ធនាគារ ABA គាំទ្រសហគ្រាសខ្នាតមីក្រូ តូច និងមធ្យមកម្ពុជា ដោយចូលរួមឧបត្ថម្ភក្នុង សន្និបាតប្រចាំឆ្នាំរបស់ សាជីវកម្មធានាឥណទានកម្ពុជា (CGCC)
07/Feb/2024
ABA ដែលជាធនាគារពាណិជ្ជធំបំផុតមួយនៅកម្ពុជា មានមោទនភាពដែលបានធ្វើជា Gold Sponsor នៅក្នុងសន្និបាតប្រចាំឆ្នាំរបស់ CGCC ក្រោមប្រធានបទ “ពិពិធកម្មយន្តការធានាឥណទាន ដើម្បីហិរញ្ញប្បទានប្រកបដោយចីរភាព របស់សហគ្រាសខ្នាតតូច និងមធ្យម” ដែលប្រព្រឹត្តទៅនៅថ្ងៃទី 31 ខែមករា ឆ្នាំ2024។
នៅក្នុងសន្និបាតនេះផ្ទាល់ ធនាគារបានទទួលពានរង្វាន់កិត្តិយស សម្រាប់ការប្ដេជ្ញាចិត្តឥតងាករេរបស់ខ្លួន ក្នុងការគាំទ្រសហគ្រាសខ្នាតមីក្រូ ខ្នាតតូច និងមធ្យម (MSMEs) របស់កម្ពុជា។
ABA ត្រូវបានទទួលស្គាល់ចំពោះសមត្ថភាពលេចធ្លោរបស់ខ្លួនដោយទទួលបានពាន "ការអនុវត្តការងារឆ្នើមសម្រាប់ការបញ្ចេញកម្ចីមានការធានាបានច្រើនជាងគេ " ដែលគូសបញ្ជាក់ពីការយកចិត្តទុកដាក់របស់ខ្លួនក្នុងការសម្របសម្រួល លទ្ធភាពទទួលបានហិរញ្ញវត្ថុរបស់ សហគ្រាសខ្នាតមីក្រូ ធុនតូច និងមធ្យម។ លើសពីនេះទៀត ធនាគារក៏បានទទួលពានរង្វាន់ពិសេសមួយទៀត សម្រាប់ការរក្សាបាននូវគុណភាពកម្ចីមានការធានាបានល្អជាងគេសម្រាប់ឆ្នាំ 2023 ដែលបង្ហាញពីការអនុវត្តការគ្រប់គ្រងហានិភ័យរបស់ខ្លួនប្រកបដោយភាពហ្មត់ចត់។
លោក សឹម លីដា នាយកឥណទានអាជីវកម្មខ្នាតធំ និងមធ្យមរបស់ធនាគារ ABA មានប្រសាសន៍ថា “ការទទួលស្គាល់ទាំងលើនេះ គឺជាសក្ខីភាពបញ្ជាក់ពីការប្តេជ្ញាចិត្តឥតងាករេរបស់ ABA ក្នុងការផ្តល់ជួយទ្រទ្រង់ និងពង្រឹងសមត្ថភាពរបស់សហគ្រាសធុនតូច និងមធ្យម ដែលជាឆ្អឹងខ្នងនៃសេដ្ឋកិច្ចកម្ពុជា”។
"តាមរយៈការសហការ និងការអនុវត្តគម្រោងធានាឥណទានឯកត្តឥណទានចំនួន 3 របស់ CGCC យើងអាចសម្រួលដល់អាជីវកម្មដែលមានសក្តានុពល ប៉ុន្តែទ្រព្យតម្កល់នៅមានកម្រិត នូវលទ្ធភាពទទួលបានហិរញ្ញប្បទាន ដែលនៅទីបំផុត សហគ្រាសទាំងនោះ បានចូលរួមចំណែកដល់កំណើនសេដ្ឋកិច្ចរបស់ប្រទេសជាតិ"។
អំឡុងពេលសន្និបាតនោះផងដែរ CGCC ក៏បានដាក់ដំណើរការកម្មវិធី Entrepreneurship Program Imitative of CGCC (EPIC) របស់ខ្លួន ដែលជាកម្មវិធីលើកកម្ពស់ចំណេះដឹងហិរញ្ញវត្ថុ និងសហគ្រិនភាពរបស់សហគ្រាសខ្នាតតូច និងមធ្យម។ ABA គាំទ្រយ៉ាងពេញទំហឹងចំពោះគំនិតផ្ដួចផ្ដើមដែលផ្ដល់នូវចំណេះ និងជំនាញចាំបាច់នានាជូនដល់សហគ្រិនកម្ពុជាក្នុងការរីកចម្រើន។
ABA គឺជាធនាគារឈានមុខគេ សម្រាប់ដំណោះស្រាយហិរញ្ញប្បទានសហគ្រាសធុនតូច និងមធ្យម ដោយផ្តល់នូវលទ្ធភាពទទួលបានកម្ចីកាន់តែងាយស្រួល ព្រមទាំងសេវាហិរញ្ញវត្ថុដែលមានលក្ខណៈសមស្រប ដើម្បីបំពេញតម្រូវការរបស់អាជីវកម្មខ្នាតតូច។ ការប្តេជ្ញាចិត្តនេះ ស្របនឹងបេសកកម្ម និងគុណតម្លៃសាជីវកម្មរបស់ ABA ក្នុងគោលបំណងផ្ដល់ផលវិជ្ជមានដល់ជីវភាពរបស់ប្រជាពលរដ្ឋកម្ពុជា និងរួមចំណែកដល់ការអភិវឌ្ឍប្រទេសជាតិ។