត្រូវបានចាត់ថ្នាក់ក្នុងក្រុម ធនាគារខ្នាតមធ្យមកម្រិតទាប ដែលធនាគារដែលស្ថិតក្នុងក្រុមនេះ ត្រូវមានទ្រព្យសកម្មចន្លោះពី 10-20 ប៊ីលានដុល្លារអាមេរិក។ ក្នុងក្រុមនេះ ធនាគារ ABA ជាប់ចំណាត់ថ្នាក់លេខ 31 នៅទូទាំងពិភពលោក និងចំណាត់ថ្នាក់លេខ 1 នៅកម្ពុជា។
ចំណាត់ថ្នាក់នេះ បានដាក់ធនាគារ ABA ក្នុងចំណោមធនាគារដែលមានលទ្ធផលប្រតិបត្តិការល្អបំផុតចំនួន 500 មកពី 89ប្រទេស ដែលត្រូវបានទទួលស្គាល់ក្នុងការវាយតម្លៃជាសកលលើកដំបូងរបស់ទស្សនាវដ្តី Forbes។
សមិទ្ធផលនេះ បានឆ្លុះបញ្ចាំងពីភាពរឹងមាំនៃមូលដ្ឋានហិរញ្ញវត្ថុរបស់ ABA និងសមត្ថភាពរបស់ធនាគារក្នុងការ រក្សាបាននូវប្រាក់ចំណេញ និងស្ថិរភាពកំណើន ជាមួយនឹងដើមទុនដ៏រឹងមាំ និងការរចនាសម្ពន្ធកម្ចីហិរញ្ញប្បទានត្រឹមត្រូវ, គុណភាពទ្រព្យសកម្ម និងប្រសិទ្ទភាពប្រតិបត្តិការ។ ការណ៍នេះ ក៏បានគូសបញ្ជាក់ពីតួនាទីរបស់ធនាគារ ក្នុងនាមជាគ្រឹះស្ថានហិរញ្ញវត្ថុឈានមុខនៅកម្ពុជា និងបង្ហាញនូវសមត្ថភាពប្រកួតប្រជែងនៃវិស័យធនាគាររបស់កម្ពុជានៅលើឆាកអន្តរជាតិផងដែរ។
លោក Askhat Azhikhanov នាយកប្រតិបត្តិនៃធនាគារ ABA មានប្រសាសន៍ថា “យើងខ្ញុំ មានកិត្តិយសក្រៃលែងដែលត្រូវបានទស្សនាវដ្តី Forbes ទទួលស្គាល់ជាធនាគារលេខ 1 នៅកម្ពុជា ក្នុងការវាយតម្លៃ ធនាគារឆ្នើមលំដាប់ពិភពលោកជាលើកដំបូងរបស់ទស្សនាវដ្ដី។ ការដែលធនាគារ ABA ត្រូវបានវាយតម្លៃជាមួយធនាគារនានាជុំវិញពិភពលោក ដោយផ្អែកលើសូចនាករហិរញ្ញវត្ថុជាក់ស្ដែង បានធ្វើឲ្យលទ្ធផលនេះកាន់តែមានអត្ថន័យពិសេសសម្រាប់យើងខ្ញុំ”។
លោកក៏បានបន្តថា “សមិទ្ធផលនេះ ឆ្លុះបញ្ចាំងពីភាពរឹងមាំនៃអាជីវកម្ម និងសង្គតិភាពនៃលទ្ធផលដែលយើងខ្ញុំសម្រេចបានកន្លងមក។ ប៉ុន្ដែ លើសពីនេះ វាក៏តំណាងឲ្យអ្វីដែលធំជាងនេះផងដែរ ពោលគឺជាលទ្ធផលនៃទំនុកចិត្តរបស់អតិថិជនរាប់លាននាក់មកលើធនាគារយើងខ្ញុំ ការប្តេជ្ញាចិត្តយ៉ាងមុតមាំរបស់ក្រុមការងារ និងការបន្តផ្តោតសំខាន់ទៅលើការកសាងធនាគារដែលរឹងមាំ ជាទីទុកចិត្ត និងមានចក្ខុវិស័យឆ្ពោះទៅមុខ។ យើងខ្ញុំមានមោទនភាពដែលបានឃើញលទ្ធផលប្រតិបត្តិការរបស់ ABA ត្រូវបានទទួលស្គាល់ក្នុងឆាកអន្តរជាតិ ហើយយើងខ្ញុំនឹងបន្តបង្កើនស្តង់ដារប្រតិបត្តិការរបស់ខ្លួនឲ្យកាន់តែខ្ពស់ឡើង”។
សម្លឹងឆ្ពោះទៅមុខ ធនាគារ ABA នឹងបន្តពង្រឹងមូលដ្ឋានគ្រឹះដែលគាំទ្រ ដល់លទ្ធផលការងារល្អប្រសើរក្នុងរយៈពេលវែង តាមរយៈការវិនិយោគទៅលើធនធានមនុស្ស បច្ចេកវិទ្យា និងសមត្ថភាពរបស់ខ្លួន ព្រមទាំងផ្តល់នូវដំណោះស្រាយហិរញ្ញវត្ថុប្រកបដោយនវានុវត្តន៍ សុវត្ថិភាព និងងាយស្រួលប្រើប្រាស់សម្រាប់អតិថិជន និងរួមចំណែកដល់ការអភិវឌ្ឍជាបន្ដបន្ទាប់ និងភាពរឹងមាំនៃវិស័យហិរញ្ញវត្ថុរបស់កម្ពុជា។
