ធនាគារ ABA លើកកម្ពស់សហគ្រាសក្នុងស្រុក តាមរយៈទិវាជាតិសហគ្រាសធុនមីក្រូ តូច និងមធ្យម របស់សមាគម FASMEC
29/Jun/2026
ធនាគារ ABA បានក្លាយជា Diamond Sponsor នៃទិវាជាតិសហគ្រាសធុនមីក្រូ តូច និងមធ្យម រៀបចំឡើងដោយសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) ដែលបានប្រារព្ធធ្វើឡើងកាលពីថ្ងៃទី 27 ខែមិថុនា កន្លងទៅថ្មីៗនេះ នៅមជ្ឈមណ្ឌលសន្និបាតកោះពេជ្រ។
ទិវាជាតិប្រចាំឆ្នាំនេះ ត្រូវបានបង្កើតឡើង ដើម្បីពង្រឹងទំនាក់ទំនងរវាងរាជរដ្ឋាភិបាល និងវិស័យឯកជនទូទាំងប្រទេស។ ព្រឹត្តិការណ៍នេះ មានគោលបំណងជំរុញកិច្ចពិភាក្សា និងផ្តល់ជាវេទិកាសម្រាប់បង្កើតភាពជាដៃគូ ផ្លាស់ប្តូរគំនិត និងគូសបញ្ជាក់អំពីសារសំខាន់នៃការលើកកម្ពស់ផលិតផលក្នុងស្រុក ដើម្បីបំពេញតម្រូវការជាតិ និងអន្តរជាតិ។
កម្មវិធីដ៏មានសារៈសំខាន់នេះ ក៏មានវត្តមានជាអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា អមដោយការចូលរួមពីសំណាក់ស្ថាប័នរាជរដ្ឋាភិបាល ម្ចាស់ក្រុមហ៊ុន សហគ្រាសឯកជន គ្រឹះស្ថានហិរញ្ញវត្ថុ និងដៃគូសមាគម FASMEC ផងដែរ។
នៅក្នុងកម្មវិធីផងដែរ ABA បានរៀបចំបញ្ជរ ដែលអ្នកចូលរួមអាចសិក្សា និងស្វែងយល់បន្ថែមអំពីដំណោះស្រាយហិរញ្ញវត្ថុដ៏សម្បូរបែបរបស់ធនាគារយើង ជាពិសេសផលិតផលកម្ចីសម្រាប់លើកកម្ពស់សហគ្រាសធុនតូច និងមធ្យម ជាមួយនឹងដើមទុន និងធនធានចាំបាច់សម្រាប់អាជីវកម្ម ដើម្បីពង្រីលប្រតិបត្តិការ និងពង្រឹងសមត្ថភាពប្រកួតប្រជែងក្នុងទីផ្សារ។
ក្នុងនាមជាតួអង្គសំខាន់ក្នុងវិស័យហិរញ្ញវត្ថុ ធនាគារ ABA បន្តប្តេជ្ញាចិត្តយ៉ាងមុតមាំ ក្នុងការគាំទ្រសហគមន៍សហគ្រាសធុនតូច និងមធ្យមក្នុងប្រទេសកម្ពុជា និងរួមចំណែកដល់ការអភិវឌ្ឍសេដ្ឋកិច្ចជាតិប្រកបដោយចីរភាព។
