ធនាគារ ABA និងក្រុមហ៊ុន UnionPay សហការគ្នាពង្រឹងប្រព័ន្ធទូទាត់របស់កម្ពុជា
08/Jul/2021
ធនាគារ ABA ជាធនាគារពាណិជ្ជឈានមុខនៅកម្ពុជា ប្រកាសពីការពង្រីក និងពង្រឹងកិច្ចសហប្រតិបត្តិការក្នុងការទទួលយកពាណិជ្ជករ ជាមួយក្រុមហ៊ុន UnionPay ដែលជាបណ្តាញទូទាត់សកលដែលផ្តល់សេវាកាតទូទាត់ធំជាងគេបំផុតនៅលើសកលលោក។
ស្របតាមទម្លាប់ទូទាត់ដែលកំពុងផ្លាស់ប្តូររបស់ប្រជាពលរដ្ឋកម្ពុជា ធនាគារ ABA បានដាក់ឲ្យប្រើប្រាស់ម៉ាស៊ីនទូទាត់ចរន្តជិត (Contactless POS) ជាង 1,000 ម៉ាស៊ីន នៅតាមពាណិជ្ជករ UnionPay ផ្នែកអាហារ និងភេសជ្ជៈ, ទីកន្លែងកម្សាន្ត, និងហាងទំនិញនានានៅទូទាំងប្រទេសកម្ពុជា។ ហាងល្បីៗ មានដូចជា The Asian Kitchen, Bonchon, និង The Pizza Company ជាដើម។ ABA ជាធនាគារចេញកាតច្រើនបំផុតមួយនៅកម្ពុជា ហើយបាននិងកំពុងចេញកាត UnionPay ចាប់តាំងពីឆ្នាំ 2015។ ធនាគារ ABA ក៏បាននិងកំពុងទទួលយកពាណិជ្ជករសម្រាប់ក្រុមហ៊ុន UnionPay ចាប់តាំងពីឆ្នាំ 2016 និងជាធនាគារមួយក្នុងចំណោមអ្នកទទួលយកពាណិជ្ជករ UnionPay ធំជាងគេនៅប្រទេសកម្ពុជាផងដែរ។
លើសពីនេះ ធនាគារ ABA បាននិងកំពុងដាក់ឲ្យប្រើប្រាស់កូដ QR របស់ UnionPay សម្រាប់ការទូទាត់នៅតាមពាណិជ្ជករជាង 1,000 ទីតាំង រួមមាន ផ្នែកហាងលក់រាយ, ហាងអាហារ និងភេសជ្ជៈ, ទីកន្លែងកម្សាន្ត និងទីតាំងផ្សេងៗជាច្រើនទៀតនៅប្រទេសកម្ពុជា។ ទីតាំងដ៏ពេញនិយមជាច្រើន ដូចជា ផ្សារទំនើបបាយ័ន, ផ្សារទំនើប Circle K, រោងភាពយន្ត Legend, ហាង Smart Shop, ហាងនំប៉័ង Tous Les Jours, និងហាងសម្លៀកបំពាក់ Zando មានទទួលទូទាត់តាមកូដ QR របស់ UnionPay។ ម្យ៉ាងវិញទៀត ធនាគារ ABA ចាប់ផ្តើមសេវាទទួលយកពាណិជ្ជករសម្រាប់ក្រុមហ៊ុន UnionPay International នៅលើប្រព័ន្ធទូទាត់អនឡាញ PayWay របស់ខ្លួន នៅខែវិច្ឆិកា ឆ្នាំ 2019។
លោកស្រី លាង ចិន្តា អ្នកគ្រប់គ្រងប្រចាំប្រទេសកម្ពុជារបស់ក្រុមហ៊ុន UnionPay International នៅតំបន់អាស៊ីអាគ្នេយ៍ មានប្រសាសន៍ថា៖ “យើងសង្កេតឃើញថា ប្រជាពលរដ្ឋកម្ពុជាបានចាប់យកផលិតផលទូទាត់នវានុវត្ត ដូចជា ការទូទាត់ចរន្តជិត (Contactless), ការទូទាត់អនឡាញ, និងការទូទាត់តាមកូដ QR ពីរបីឆ្នាំកន្លងមកនេះ។ ក្រុមហ៊ុន UnionPay ខិតខំផ្តល់នូវផលិតផល និងសេវាទូទាត់ដែលឆ្លើយតបនឹងការតម្រូវការសេវាទូទាត់ដែលកំពុងផ្លាសប្ដូរ របស់អតិថិជន និងអាជីវកម្មក្នុងប្រទេស។ ហេតុដូចនេះ យើងមានសេចក្តីសោមនស្សរីករាយដែលអាចពង្រីក និងពង្រឹងកិច្ចសហប្រតិបត្តិការរបស់យើងជាមួយដៃគូដែលមានចិត្តដូចគ្នា និងធនាគារឈានមុខក្នុងវិស័យហិរញ្ញវត្ថុឌីជីថលដូចជា ធនាគារ ABA ដើម្បីពន្លឿនវឌ្ឍនភាពរបស់ប្រទេសកម្ពុជាទៅរកសង្គមឌីជីថលមួយ។”
