ធនាគារ ABA ជួយអត្តពលិកកម្ពុជាជំនាន់ថ្មី តាមរយៈការឧបត្ថម្ភដល់សហព័ន្ធកីឡាជឺជីតស៊ូ
09/Jul/2026
ធនាគារ ABA បានក្លាយជាអ្នកឧបត្ថម្ភផ្លូវការរបស់ សហព័ន្ធកីឡាជឺជីតស៊ូកម្ពុជា ដែលបញ្ជាក់ជាថ្មី អំពីការប្តេជ្ញាចិត្តរបស់ខ្លួនក្នុងការគាំទ្រអត្តពលិកកម្ពុជា និងពង្រឹងវត្តមានរបស់កម្ពុជានៅលើឆាកកីឡា អន្តរជាតិ។
ការឧបត្ថម្ភនេះ នឹងជួយជាថវិកា ដើម្បីទំនុកបម្រុងការត្រៀមខ្លួនរបស់អត្តពលិក ការចូលរួមក្នុងការប្រកួតអន្តរជាតិ ការហ្វឹកហាត់ និងកម្មវិធីអភិវឌ្ឍន៍នានា ដោយបង្កើតឱកាសកាន់តែច្រើនសម្រាប់អត្តពលិកកម្ពុជា ក្នុងការប្រកួត និងពង្រឹងសមត្ថភាពលើឆាកអន្តរជាតិ។
កាលពីថ្ងៃទី9 ខែកក្កដា ឆ្នាំ2026 កន្លងទៅថ្មីៗនេះ ពិធីចុះហត្ថលេខាលើអនុស្សរណៈយោគយល់ ត្រូវបានធ្វើឡើង ដោយមានអញ្ជើញចូលរួមពីលោក Igor Zimarev នាយកទីផ្សារ និងកិច្ចការ CSR នៃធនាគារ ABA និងឯកឧត្តម ថោង បញ្ញាធន ប្រធានសហព័ន្ធកីឡាជឺជីតស៊ូកម្ពុជា ព្រមទាំងអ្នកតំណាងពីស្ថាប័នទាំងពីរ រួមជាមួយវត្តមានរបស់អត្តពលិកកម្ពុជាផងដែរ។
ចាប់តាំងពីឆ្នាំ 2022 មក អត្តពលិកជឺជីតស៊ូកម្ពុជា បានឈ្នះមេដាយចំនួន 65 ពីការប្រកួតអន្តរជាតិ ដោយក្នុងនោះមានមេដាយមាសចំនួន 25។ ក្នុងព្រឹត្តិការណ៍កីឡាស៊ីហ្គេម លើកទី 32 ដែលប្រទេសកម្ពុជា ធ្វើជាម្ចាស់ផ្ទះ ក្រុមអត្តពលិកបានបន្តបង្ហាញសមត្ថភាពរបស់ខ្លួនដោយទទួលបានមេដាយចំនួន 12។ សមិទ្ធផលជោគជ័យទាំងនេះ បានបង្ហាញពីការប្តេជ្ញាចិត្តរបស់សហព័ន្ធ ក្នុងការបណ្តុះបណ្តាលអត្តពលិកកម្ពុជាជំនាន់ថ្មី ប្រកបដោយសមត្ថភាពខ្ពស់ និងឆន្ទៈប្រកួតប្រជែង។
ខណៈដែលអត្តពលិកជឺជីតស៊ូកម្ពុជា បន្តទទួលបានលទ្ធផលល្អប្រសើរក្នុងការប្រកួតថ្នាក់តំបន់ និងអន្តរជាតិ ABA បានមើលឃើញសហព័ន្ធកីឡាជឺជីតស៊ូកម្ពុជា ជាគំរូដ៏ល្អមួយ បង្ហាញថា សមត្ថភាពទេពកោសល្យ វិន័យខ្ជាប់ខ្ជួន និងឆន្ទៈប្ដេជ្ញាចិត្តយូរអង្វែង គឺពិតជាអាចលើកមុខមាត់កម្ពុជានៅលើឆាកអន្ដរជាតិយ៉ាងប្រាកដ។
លោក Igor Zimarev នាយកទីផ្សារ និងកិច្ចការ CSR នៃធនាគារ ABA មានប្រសាសន៍ថា “ពីក្រោយសមិទ្ធផលនៃកីឡានីមួយៗ សុទ្ធតែផ្តើមចេញពីការប្តេជ្ញាចិត្ត និងការតស៊ូប្រឹងប្រែងអស់ជាច្រើនឆ្នាំ។ យើងខ្ញុំ សង្ឃឹមថាការគាំទ្រដល់សហព័ន្ធកីឡាជឺជីតស៊ូកម្ពុជា នឹងជួយបង្កើតឱកាសជាច្រើនដល់អត្តពលិកកម្ពុជា ដើម្បីហ្វឹកហាត់ ប្រកួត និងសម្រេចបាននូវសក្តានុពលពេញលេញ ខណៈដែលពួកគាត់តំណាងកម្ពុជាលើឆាកអន្តរជាតិ”។
ឯកឧត្តម ថោង បញ្ញាធន មានប្រសាសន៍ថា “នៅសហព័ន្ធកីឡាជឺជីតស៊ូកម្ពុជា យើងខ្ញុំជឿជាក់យ៉ាងមុតមាំថា ការវិនិយោគលើយុវជន គឺជាការវិនិយោគលើអនាគតរបស់កម្ពុជា។ យើងខ្ញុំមានសេចក្តីសោមនស្ស ដែលធនាគារ ABA មានចក្ខុវិស័យនេះដូចយើងដែរ។ ការចូលរួមរបស់ ABA ក្នុងនាមដៃគូយុទ្ធសាស្ត្ររបស់យើង បានអនុញ្ញាតឲ្យអត្តពលិកយើងមានឱកាសកាន់តែច្រើនក្នុងការពង្រឹងសមត្ថភាពក្នងរយៈពេលច្រើនឆ្នាំបន្ដទៅមុខទៀត”។
តាមរយៈគំនិតផ្តួចផ្តើមទាំងនេះ ABA បន្តប្តេជ្ញាចិត្តក្នុងការគាំទ្រស្ថាប័ន និងអង្គភាពដែលបង្កើតឱកាសសម្រាប់ធនធានមនុស្សកម្ពុជា ដើម្បីភាពរីកចម្រើនរបស់ពួកគាត់ និងតំណាងកម្ពុជាដោយមោទនភាពលើឆាកអន្តរជាតិ។
