ធនាគារ ABA គាំទ្រកម្មវិធី លទ្ធភាពទទួលបានហិរញ្ញប្បទាន 2025 របស់សមាគមសហគ្រិនវ័យក្មេងកម្ពុជា ក្នុងនាមជា Gold Sponsor
19/May/2025
ធនាគារ ABA បានក្លាយជា Gold Sponsor នៅក្នុងកម្មវិធី លទ្ធភាពទទួលបានហិរញ្ញប្បទាន 2025 (Access to Finance Program) បង្កើតឡើងដោយ សមាគមសហគ្រិនវ័យក្មេងកម្ពុជា (YEAC) ដើម្បីលើកកម្ពស់ចំណេះដឹងផ្នែកហិរញ្ញវត្ថុ និងបរិយាបន្នហិរញ្ញវត្ថុ ដល់សហគ្រិន និងសហគ្រាសធុនមីក្រូ តូច និងមធ្យម (MSMEs)។
ក្រោមប្រធានបទ “ការស្វែងយល់ជម្រើសហិរញ្ញប្បទាន ដើម្បីទ្រទ្រង់អាជីវកម្ម” កម្មវិធីនេះ មានគោលបំណងផ្សាភ្ជាប់គម្លាតរវាងគ្រឹះស្ថានហិរញ្ញវត្ថុ និងអាជីវកម្មដែលកំពុងលូតលាស់ ព្រមទាំងផ្តល់ការគាំទ្រ ក្នុងការពង្រីកប្រតិបត្តិការរបស់ពួកគេផងដែរ។
ជាកិច្ចប្រឹងប្រែងរួមគ្នារវាងសមាគមសហគ្រិនវ័យក្មេងកម្ពុជា សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា កម្មវិធីនេះបានប្រកាសដាក់ឲ្យដំណើរការជាផ្លូវការ នៅថ្ងៃទី8 ខែឧសភា ឆ្នាំ 2025 ដោយមានការចូលរួមពីភាគីពាក់ព័ន្ធសំខាន់ៗ ដៃគូឧបត្ថម្ភ និងសហគ្រិនពីវិស័យផ្សេងៗ។
ប្រព្រឹត្តឡើងក្នុងមួយឆ្នាំពេញ កម្មវិធីលទ្ធភាពទទួលបានហិរញ្ញប្បទាននេះ នឹងមានសិក្ខាសាលា កិច្ចពិភាក្សា និងកម្មវិធីចែករំលែកល្អៗជាច្រើនទៀត ដោយមានការចូលរួមពីអ្នកតំណាងពីធនាគារ ABA និងភាគីពាក់ព័ន្ធផ្សេងៗ ដែលធានាថាសហគ្រិននឹងទទួលបានចំណេះដឹងសំខាន់ៗ និងធនធានដើម្បីអភិវឌ្ឍ។
ABA នៅតែគាំទ្រប្រព័ន្ធអេកូឡូស៊ីសហគ្រិនភាពរបស់ប្រទេសកម្ពុជា យ៉ាងខ្ជាប់ខ្ជួន។ ដោយគាំទ្រការផ្តួចផ្តើមទាំងនេះ ធនាគារ កំពុងតែវិនិយោគទៅលើគំនិតនវានុវត្ត អាជីវកម្មប្រកបដោយភាពធន់ និងបរិយាបន្នកំណើនសេដ្ឋកិច្ច។