ក្រុមហ៊ុន UnionPay ផ្តល់សេវាកាតទូទាត់ធំជាងគេបំផុតនៅលើសកលលោក និងបានអភិវឌ្ឍខ្លួននៅក្នុងប្រទេសកម្ពុជាតាមរយៈការបន្តផ្តល់នូវសេវាទូទាត់ឧត្តមភាពដើម្បីជួយសម្រួលដល់តម្រូវការផ្នែកហិរញ្ញវត្ថុប្រចាំថ្ងៃរបស់អតិថិជនរបស់ខ្លួន។ ចំពោះការដាក់ឲ្យប្រើប្រាស់ និងការអភិវឌ្ឍកូដ QR ក្រុមហ៊ុន UnionPay ជាក្រុមហ៊ុនឈានមុខជាសកល ក្នុងចំណោមបណ្តាញទូទាត់អន្តរជាតិ ដោយទទួលបានកំណើនក្នុងការទទួលទូទាត់នៅប្រទេសកម្ពុជា ចាប់ពីឆ្នាំ 2019 ដល់ឆ្នាំ 2020 ដែលជាកំណើនគួរឲ្យកត់សម្គាល់ជាង 50% ជាមួយវិសាលភាពគ្របដណ្តប់នៅតាមទីក្រុងសំខាន់ៗ ដូចជា រាជធានីភ្នំពេញ, ទីក្រុងសៀមរាប, និងទីក្រុងព្រះសីហនុ។
ការងាកទៅរកសេវាទូទាត់នវានុវត្ត ដូចជា ការទូទាត់ចរន្តជិត (Contactless), ការទូទាត់អនឡាញ, និងការទូទាត់តាមកូដ QR បានលេចឡើងកាន់តែច្បាស់ អំឡុងពេលរីករាលដាលវីរុសកូវីដ-19 ដោយមនុស្សភាគច្រើនផ្តោតកាន់តែខ្លាំងមកលើអនាម័យផ្ទាល់ខ្លួន និងការកាត់បន្ថយការប៉ះពាល់ផ្ទាល់ ជាពិសេសខណៈពេលដែលនៅលើក្រដាសប្រាក់អាចមានបាក់តេរី, មេរោគ, និងវីរុសផ្សេងៗផងនោះ។
លោក Sanzhar Abdullayev នាយកគ្រប់គ្រងកាត និងសេវាទូទាត់អេឡិកត្រូនិករបស់ធនាគារ ABA បានមានប្រសាសន៍ថា៖ “គំនិតផ្តួចផ្តើមក្នុងការដាក់ឲ្យប្រើប្រាស់ម៉ាស៊ីនទូទាត់ចរន្តជិត (Contactless) និងកូដ QR របស់ UnionPay នៅតាមពាណិជ្ជករនានា ប្រាកដជាមានឥទ្ធិពលវិជ្ជមានដល់ការរស់នៅរបស់អតិថិជនយើងទូទាំងប្រទេសកម្ពុជា។ យើងជឿជាក់ថា គំនិតផ្តួចផ្តើមនេះនឹងបង្កើននូវការប្រើប្រាស់សេវាហិរញ្ញវត្ថុដ៏ទំនើប និងលើកទឹកចិត្តឲ្យប្រើប្រាស់សេវាទូទាត់អេឡិកត្រូនិកកាន់តែច្រើន ជាពិសេសអំឡុងពេលរីករាលដាលវីរុសកូវីដ-19 នេះ។”
អំពីក្រុមហ៊ុន UnionPay International
ក្រុមហ៊ុន UnionPay International (UPI) ផ្តោតលើធុរកិច្ចអន្តរជាតិរបស់ក្រុមហ៊ុន UnionPay។ ដោយចាប់ដៃគូជាមួយគ្រឹះស្ថានជាង 2,400 នៅទូទាំងសកលលោក ក្រុមហ៊ុន UnionPay International បានអនុញ្ញាតឲ្យប្រទេសនិងតំបន់ចំនួន 180 ទទួលកាតទូទាត់ និងប្រទេសនិងតំបន់ចំនួន 70 ចេញកាតទូទាត់។ ក្រុមហ៊ុន UnionPay International ផ្តល់នូវសេវាទូទាត់ឆ្លងប្រទេសប្រកបដោយគុណភាពខ្ពស់ សុវត្ថិភាព និងតម្លៃសមរម្យ ដល់អតិថិជនកាតច្រើនជាងគេបង្អស់នៅលើសកលលោក និងធានាផ្តល់សេវាក្នុងប្រទេសដ៏ងាយស្រួលដល់ម្ចាស់កាត និងពាណិជ្ជករ UnionPay ដែលមានចំនួនកំពុងកើនឡើងទូទាំងសកលលោក។
នៅតំបន់អាស៊ីអាគ្នេយ៍ ក្រុមហ៊ុន UPI បានអនុញ្ញាតឲ្យទទួល និងចេញកាតទូទាត់តាមម៉ាស៊ីន ATM និងម៉ាស៊ីនទូទាត់ POS នៅទូទាំងប្រទេសទាំង 10។ សម្រាប់ព័ត៌មានបន្ថែម សូមចូលទៅកាន់វិបសាយ៖ www.unionpayintl.com/kh/។