ធនាគារ ABA ពង្រីកសេវាទូទាត់ QR ឆ្លងប្រទេស ដល់ម៉ាឡេស៊ី ដើម្បីជំរុញការប្រើប្រាស់ប្រាក់រៀលជាឌីជីថល
12/Dec/2025
ធនាគារ ABA បានដាក់ដំណើរការជាផ្លូវការ នូវសេវាទូទាត់ QR ឆ្លងប្រទេស នៅម៉ាឡេស៊ី ដែលអនុញ្ញាតឲ្យអតិថិជនធ្វើប្រតិបត្តិការយ៉ាងរលូន តាម ABA Mobile។ ចាប់ពីថ្ងៃទី12 ខែធ្នូ ឆ្នាំ 2025 តទៅ អតិថិជន ABA អាចស្គែនទូទាត់យ៉ាងងាយស្រួលជាមួយ DuitNow QR នៅតាមបណ្ដាអាជីវកម្មជាច្រើនទូទាំងប្រទេសម៉ាឡេស៊ី។
ការស្គែនទូទាត់ គឺមានភាពងាយស្រួល។ បើក ABA Mobile ចុចប៊ូតុង ABA ស្គែន រួចស្គែនកូដ DuitNow QR ដែលមាននៅតាមហាង កន្លែងលក់ដូរ អាជីវកម្មនានា ហើយដាក់ចំនួនទឹកប្រាក់ រួចបញ្ជាក់ប្រតិបត្តិការជាមួយលេខសម្ងាត់ ជាការស្រេច។ មិនកំណត់ចំនួនប្រតិបត្តិការប្រចាំថ្ងៃ ហើយកម្រិតចំនួនទឹកប្រាក់ប្រតិបត្តិការគឺ កំណត់ត្រឹម 2.9 លានរៀលក្នុងមួយថ្ងៃ។
គំនិតផ្តួចផ្តើមនេះ នឹងលើកកម្ពស់ការទូទាត់ឆ្លងប្រទេសប្រកបដោយភាពងាយស្រួល និងសុវត្ថិភាព និងព្រមទាំងគាំទ្រវឌ្ឍនភាពរបស់កម្ពុជា ឆ្ពោះទៅកាន់សង្គមឌីជីថល និងជំរុញការប្រើប្រាស់ប្រាក់រៀល។
លោក Sanzhar Abdullayev នាយកកាត និងសេវាទូទាត់អេឡិកត្រូនិក នៃធនាគារ ABA មានប្រសាសន៍ថា “ការដាក់ឲ្យប្រើប្រាស់ សេវាទូទាត់ QR ឆ្លងប្រទេស នៅម៉ាឡេស៊ី បានបញ្ជាក់ពីកិច្ចខិតខំប្រឹងប្រែងរបស់យើងខ្ញុំ ក្នុងការពង្រឹងសេវាអន្តរជាតិ ដើម្បីឆ្លើយតបតាមតម្រូវការអតិថិជន។ ជាមួយ ABA Mobile អតិថិជនមិនចាំបាច់ដកប្រាក់ដាក់តាមខ្លួនច្រើនៗដូចមុនទេ – ពួកគាត់អាចស្គែន និងទូទាត់យ៉ាងងាយស្រួល ដូចនៅប្រទេសកម្ពុជាយើងដែរ ដោយការទូទាត់មានដំណើរការលឿនរហ័ស និងមានសុវត្ថិភាពខ្ពស់។”
ABA នឹងបន្តពង្រីកសេវាទូទាត់ឌីជីថលដែលជំរុញដល់ការប្រើប្រាស់រូបិយប័ណ្ណជាតិ តាមរយៈប្រតិបត្តិការឌីជីថល និងលើកកម្ពស់បរិយាបន្នហិរញ្ញវត្ថុទូទាំងប្រទេសកម្ពុជា។
សម្រាប់ព័ត៌មានបន្ថែមទាក់ទងនឹងការទូទាត់ QR នៅក្នុងប្រទេសម៉ាឡេស៊ីជាមួយ ABA Mobile សូមទូរស័ព្ទទៅលេខ 1 800 203 203 (ឥតគិតថ្លៃក្នុងប្រទេសកម្ពុជា) អ៊ីមែលមកកាន់ [email protected] ឬទាក់ទងតាមបណ្តាញសង្គមផ្លូវការរបស់យើងខ្ញុំ។
